Apetiasi 1 - Tosi Tapu

Kikite o le maumaui o Etome

¹ Folafola kikite a Apetiasi. Ko leinei le folafola a le Aliki, le Eteleno, ki Etome : Na motou maua se logo mei le Eteleno, Ti na kakau se tagata avelogo ki atu puleaga : Kotou tutuu ki aluga, ke tou saele ki Etome o taui a ia !

² Ko leinei, e kau fakaliliu loa a koe o ikiiki i lotolotoga o atu puleaga, E ke liliu loa ko le nea fakagologolo.

³ Na fakasese a koe e le fia nealasi o lou loto, A koe leia e nofo i pu o utu, Leia e ekeeke i potu taualuga, Leia e pati i lou loto : Ko ai e fakaifo ia loa au ki lalo ?

⁴ Pe ke fakatuu ia loa lou ofaga o taualuga ofaipe leia o le akuila, Pe ke fakatuu loa a ia i lotolotoga o fetuu, E kau ti loa a koe mei ai ki lalo, e pati le Eteleno.

⁵ Kapau e au ni tagata kaia mo ni tagata maumau i le pouli ki lou fale, Pe leaise lotou too loa au nea fuli, Kae ke nofo noa loa ? Ti kapau e ulu ni tagata tauvite ki lau faisaga vite, Pe leaise lotou tuku loa se ga nea fua e tasi ?…

⁶ Koia e sakili ai loa a nea fuli a Esau ! E maua loa ona koloa fufu !

⁷ Kua kapu a koe e latou fuli ala na kau mo koe o kaku ki le koiga, Kua kakaai a koe e ou kaukaunea, ti kua lotou pule kiate koe, Ko latou ala na kai ia lau pane kua fakatuu ia ni masele kiate koe, Kae na leaise ke tio ki se nea !

⁸ Pe leaise ko le aso leinei, e pati le Eteleno, E kau fakapuli ai loa le kau poto i Etome, Ti mo le atamai i le mauga o Esau ?

⁹ Ko au tagata tau, ei Temane, e nonofo loa i le i lasi, Talie e mamate loa i le matea latou fuli o le mauga o Esau.

¹⁰ O tupu ko lau agamakeke ki lou taina ko Sakopo, E ke apele loa i le luma, Ti e motusi loa a koe o lee gato.

¹¹ I le aso leia na ke tuu ai i ona mua, Le aso leia na ave popula ai lana kau tau e ni matapule, Le aso leia na ulu ai ni matapule i ona matapa, ti na lotou fai ai le toso ki Selusalemi, Ko koe foki na ke faipe se tasi o latou.

¹² Na leaise tonu ke ke tio fakafiafia ki le aso o lou taina, le aso o lona malaia ; Na leaise tonu ke ke fakafiafia ki fanau a Suta i le aso o lolatou maumaui, Ti na leaise tonu ke ke lauveli kia latou i lou gutu i le aso o lolatou mamae.

¹³ Na leaise tonu ke ke ulu ki le kolo o loku kakai i le aso o lona maumaui. Na leaise tonu ke ke tio fakafiafia ki lona malaia i le aso o lona maumaui, Ti na leaise tonu ke fafa lou lima ki ona koloa i le aso o lona maumaui.

¹⁴ Na leaise tonu ke ke tuu i ona magai ala o tamate latou ala na sosola, Ti na leaise tonu ke ke soli ki le fili latou ala na sao i le aso o lona mamae !

¹⁵ Talie kua ofi mai le aso o le Eteleno, ki atu puleaga fuli ; E fai loa kiate koe o mulimuli ki le nea leia na ke fai. E vilo loa au gaoi ki lou ulu.

¹⁶ Talie, ofaipe koutou, kau Iselaele, na kotou inu le ipu o loku sausau i loku mauga maokioki, E inu loa e atu puleaga fuli o leaise toe oki ; E lotou inu loa, e lotou konana loa, Ti e lotou puli noa loa ofaipe se kakai leia na leaise tupu.

¹⁷ Kae e nofo loa le fakamauli i le mauga o Sione, ti e maokioki loa a ia, Ti e toe maua loa e le fale o Sakopo ona tofiga.

¹⁸ E liliu loa le fale o Sakopo ko se afi, Ti ko le fale o Sosefo ko se ulai afi ; Kae e liliu loa le fale o Esau ko se tuuga penu, Leia e lotou tutu loa o okioki, Ti e leaise toe loa se nea i le fale o Esau, Talie kua masau le Eteleno.

¹⁹ E maua loa e latou o le saute le mauga o Esau, Ti ko latou o le toafa le fenua o le kau Filisitini ; E lotou maua loa le fenua o Efalaimi mo leia o Samalia ; Ti e maua loa e Pesamino a Kalaate.

²⁰ Ko le kau popula o le kau tau lena o fanau a Iselaele E maua ia loa le fenua leia na nonofo ai le kau Kanaane o kaku ki Salepeta ; Ti ko le kau popula o Selusalemi ala e nonofo i Sefalate E maua ia loa a kolo o le saute.

²¹ E pale ake loa ni tagata fakamauli ki le mauga o Sione, O fakamaaui le mauga o Esau ; Ti e maua loa e le Eteleno le pule fakasau.