Amosi 7 - Tosi Tapu

Kole a Amosi o uiga mo Iselaele

¹ Na fakasa mai loa e le Aliki, le Eteleno, le tio leinei kiate au : Ko leinei, na fai e ia ni seseivaka, I le temi leia na kamata sosomo ai le mutie ; I le oki o le uluaki tuuti leia na fai ki le sau.

² Na soko loa na kai e seseivaka le mutie katoa o le fenua, Ti na kau pati loa : Aliki Eteleno, fakamolemole ki lou kakai ! Pe toe tuu feaki loa Sakopo ? Talie e gaegae ai a ia !

³ Ti na fakasemala loa le Eteleno ki le nea lena. Ti na pati le Eteleno : E leaise soko loa le nea lena.

⁴ Na fakasa mai loa kiate au e le Aliki, le Eteleno, le tio leinei : Ko leinei, na fakasa e le Aliki, le Eteleno, le tautea ki le afi ; Ti na kai e le afi le vanu loloto, Ti na kai foki e ia le faisaga.

⁵ Na kau pati : Aliki Eteleno, taofi la ! Pe toe tuu feaki loa Sakopo ? Talie e gaegae ai a ia !

⁶ Ti na fakasemala loa le Eteleno ki le nea lena. Ti na pati loa le Aliki, le Eteleno : E leaise soko loa le nea lena ?

⁷ Na fakasa mai loa e ia le tio leinei kiate au : Ko leinei, na tuu le Aliki i se paa sako, Ti na too e ia se nivo i lona lima.

⁸ Na pati mai loa le Eteleno kiate au : Kolea e ke tio ki ai, Amosi ? Na kau tali loa : Ki se nivo. Ti na pati loa le Aliki : E kau tuku loa le nivo ki loto malie o loku kakai ko Iselaele, E leaise kau toe fakamolemole loa kiate ia.

⁹ E maumaui loa a ganea taualuga o Isaake ; E maumaui loa a sagatualio o Iselaele, Ti e kau tuu loa ki aluga mo le seleta ki le fale o Selopoamo.

Amosi mo le pelepitelo ko Amatesia

¹⁰ I le temi lena na fakasa loa e Amatesia, le pelepitelo o Petele, kia Selopoamo, sau o Iselaele : Kua agatuu Amosi kiate koe i loto malie o le fale o Iselaele ; ti e leaise koi mafai ke kataki e le fenua ana masau fuli.

¹¹ Talie ko leinei le nea na fakasa e Amosi : E mate loa Selopoamo i le seleta, ti e ave loa Iselaele o fakapopula ke mamao i lona fenua.

¹² Ti na pati loa Amatesia kia Amosi : Tagata o tio, ano kese, sola ki le fenua o Suta ; kai i ai lau pane, ti ke faikikite loa i ai.

¹³ Kae aua na ke toe soko atu lau faikikite i Petele, talie ko le fale tapu o le sau, ti ko se fale fakasau.

¹⁴ Ti na tali loa Amosi kia Amatesia : E leaise ko se polofeta au, pe ko se vosa au o se polofeta ; kae ko se tagata tausi manu au, ti e kau to ia ni sikomole.

¹⁵ Kae na too au e le Eteleno i muli o le kau manu, ti na pati mai loa le Eteleno kiate au : Ano, ti ke kikite ki loku kakai ko Iselaele.

¹⁶ Koia ke ke fakalogo mai ai i le lakaga nei ki le folafola a le Eteleno, a koe leia e pati : Aua na ke kikite ki le fenua ko Iselaele, ti aua na ke masau ki le fale o Isaake.

¹⁷ O tupu ko le nea lena, ko leinei le nea leia e fakasa e le Eteleno : E faiaga loa lou avaga i le kolo, ti e mamate loa ou vosa mo ou taineliki i le seleta, ti e vaevae loa lau faisaga ki le meta, ti ko koe, e ke mate loa i se kele pagani, ti e ave loa Iselaele o fakapopula o mamao mei lona fenua.