Apakuki 1 - Tosi Tapu

Ko le tagi a Apakuki

¹ Ko le folafola kikite na fakasa ki le polofeta ko Apakuki.

² E kaku loa kiafea, ei Eteleno ?… Na kau tagi, Kae e leaise ke fakalogo mai ! Na kau kalaga kiate koe o tupu ko le agamakeke, Kae e leaise ke tokoi mai !

³ Kolea e ke fakatio ai au ki le agaveli, Ti e ke tio ai ki le lee faitotonu ? Kolea e tuu ai le fakaveliveli mo le fakamakeke i oku mua ? I ganea fuli, e malaga ake ni fakamaau mo ni fefele.

⁴ Koia e leaise koi mauli ai le lao, E leaise koi makeke ai le faitotonu : Talie kua malo le tagata agaveli i le tagata faitotonu, Ti kua salasala a fakamaau.

Fakasa o le tautea o Suta

⁵ Kotou tagaki okoutou mata ki atu puleaga, ti kotou tio, Ti kotou punamauli, ti kotou i ! Talie e kau fai loa se gaoi i lokoutou temi, Leia e leaise kotou tui loa ki ai mo ka fakamatala a ia.

⁶ Ko leinei, e kau lagai loa le kau Kaletea, Se kakai itaita mo makeke, Leia e saele i ni fenua lalasi o too ni nofoaga o ni iki.

⁷ Ko se kakai mamalu mo fakaii ; E fakalogo fai a ia kiate ia mo lona makeke.

⁸ E gasolo ake ana osi i leopale, Ti e lotou makamu ake i lupo o le afiafi. E saele ana tagata eke osi i le fia nealasi, E au ana tagata eke osi mei mamao, E lotou lele ofaipe le akuila leia e oso ki lana nea kai.

⁹ E au le kakai katoa lena ki le kaia. E tio ona mata manumanu ki mua, Ti e fakatasi e ia ni kau pilisoni ofaipe le one.

¹⁰ E kata a ia ki sau, Ti e gologolo a ia ki pule. E kata a ia ki kolo tau fuli, E fakatuuga e ia ni kele, ti e too e ia latou.

¹¹ Ti e liuga tua lua e ia lona makeke, E soko atu e ia lana saele, ti e asilisili ake lana agasala. Ko lona makeke o ona, ko lena lona atua !

¹² Pe leaise ke agai mei lee gato, Eteleno, loku Atua, loku Sagato ? E leaise motou mamate loa ! Ei Eteleno, na ke fakanofo le kakai leinei ke fai ia au fakamaauaga ; Ei loku Utu, na ke lagai a ia ke tuku ia au tautea.

¹³ E mea ai ou mata ke tio ki le veli, Ti e leaise feala ke ke tio ki le agaveli. Kolea e ke tio ai loa ki le kau agatuu, ti ke fakaleemu loa, Kae lolotoga kai e le tagata agaveli leia e agatonu ake iate ia ?

¹⁴ Pe ke fai loa ki le tagata ofaipe ika o le tai, Ofaipe le manu totolo leia e leai sona pule ?

¹⁵ E toso ake e ia latou fuli ki le matau, E aumai e ia latou ki lona kupega, E tanaki e ia latou ki ana kukuti. Talie e lasi loa lona fiafia mo lona nekenekea ia latou.

¹⁶ Koia leia e momoli ai e ia ni sakilifisio ki lona kupega, E tutu ai e ia se iseso ki ana kukuti ; Talie e maua e ia ni nea kai gako mo kano malie i nea ana.

¹⁷ Pe gato loa afea lana toso lana kupega ? Pe gato loa afea lana tamate fakaveliveli a atu puleaga ?