Apakuki 2 - Tosi Tapu

Ko le tui makeke a Apakuki

¹ Na kau nofo i loku nofoaga, Ti na kau tuu i aluga o le tule ; Na kau alaala, ke tio ki le nea leia e fakasa mai loa kiate au e le Eteleno, Ti mo le nea leia e kau tali loa i le oki o laku tagi.

² Na masau mai loa le Eteleno kiate au, o pati : Tosi le folafola fakakikite : Togi a ia i ni laupapa, O tupu ke lau tuumau a ia.

³ Talie ko se folafola kikite leia kua oki lona temi i le fakatuutuu, E saele a ia ki lona fakasoko, ti e leaise loi loa a ia ; Kapau e tuvai a ia, talitali ki ai, Talie e soko loa a ia, E soko maoki loa a ia.

⁴ Ko leinei, na makita lona laumalie, e leaise sako a ia iate ia ; Kae e mauli loa le tagata agatonu i lana tui.

Tupuaga o le fakamaau o le tagata fakaveliveli

⁵ Tatau mo leia e kona mo matasoka, E leaise mafai ke fimalie le tagata fia nealasi ; E fakamavaa laulasi e ia lona gutu ofaipe le nofoaga o le kau mate, E leaise makona a ia i se temi ofaipe le mate, E aumai e ia kiate ia atu puleaga fuli, E fakatasi e ia ki ona tafa a kakai fuli.

⁶ Pe leaise liliu loa a ia ki kakai fuli ko ni nea fakakatai, Mo se nea fakagologolo mo se nea fakaofolele ? E pati loa : Malaia ki le tagata leia e fakatuuga ia a nea ala e leaise ko ni ana nea ! E kaku loa ki afea ?… Malaia ki le tagata leia e fakatuuga ia ona maua !

⁷ Pe leaise malaga fakapunamauli ake loa latou ala e ke tuu maua ki ai ? Pe leaise alaala ake loa latou ala na ke popula ki ai ? Io, e ke liliu loa ko lalatou nea kai.

⁸ O tupu na ke kaia ni puleaga mauke ai, E kaia loa a koe e le toetoega fuli o kakai ; Talie na ke liligi le toto o ni tagata, Na ke fai ni agamakeke i le fenua, Ki le kolo mo lona kakai katoa.

⁹ Malaia ki leia e tanaki ia ki lona fale ni totogi kaia, O tupu ke fakatuu lona ofaga i se ganea taualuga, Ke sao ai i le lima o le malaia !

¹⁰ Ko le matagafua lena o lou fale totonu lena kua ke fakatuutuu ia, I lau maumaui ni kakai toka api, Ti ko koe totonu leia kua ke agasala ki ai.

¹¹ Talie e kalaga le fatu i loto malie o le kaua, Ti e tali ki ai le laakau leia e fakafesoko ia le fatafataafale.

¹² Malaia ki leia e fakatuu ia se kolo ki le toto, Leia e fakatuu ia se kolo ki le agaveli !

¹³ Ko leinei, kua fakapapau le Eteleno o kau tau : E gaoi a kakai ki le afi, E pakia noa a atu puleaga.

¹⁴ Talie e apele loa le malama nei i le iloa o le kololia o le Eteleno, Ofaipe le takele o le moana leia e apele i le vai leia e uufi ia a ia.

¹⁵ Malaia ki leia e fakainu ia lona oloi, Kiate koe leia e liligi ia lau fagu vino ke fakainu ai a ia ke kona, O tupu ke tio ki lona telefua !

¹⁶ E ke makona loa i le luma o lasi ake i le kololia ; Ke ke inu foki mo koe totonu, ti ke ke nofo telefua ! E maliu loa kiate koe le ipu o le lima atamai o le Eteleno, Ti e fakakelekele loa lou kololia e le luma.

¹⁷ Talie e vilo loa kiate koe a agamakeke na fai ki Lipane, Ti e fakaii loa a koe e maumau a manu, O tupu na ke liligi le toto o ni tagata, Ti na ke fai ni agamakeke i le fenua, Ki le kolo mo lona kakai fuli.

¹⁸ Kolea le aoga o se fakatata ta, ke tupu ai lona ta e se tagata tufuga ? Kolea le aoga o le fakatata ukamea saka leia e ako ia le loi, Ke tupu ai le tuku e le tagata lana fanaki kiate ia, Kae ko le maoki e lolotoga fau e ia ni taulaatua gutu mate ?

¹⁹ Malaia ki leia e pati ki le laakau : Tuu ki aluga ! Ki se fa fatu gutu mate : Alaala ! Pe fakasa loa e ia se nea ? Ko leinei, e teuteui a ia ki le aulo mo le siliva, Kae e leaise maua iate ia se laumalie leia e fakamauli ia a ia.

²⁰ E nofo le Eteleno i lona fale tapu maokioki. Ke fakalologo le malama nei katoa i ona mua !