Apokalipisi 10 - Tosi Tapu

Se ga tosi ikiiki na soli kia Soane

¹ Ti na kau tio loa na ifo mei le lagi se tasi ake aselo makeke. Na takatakai a ia e se ao, ti na i ai se nuanua i lona ulu ; na fai ona mata pe le laa, ti na fai ona vae pe ni pou afi.

² Ti na too e ia i lona lima se ga tosi kua fakamavaa. Na teki loa e ia lona vae atamai ki le tai, ti mo lona vae sema ki le kele malo ;

³ ti na kalaga loa a ia o leo lasi, ofaipe se gugulu o se laione. I lana kalaga, na fakagugulu loa e mana e fitu olatou leo.

⁴ I le gugulu o leo o mana e fitu, na kau teuteu loa ke kau tosi, kae na kau logo loa ki se leo mei le lagi na pati mai kiate au : Fakamau ke mau le nea leia kua pati ki ai a mana e fitu, ti aua na ke tosi a ia.

⁵ Ti ko le aselo, leia na kau tio na tuu i aluga o le tai mo le kele malo, na siki ia loa lona lima atamai ki le lagi,

⁶ ti na fakapapau loa a ia i leia e mauli i sekulo mo sekulo, leia na fakatupu ia le lagi mo nea fuli i ai, mo le kele mo nea fuli i ai, mo le tai mo nea fuli i ai : e leaise toe solomuli loa,

⁷ kae i aso o le leo o le fitu aselo, mo ka pupusi loa e ia lana fakatagi pupusi, e fakasoko loa e le Atua lana fakatuutuu fakapulipuli, ofaipe lana fakasa fakatomua ki ana tagata fakasausau, le kau polofeta.

E tonu ke toe kikite Soane

⁸ Ti ko le leo, leia na kau logo ki ai mei lagi, na toe masau mai loa kiate au, o pati : Ano, o too le ga tosi kua fakamavaa mei le lima o le aselo leia e tuu i aluga o le tai mo le kele malo.

⁹ Ti na kau ano loa ki le aselo, o pati kiate ia ke soli mai kiate au le ga tosi. Ti na pati mai loa a ia kiate au : Too a ia, o folo ; e kona loa a ia ki ou tootooga, kae e sua malie loa a ia ki lou gutu ofaipe le meli.

¹⁰ Ti na kau too loa le ga tosi mei le lima o le aselo, ti na kau folo loa a ia ; na suamalie loa a ia i loku gutu ofaipe le meli, kae i laku folo a ia, na apele loa oku tootooga i le kona.

¹¹ Ti na pati mai loa a ia kiate au : E tonu ke ke toe masau kikite ki ni kakai mauke, mo ni puleaga, mo ni masau, ti mo ni sau.