Apokalipisi 11 - Tosi Tapu

Ko tagata fakamaoki e toka lua

¹ Ti na soli mai loa kiate au se fa u ofaipe se tokotoko, o pati : Tuu ki aluga, ti ke fuafua le fale tapu o le Atua, mo le aletale, ti mo latou ala e atolasio i ai.

² Kae ko le lotoa takatakai o le fale tapu, ke ke tuku kese a ia, aua na ke fuafua a ia ; talie kua tuku a ia ki kakai pagani, ti e lotou takatakafi loa le kolo tapu ki olatou vae i masina e kau fa tupu lua.

³ E kau soli loa ki aku tagata fakamaoki e toka lua, ala kua kofu ki ni taga, ke la akonaki fakakikite i ni aso e afe kau lelau lua kau ono.

⁴ Ko laua ko ni oliveto e lua ti mo ni tekiaga malama e lua ala e tutuu i mua o le Aliki o le malama nei.

⁵ Kapau e loto se tasi ke fai se nea veli kia laua, e mapuna mai loa se afi mei ola gutu o tamate ola fili ; ti kapau e loto se tasi ke fai se nea veli kia laua, e tonu ke mate fakafenaaki a ia.

⁶ E la maua le pule ke tapono ai le lagi, o tupu ke aua na to se ua i aso ala e la akonaki fakakikite ai ; ti e la maua le pule ke fetogi ai a vai ke toto, ti ke tautea ai le malama nei ki malaia kesekese, i temi fuli ala e la loto loa ki ai.

⁷ Ka oki loa lala fakamaoki, e tau loa kia laua le manu leia e pale mei le vanu, ti e malo loa a ia ia laua, ti e tamate loa e ia laua.

⁸ Ti e tuku loa ola tino i le malae o le kolo lasi, leia e igoa fakatata ko Sotoma mo Esipito, i le ganea leia na tutuki ai i le koluse lola Aliki.

⁹ Ti e tio loa ki ola tino mate ni tagata mei kakai fuli, mo faasiga fuli, mo masau fuli, mo puleaga fuli, i aso e tolu mo le vaelua, ti e leaise lotou fakataga loa ke tuku ola tino mate ki se tanuma.

¹⁰ Ti e fiafia loa le kakai o le malama nei i le mate o tagata ana e toka lua, ti e lotou fiafia lasi loa, o feaveaki alatou nea alofa, talie na fakamamaei a kakai o le malama nei e polofeta ana e toka lua.

¹¹ I le oki o aso e tolu mo le vaelua, na ulu loa kia laua se laumalie o le mauli leia na au mei le Atua, ti na la tutuu loa i ola vae ; ti na vilo loa se i lasi kia latou ala na tio kia laua.

¹² Ti na la logo loa ki se leo mei le lagi leia na pati kia laua : Kolua pale mai ki leinei ! Ti na la pale loa ki le lagi i se ao ; ti na tio loa ola fili kia laua.

¹³ I le ola lena, na to loa se mafuike lasi, ti na solo loa ki lalo le vaega kau agafulu o le kolo ; ti na mamate loa a tagata e tino fitu afe i le mafuike lena, ti ko le toega o le kakai na lulu loa i le i, ti na lotou fakakololia loa ki le Atua o le lagi.

¹⁴ Kua sili le lua malaia. Ko leinei, ka au vave loa le tolu malaia.

Le fitu o fakatagi pupusi

¹⁵ Ti na pupusi loa e le fitu o aselo lana fakatagi pupusi. Ti na i ai loa ni leo makeke i le lagi ala na pati : Ko le puleaga o le malama nei kua tuku ki lotatou Aliki ti mo lona Kilisito ; ti e sau loa a ia i sekulo mo sekulo.

¹⁶ Ti ko matua e tino lua tupu fa, ala na ekeeke i mua o le Atua i olatou ekeekeaga fakasau, na tulolo loa olatou ulu ki le kele, o atolasio ki le Atua,

¹⁷ o pati : E motou fakafetai atu, Aliki Atua Mafimafi, leia e agai, leia na agai, talie kua ke too lou mafimafi lasi, ti kua ke kamata lau pule fakasau.

¹⁸ Na iita a atu puleaga ; kae kua au lou sausau, ti kua soko mai le temi ke fakamaaui ai le kau mate, ti ke fakapale ai au tagata fakasausau ko le kau polofeta, mo le kau sagato, mo latou fuli ala na i ki lou suafa, liliki mo lalasi, ti ke maumaui ai latou ala na maumaui ia le kele.

¹⁹ Ti na fakamavaa loa le fale tapu o le Atua i le lagi, ti na sa loa le aleka o lona sai i lona fale tapu. Ti na i ai loa ni uila, mo ni leo, mo ni mana, mo se mafuike, ti mo se ua fatu makeke.