Amosi 5 - Tosi Tapu

Fakasa o le tautea ; kalaga ki le fakasemala

¹ Kotou fakalogo mai ki le folafola leinei, Ki le tagi laulau leinei e kau sua kia koutou, Fale o Iselaele !

² Kua vilo a ia, e leaise toe tuu loa a ia ki aluga, Le taupoou o Iselaele ; Kua moe a ia ki le kele, E leaise toe fakatuu loa a ia ki aluga e se tasi.

³ Talie e folafola le Aliki, le Eteleno, o pati : Ko le kolo leia na ave ia ki le tau ni tagata e tino afe E maua ia fai se tino lelau. Ti ko le kolo leia na ave ia ki le tau se tino lelau, E maua ia fai se tino agafulu, ki le fale o Iselaele.

⁴ Talie e folafola le Eteleno ki le fale o Iselaele, o pati : Kotou afa au ! ti e kotou mauli loa !

⁵ Aua na kotou afa Petele, Aua na kotou ano ki Kilikale, Aua na kotou fakalaka i Pele-Sepa. Talie e popula loa Kilikale, Ti e liliu loa Petele ko se kolo maumau.

⁶ Kotou afa le Eteleno, ti e kotou mauli loa ! Kotou i na too e ia ofaipe se afi le fale o Sosefo, Ti na kai a ia e le afi lena, kae leai se tasi i Petele ke tamate ia le afi !

⁷ Talie kua kotou fakaliliu le lao ko se nea kona, Ti kua kotou takatakafi ki le kele le faitotonu !

⁸ Ko ia leia na fakatupu ia a fetuu o le Peleiate mo le Olione, Ko ia leia e fetogi ia le fakapouli o mafoata, Ko ia leia e fakaliliu ia le ao o pouli, Ko ia leia e kalagai ia a vai o le tai, Ti e fakamafola ia a ia i aluga o le kele : Ko le Eteleno ko lona igoa.

⁹ E lagai e ia le maumau ki le kau makeke, Ti e au le maumau ki kolo tau.

¹⁰ I le fakamaauaga e lotou vesia ki leia e mulimuli ki le faitotonu, Ti e lotou vesia ki le tagata fakamaoki leia e fakasa ia le maoki.

¹¹ Koia, talie na kotou takatakafi leia e fakaaloalofa, Ti na kotou too fakamakeke iate ia se fulumeto ko lana moliga, Na kotou fakatuu ia ni fale ki fatu ta, Kae e leaise kotou nonofo loa i ai ; Na kotou to ia ni vite malilie, Kae e leaise kotou inu loa lolatou vino.

¹² Talie, e kau iloa, e lasi akoutou agaveli, Kua liuliuga akoutou agasala ; E kotou fakamamae le tagata agatonu, e kotou tali ni nea alofa, Ti e leaise kotou fakamaau le kau mativa i le faitotonu.

¹³ Koia leia kua fakaleemu ai le tagata poto, i ni temi ofaipe temi nei, Talie kua veveli a temi nei.

¹⁴ Kotou afa le malie, kae aua le veli, o tupu ke kotou mauli, Ti ke nofo le Eteleno, le Atua o kau tau, mo koutou, Ofaipe le nea leia e kotou fakasa ia.

¹⁵ Kotou vesia ki le veli ti kotou alofa ki le malie, Kotou fakamaau i le faitotonu ; Ti e lagi alofa loa le Eteleno, le Atua o kau tau, Ki toetoega o Sosefo.

¹⁶ Koia leia e folafola ai le Eteleno, le Atua o kau tau, le Aliki, o pati : I malae fuli e tagi laulau loa, I ala fuli e pati loa : Oiau ! Oiau ! E kalagai loa le tagata gaoi kele ki le putu, Ti ke tagi laulau latou ala e sua ia ni laumate.

¹⁷ I vite fuli e tagi laulau loa, I le aso leia e kau fakalaka ai loa i loto malie o ou, e pati le Eteleno.

¹⁸ Malaia kia latou ala e oli ki le aso o le Eteleno ! Kolea le nea leia e kotou talitali ki ai i le aso o le Eteleno ? Ki se aso manuia ? Leai, talie ko se aso fakapouli.

¹⁹ E kotou fai loa pe se tagata leia e sola i mua o se laione, Ti e felavei loa mo se uluso, Pe leia e ano ki lona fale, o teki lona lima ki le paa, ti uuti e se gata.

²⁰ Pe leaise fakapouli le aso o le Eteleno, ti e leaise malama ? Pe leaise ko se aso fakapouli veli a ia, mo sala malama ?

²¹ E kau vesia, e kau fakalialia ki okoutou aso lalasi. E leaise koi kau fia sauga fua ki akoutou fakatasi.

²² Ka kotou momoli mai kiate au ni failaulau mo ni moliga, E leaise kau maua fua i ai se ga fiafia ; Ti ko uviki pipi gagako ala e kotou fai ki ai akoutou sakilifisio fakafetai, E leaise kau tio fua ki ai.

²³ Fakamamao iate au le logoa o akoutou katiko ; E leaise kau fakalogo ki le tagi o akoutou nea fai musika.

²⁴ Kae ke fai le loto sako pe se tafe, Ti mo le faitotonu pe se liua makeke leia e leaise toe masa i se aso.

²⁵ Pe na kotou fai mai kiate au ni failaulau mo ni moliga I fetuu e kau fa i le toafa, fale o Iselaele ?…

²⁶ Kotou ave le falela o lokoutou sau, Le tekiaga vae o okoutou taulaatua, Le fetuu o lokoutou atua Leia na kotou fau kia koutou.

²⁷ Ti e kau ave loa koutou o fakapopula i muli atu o Tamaso, E pati le Eteleno, leia ko lona igoa ko le Atua o kau tau.