Apokalipisi 1 - Tosi Tapu

Kamataaga

¹ Fakasa o Sesu-Kilisito, leia na tuku e le Atua kiate ia ke fakailo ki ana tagata fakasausau a nea ala e tonu ke soko vave, ti na fakailo e ia, i le kakau o lana aselo, ki lana tagata fakasausau ko Soane ;

² ko ia leinei na fakasa ia le folafola a le Atua, mo le fakamaoki a Sesu-Kilisito, ti mo nea fuli ala na tio a ia ki ai.

³ Manuia leia e lau ia le tosi ti mo latou ala e fakalogo ki folafola o le folafola kikite, ti mo fai ia a nea fuli ala e tosi i ai ! Talie kua ofi le temi.

Akonaki ki atu Ekelesia

⁴ Ko au Soane ki Ekelesia e fitu ala e tuu i Asia : Ke soli atu kia koutou le kalasia mo le tokamalie mei leia e agai, leia na agai, leia e au, ti mei Laumalie e fitu ala i mua o lona ekeekeaga fakasau,

⁵ ti meia Sesu-Kilisito, ko le tagata fakamaoki agatonu, ko le uluaki tupu mei le kau mate, ti ko le Aliki o sau o le malama nei ! Ki leia e alofa kia tatou, leia na fufulu ia tatou ia tou agasala ki lona toto,

⁶ ti na fakasoko ia tatou ko se puleaga, mo ni tagata fai sakilifisio ki le Atua lona Tamana, kiate ia le kololia mo le mafimafi, i sekulo mo sekulo ! Amene !

⁷ Ko leinei, e au a ia mo ni ao. Ti e tio loa kiate ia a mata fuli, ti mo latou foki ala na sokai ia a ia ; ti e tagi mamae loa a faasiga fuli o le malama nei o tupu ko ia. Io. Amene !

⁸ E pati le Aliki Atua, ko au ko le alefa mo le omeka, leia e agai, leia na agai, leia e au, le Mafimafi.

Tio o le Alo o le tagata

⁹ Ko au Soane, ko lokoutou taina, leia e kau mo koutou ki le mamae, mo le puleaga, ti mo le kataki fualoa ia Sesu, na kau nofo i le motu leia e igoa ko Patemosi, o tupu ko le folafola a le Atua ti mo le fakamaoki o Sesu.

¹⁰ Na kau too loa e le Laumalie i le aso o le Aliki, ti na kau logo loa i oku muli ki se leo makeke, ofaipe se leo o se fakatagi pupusi,

¹¹ leia na pati : Ko le nea leia e ke tio ki ai, tosi a ia i se tosi, o fakamomoli a ia ki Ekelesia e fitu, ki Efeso, mo Similene, mo Pelekame, mo Tiatile, mo Salete, mo Filatelefia, ti mo Laotise.

¹² Na kau maliu loa ke kau iloa le leo leia na masau mai kiate au. Ti e i laku maliu, na kau tio loa ki ni tekiaga malama aulo e fitu,

¹³ ti i loto malie o tekiaga malama e fitu, na i ai se tasi leia na faipe se vosa o le tagata, kua kofu ki se kofu loloa, ti kua toi se kilii pipi aulo i lona fatafata.

¹⁴ Ko lona fa ulu ti mo ona fului ulu na tetea ofaipe le fului ovi tea, ofaipe le nive ; ko ona mata na faipe se ula o se afi ;

¹⁵ ko ona vae na faipe le sila kaka, o sakinake na tutu a ia i se gutuumu ; ti ko lona leo na faipe le gugulu o vai lalasi.

¹⁶ Na too e ia i lona lima atamai ni fetuu e fitu. Na ulu mei lona gutu se seleta lau ikiiki, mata lua ; ti ko ona mata na faipe le laa mo ka ula i lona makeke katoa.

¹⁷ I laku tio kiate ia, na kau fakamapee loa i ona vae ofaipe se tasi leia kua mate. Kae na teki loa e ia lona lima atamai kiate au, o pati : Aua na ke i !

¹⁸ Ko au ko le uluaki, ti ko le fakamulimuli, ti ko leia e mauli. Na kau mate ; ti ko leinei, kua kau mauli ki sekulo mo sekulo. E kau too a kalavi o le mate ti mo le nofoaga o le kau mate.

¹⁹ Tosi le nea leia kua ke tio ki ai, le nea leia e soko nei, ti mo le nea leia e tonu ke soko ki muli.

²⁰ Ko leinei le misitelio o fetuu e fitu ala na ke tio ki ai i loku lima atamai, ti mo tekiaga malama aulo e fitu. Ko fetuu e fitu ko aselo ana o Ekelesia e fitu, ti ko tekiaga malama e fitu ko Ekelesia ana e fitu.