Amosi 6 - Tosi Tapu

Fakalialia mo le loto noa o le kau lalasi

¹ Malaia kia latou ala e mauli fakafulufulumalie i Sione, Ti e fimalie i le mauga o Samalia ! Ki kau lalasi ana o le uluaki o atu puleaga fuli, Latou ana e ano ki ai le fale o Iselaele !…

² Kotou ano ki Kalene ti kotou tio, Kotou fakakaku atu i lena ki Amati, le kolo lasi, Ti kotou ifo ki Kate ki le kau Filisitini : Pe malilie ake a kolo ana i okoutou puleaga e lua ? Pe lasi ake lolatou kele i lokoutou ?…

³ E kotou pati e kotou fakamamao le aso o le malaia, Kae e leai, kua kotou fakafeofi mai le pule o le tukipo.

⁴ E lotou malolo i ni palepale lei, E lotou moemoe fakafifimalie i olatou moeaga, E lotou kai a akeno o le kau manu A uviki pipi na fakagagako.

⁵ E lotou sua fakafiafia ki le musika, E lotou pati e lotou popoto i le fai musika ofaipe Tavite.

⁶ E lotou inu le vino i ni ipu lalasi, E lotou pani le lolo malie, Ti e leaise lotou mamae fua i le maumau o Sosefo !

⁷ Koia leia e taki ai loa latou i mua o le kau popula ; Ti e gato loa a kalaga fiafia a le kau fai lafeti lena !

⁸ Kua fakapapau le Aliki, le Eteleno, iate ia totonu ; Kua pati le Eteleno, le Atua o kau tau : E kau fakalialia ki le fia nealasi o Sakopo, Ti e kau vesia ki ona fale sau ; E kau tuku loa ki le fili le kolo mo nea fuli i loto.

⁹ Ti kapau e toe ni tagata e tino agafulu i se fale, e lotou mamate loa.

¹⁰ Ka too loa e se tasi o le famili se mate o tutu, Ti ka too loa e ia i le fale ona ivi, E pati loa a ia ki leia e nofo i muli o le fale : Pe koi toe se tasi mo koe ? Ti e tali loa le tagata lena : E leai se tasi… Ti e pati loa leia ake : fakaleemu ! E leaise ko le temi leinei ke too ai le suafa o le Eteleno.

¹¹ Talie ko leinei, kua fakatotonu e le Eteleno : E tuku loa e ia ke maofa le fale lasi, Ti ke maumau le fale ikiiki.

¹² Pe makape a osi i aluga o se utu ? Pe fakamaluu le kele i ai ki ni pipi ? Kolea kua kotou fetogi ai le loto sako ki se nea kona, Ti mo le fua o le faitotonu ki se laakau kona ?

¹³ E kotou fakafiafia ki le nea leia e noa, E kotou pati : Pe leaise ko lomatou makeke Leia na motou maua ai le malo ?

¹⁴ Koia leia e pati ai le Eteleno, le Atua o kau tau : Ko leinei, e kau lagai loa kia koutou, fale o Iselaele, Se puleaga leia e pule loa kia koutou mei le matapa o Amati O kaku ki le liua o le toafa.