Apokalipisi 12 - Tosi Tapu

Le fafine, le talakone mo le toe tagata

¹ Na sa loa se fakamailoga lasi i le lagi : Ko se fafine kua kofu ki le laa, mo le masina i lalo o ona vae, ti mo se pala o ni fetuu e kau agafulu tupu lua i lona ulu.

² Ti na faitoe le fafine, ti na tagi a ia i lana gaoi ti mo le mamae o le fanau.

³ Ti na toe sa loa se tasi ake fakamailoga i le lagi ; ti ko leinei, ko se gata lasi leia na kula ofaipe le afi, mo ulu e fitu, mo tala e kau agafulu, ti na teki i ona ulu ni pala e fitu.

⁴ Ti na toso e lona siku le vaega tolu o fetuu o le lagi, o ti latou ki le kele. Na tuu loa le gata i mua o le fafine leia ka fanau, o tupu ke kai e ia lona toe, mo ka fanau loa a ia.

⁵ Ti na fanaui loa e le fafine se vosa, leia e tonu ke lagiaki ia a puleaga ki se tokotoko ukamea. Kae na too loa lona toe, o ave ki le Atua, ti mo lona ekeekeaga fakasau.

⁶ Ti na sola loa le fafine ki le toafa, ki le ganea leia na teuteui e le Atua kiate ia ke fagai ai a ia i aso e afe kau lelau lua kau ono.

Le alekaselo ko Mikaele

⁷ Ti na i ai loa se tau lasi i le lagi. Na tau loa Mikaele mo ana kau aselo ki le gata. Ti na tau loa kia latou le gata mo lana kau aselo.

⁸ Kae na leaise malo loa le gata mo lana kau aselo, ti na leaise toe maua loa se nofoaga kia latou i le lagi.

⁹ Ti na ti loa ki fafo le gata lasi, le gata afea, leia na igoa ko Tiapolo mo Satana, leia na kakaai ia le malama nei katoa. Ti na ti loa a ia ki le kele, ti na ti foki ana kau aselo mo ia ki le kele.

¹⁰ Ti na kau logo loa i le lagi ki se leo makeke na pati : I le temi nei kua soko mai loa le saofaki, mo le mafimafi, mo le pule fakasau o lotatou Atua, ti mo le pule o lona Kilisito ; talie kua ti ki fafo leia na lauveli ki otatou fetaina, leia na tukugavelii ia latou i mua o lotatou Atua i le ao mo le po.

¹¹ Ti na lotou malo iate ia, o tupu ko le toto o le Akeno, ti mo le folafola o lalatou fakamaoki, ti na leaise lotou alofa ki olatou mauli ke lotou i ai ki le mate.

¹² Koia kotou fiafia, atu lagi, ti mo koutou ala e nonofo i le atu lagi. Malaia ki le kele mo le tai ! Talie kua ifo le Tiapolo kia koulua, kua makita i le ita lasi, talie e iloa e ia kua toetoe fua lona temi.

¹³ I le tio a le gata kua ti a ia ki le kele, na tuli loa e ia le fafine leia na fanaui ia le vosa.

¹⁴ Ti na soli loa ki le fafine a kapakau e lua o le akuila lasi ke lele ai ki le toafa, ki lona mumuniaga, ki le ganea leia e fagai ai loa a ia i se temi, mo ni temi, ti mo le vaelua o se temi, o mamao mei mata o le gata.

¹⁵ Ti na luluai loa e le gata mei lona gutu se vai ofaipe se vaitafe lasi i muli o le fafine, o tupu ke tafea ai le fafine.

¹⁶ Kae na saofaki loa e le kele le fafine : na fakamavaa loa e ia lona gutu, o folo le vaitafe leia na luluai e le gutu o le gata.

¹⁷ Ti na ita lasi ai le gata ki le fafine, ti na ano loa a ia o taui le toega o lona sakoga, latou ala na tausi ki lao a le Atua ti na taofi ia le fakamaoki o Sesu.

¹⁸ Ti na tuu loa a ia i le one o le tai.