Amosi 9 - Tosi Tapu

Tautea o Iselaele

¹ Na kau tio loa ki le Aliki leia na tuu i le aletale. Ti na pati a ia : Taai a puloga o pou lalasi ti ke galulu a uluaga o le fale tapu, Ti ke ke fatifatii latou ki olatou ulu o latou fuli ! E kau tamate loa le toega ki le seleta. E leaise feala loa ke mauli se tasi o sola, E leaise sao loa se tasi ia latou.

² Kapau e lotou ulu ki le nofoaga o le kau mate, E taaki loa latou e loku lima mei ai. Ti kapau e lotou pale loa ki le atu lagi, E kau fakaifo loa latou mei ai.

³ Kapau e lotou mumuni i le tumutumu o le Kalemelo, E kau afa loa latou i ai ti e kau tapo loa latou. Kapau e fufu latou i oku mata i le takele o le tai, E kau fakatotonu loa ki le gata ke uuti ia latou i ai.

⁴ Kapau e lotou ano loa ki le popula i mua o olatou fili, E kau fakatotonu loa ki le seleta ke tamate latou i ai ; E kau fakaagaaga loa oku mata kia latou, Ke kau fai se veli kae leai se malie.

⁵ E fafa le Aliki, le Eteleno o kau tau, ki le malama nei, ti e galulu a ia, Ti e tagi laulau loa lona kakai katoa. E malaga le kele katoa ki aluga ofaipe le vaitafe, Ti e ifo a ia ki lalo ofaipe le vaitafe o Esipito.

⁶ Na fakatuu e ia lona fale i le atu lagi, Kae tuu lona fakatafito i le kele. E kalagai e ia a vai o le tai, Ti e fakamafola e ia latou i aluga o le kele : Ko le Eteleno ko lona igoa.

⁷ Fanau a Iselaele, pe leaise kotou fai kiate au Pe fanau a le kau Etiopia ? e pati le Eteleno. Pe na leaise kau fakamavae Iselaele mei le fenua o Esipito, Ofaipe le kau Filisitini mei Kafetoli ti mo le kau Silia mei Kile !

⁸ Ko leinei, e tio a mata o le Aliki, le Eteleno, ki le puleaga agasala. E kau maumaui loa a ia i aluga o le malama nei ; Kae e leaise kau maumaui katoa loa le fale o Sakopo, E pati le Eteleno.

⁹ Talie ko leinei, e kau tuku loa aku fakatotonu, Ti e kau lui loa le fale o Iselaele i lotolotoga o atu puleaga fuli, Ofaipe le lulu o le one i se tami, Kae e leaise vilo loa se tegai laakau e tasi ki le kele.

¹⁰ E mamate loa a tagata agasala fuli o loku kakai i le seleta, Latou ala e pati : E leaise fakafeofi mai loa le malaia, e leaise kaku mai loa a ia kia tatou.

Fakafoou o Iselaele i temi fakamuli

¹¹ I le temi lena, e kau toe lagai loa i lana siga le fale o Tavite, E kau toe tapono loa ona pu, e kau toe fakatuu loa ona maumau, Ti e kau toe lagai loa a ia ofaipe lana tuu i le temi mua.

¹² O tupu ke lotou maua le toega o Etome ti mo atu puleaga fuli Ala kua kalagai ai loku suafa, E pati le Eteleno, leia e fakasoko ia loa a nea ana.

¹³ Ko leinei, e soko mai loa a aso, e pati le Eteleno, Ala e ano loa le tagata fakamaluu kele i muli o leia e tuuti ia le fulumeto, Ti ko leia e tatau ia le fuai vite, i muli o leia e muluki ia le pulapula, Ala e sali loa le vino foou mei mauga ofaipe ni tafe, Ti e sali loa a ia mei mauga liliki fuli.

¹⁴ E kau toe aumai loa le kau popula o loku kakai ko Iselaele. E lotou toe laga loa a kolo maumau, ti e lotou nonofo loa i ai. E lotou to loa ni vite ti e lotou inu loa lona vino. E lotou fai loa ni oloto ti e lotou kai loa lona fua.

¹⁵ E kau to loa latou i lolatou fenua, Ti e leaise toe taaki loa latou i le fenua leia na kau soli kia latou, E pati le Eteleno, lou Atua.