Amosi 8 - Tosi Tapu

Kete fuai laakau : Fakaoki o Iselaele

¹ Na fakasa mai loa e le Aliki, le Eteleno, le tio leinei kiate au : Ko leinei, ko se kete fuai laakau.

² Na pati loa a ia : Kolea e ke tio ki ai, Amosi ? Na kau tali loa : Ki se kete fuai laakau. Ti na pati mai loa le Eteleno kiate au : Kua soko mai le fakaoki ki loku kakai ko Iselaele ; E leaise kau toe fakamolemole loa kiate ia.

³ I aso ana, e liliu loa a sua o fale sau ko ni tagi laulau, E pati le Aliki, le Eteleno ; E laku fakalologo loa i ganea fuli ni mate mauke ai.

⁴ Kotou fakalogo mai ki le nea leinei, koutou ala e kai ia le kau mativa, Ti e maumaui ia le kau fakaaloalofa o le fenua !

⁵ E kotou pati : Ke oki vave la a aso lalasi o le masina foou, Kae feala ke motou toe fakatau lamatou fulumeto ! Ke oki vave la le sapato kae toe fakamavaa omatou fale tanaki fulumeto ! E motou fakaikiiki loa le kilo, kae motou siki loa lona totogi, E motou fakasalasala loa a fua ke kakaai.

⁶ Ti e motou totogi loa le kau fakaaloalofa ki se paaga Ti mo le tagata mativa ki se sa taka, Ti e motou fakatau loa le kili o le fulumeto.

⁷ Kua fakapapau le Eteleno i le kololia o Sakopo : E leaise kau toe galoi loa sana gaoi fua e tasi.

⁸ Pe leaise lulu loa le fenua o tupu ko latou ? Pe leaise tagi laulau loa le kakai katoa ? E pale ake loa le fenua katoa ofaipe se vaitafe, E malaga loa a ia ki aluga ti e toe ifo loa a ia ki lalo ofaipe le vaitafe o Esipito.

⁹ I le aso lena, e pati le Aliki, le Eteleno : E kau fakagalo ia loa le laa i le lalatea, Ti e kau fakaliliu loa ke pouli le malama nei i le loto malie o le ao ;

¹⁰ E kau fetogi loa okoutou aso lafeti ki ni aso mamae, Ti mo akoutou sua fakafiafia ki ni tagi laulau, E kau fakasulu loa ki vakavaka fuli ni taga, Ti e kau fakatula loa a ulu fuli ; E kau tuku loa le fenua ke tagi mamae ofaipe ki se vosa fuatasi, Ti e fai loa lona fakaoki pe se aso kona.

¹¹ Ko leinei, e soko mai loa a aso, e pati le Eteleno, Ala e kau kakau ai loa le oge ki le fenua, Leai le oge o le pane mo le fia inu o le vai, Kae le fia kai mo le fia inu ke logo ki folafola a le Eteleno.

¹² E lotou feanoaki loa mei le tasi a tai ki le tasi a tai, Mei le noleto ki le esite, E lotou ano saele loa o afa le folafola a le Eteleno, Kae e leaise lotou maua loa a ia.

¹³ I aso ana, e mamate loa a taineliki fulumalilie mo tamaliki tupulaga i le fia inu.

¹⁴ E lotou fakapapau loa i le atua fakalialia o Samalia, Ti e lotou pati : Ke mauli lou Atua, Tane ! Ke mauli le ala o Pele-Sepa ! Kae e lotou vivilo loa, ti e leaise lotou toe tutuu loa ki aluga.