Apakuki 3 - Tosi Tapu

Katiko a Apakuki

¹ Ko le kole a le polofeta ko Apakuki, leia na fatu ofaipe se lau mate.

² Eteleno, na kau logo ki le nea leia na ke fakasa, ti kua kau apele i le i. Ei Eteleno, fakasoko lau gaoiaga i lolotoga o fetuu ka soko mai ! Io, fakasa a ia i fetuu ka soko mai ! Kae i lou sausau, manatui ou aloalofa !

³ E au le Atua mei Temane, E au le Sagato mei le mauga o Palani… Manava. E fakaapele e lona agai le atu lagi, Ti e fakaapele e lona kololia le kele.

⁴ Se faipe le gigila o le malama ; E mavae ni kave gigila i lona lima, I lena e nofo ai lona makeke.

⁵ I ona mua e saele ai le taumasaki, Ti e muli iate ia le taumasaki.

⁶ E tuu a ia, ti e fuafua e ia le malama nei ki lona mata ; E tio a ia, ti e fakalulu e ia a atu puleaga. E mavasivasi a mauga lalasi afea, E sosolo a mauga liliki afea, E mavaavaa a ala afea i ona mua.

⁷ E kau tio kua nonofo i le mamae a falela o Etiopia, Ti kua nonofo i le i a falela o le fenua o Matiane.

⁸ Pe ita le Eteleno ki vaitafe ? Pe mu lou ita ki vaitafe ? Pe ko le tai leia e ke liligi ki ai lou sausau Ke ke eke ai ki au osi, Ti mo lau saliote o le malo ?

⁹ Kua telefua lau kalolo, Ko malaia ko gasau o au folafola… - Manava. E ke fakapaipaisi le kele ke sali a vaitafe.

¹⁰ E lulu a mauga i lalatou tio kiate koe, E fakalofia e ua makeke le kele, E gugulu le moana loloto, E lagai e ia ona galu o kaku ki le lagi.

¹¹ I le malama o au gasau ala e lele, I mua o le tapa gigila o lau tao, E tutuu le laa mo le masina i ola nofoaga.

¹² E ke foli le kele i lou itaita, E ke takatakafi a atu puleaga i lou sausau.

¹³ E ke ulu o saofaki lou kakai, O saofaki lou filifiliia. E ke fatii le taufufu o le fale o le tagata agaveli, E ke maumaui oki lona fale katoa… - Manava.

¹⁴ E ke soka ki au gasau le ulu o ana pule, Ala e feoso mai kiate au ofaipe se afa, ke fakamavetevete au, O taukalaga fakafiafia O sakinake kua lotou tafi le tagata fakaaloalofa i lolatou mumuniaga.

¹⁵ E ke takatakafi le tai ki au osi, mo le pela o atu vai lalasi.

¹⁶ Na kau logo… Ti na aloalofa oku tootooga. I le leo lena, e tete oku laugutu, E okioki oku ivi, Ti e lulu oku tuli : E tonu ke kau talitali fakalologo ki le aso o le mamae, Le aso leia e saele ai loa le tagata fakaveliveli ki le kakai.

¹⁷ Talie e leaise se loa le fiki, E leaise tuku loa e le vite se nea, E puli loa le fua o le oliveto, E leaise tuku loa e faisaga se nea kai ; E pupuli loa a ovi i fagaiaga mutie, Ti e leaise toe maua loa ni pipi i fale manu.

¹⁸ Kae, e kau loto ke kau fakafiafia i le Eteleno, E kau loto ke kau fakafiafia i le Atua o loku fakamauli.

¹⁹ Ko le Eteleno, le Aliki, ko loku makekeaga ; E fakaliliu e ia oku vae ofaipe la o tia fafine, ti E fakasaele e ia au i oku potu taualuga. Ki le pule o kau sua. Ki ni nea faimusika va.