Apokalipisi 13 - Tosi Tapu

Le manu leia e pale ake i le tai ;

¹ Ti na kau tio loa e pale mei le tai se manu leia na maua ia ni tala e kau agafulu ti mo ni ulu e fitu, ti na teki i ona tala ni pala e kau agafulu, ti na tosi i ona ulu ni igoa lauveli ki le Atua.

² Ko le manu leia na kau tio ki ai na faipe se leopale ; na fai ona vae pe vae o se uluso, ti na fai lona gutu pe le gutu o se laione. Ti na soli loa e le gata kiate ia lona makeke, mo lona ekeekeaga fakasau, ti mo se pule lasi.

³ Ti na kau tio loa ki se tasi i ona ulu na sakinake kua lavea ki le mate ; kae na toe mauli loa a ia mei lona lavea mateia. Ti na punamauli loa le malama nei katoa i le nea lena, ti na muli loa a ia i le manu.

⁴ Ti na lotou atolasio loa ki le gata, talie na soli e ia le pule ki le manu ; na lotou atolasio loa ki le manu, o pati : Ko ai e tatau mo le manu, ti ko ai e feala ke tau kiate ia ?

⁵ Ti na soli loa kiate ia se gutu leia na puaki ia ni masau mata tuu ti mo ni lauveli ki le Atua ; ti na soli loa kiate ia le pule ke gaoi i masina e kau fa tupu lua.

⁶ Ti na fakamavaa loa e ia lona gutu o lauveli ki le Atua, mo lona suafa, mo lona tapenakulo, ti mo latou ala e nonofo i le lagi.

⁷ Ti na soli loa kiate ia ke tau ki le kau sagato, ti ke malo ia latou. Ti na soli loa kiate ia le pule ki faasiga fuli, mo kakai fuli, mo masau fuli, ti mo puleaga fuli.

⁸ Ti na atolasio loa kiate ia a kakai fuli o le malama nei, latou ala na leaise tosi olatou igoa i le tosi o le mauli a le Akeno, leia na tamate talu mei le fakatupu o le malama nei.

⁹ Kapau e maua e se tasi ni taliga, ke logo a ia.

¹⁰ Kapau na fakatuutuu se tasi ki le fakapopula, ti e ano loa a ia ki le fakapopula ; kapau e tamate se tasi ki le seleta, e tonu ke tamate a ia ki le seleta. Ko leinei le kataki fualoa mo le tui a le kau sagato.

Le manu leia e pale ake i le kele ; le numelo o le tagata : 666

¹¹ Ti na oki ai, na kau tio loa e pale ake i le kele malo se tasi ake a manu, leia na maua ia ni tala e lua ofaipe tala o se akeno, ti na masau a ia ofaipe se gata.

¹² Ti na maua e ia le pule katoa o le uluaki manu fekai leia na mua iate ia, o fakamaua e ia ke su le malama nei mo lona kakai ki le uluaki manu, i lana mauli i lona lavea leia na meimeiki ke mate ai.

¹³ Ti na fai e ia ni nea fakaofolele lalasi, o kaku ki le fakavilo o se afi mei le lagi ki le malama nei, i mua o le kakai.

¹⁴ Ti na kakaai e ia a kakai o le malama nei ki ana nea fakaofolele ala na soli ke fai e ia i mua o le uluaki manu fekai. Ti na pati a ia ki kakai o le malama nei ke fau se fakatata o le manu leia na lavea i le seleta ti na mauli.

¹⁵ Ti na soli loa kiate ia ke fakamauli e ia le fakatata o le uluaki manu fekai, o tupu ke masau le fakatata o le uluaki manu fekai, ti ke fakatotonu e ia ke tamate latou fuli ala e leaise su loa ki le fakatata o le manu.

¹⁶ Ti na fakamaua loa e ia ke maua e tagata fuli, liliki mo lalasi, mou koloa mo mativa, lauatea mo popula, se fakamailoga i olatou lima atamai pe i olatou lae,

¹⁷ Ti ke aua na mafai ke totogi e se tasi pe fakatau, kae leaise maua e ia le fakamailoga lena, pe ko le igoa o le manu fekai, pe ko le numelo o lona igoa.

¹⁸ Ko leinei le poto. Ke lau e leia e maua ia se atamai le numelo o le manu fekai. Talie ko se numelo a ia o le tagata, ti ko lona numelo ko kau lelau e ono kau ono tupu ono.