Amosi 3 - Tosi Tapu

Kalaga ki le kakai ke fakakaukau

¹ Fanau o Iselaele, kotou fakalogo ki le folafola leinei na puaki e le Eteleno kia koutou, Ki le famili katoa leia na kau aumai mei le fenua o Esipito !

² Kua kau filifili koutou, koutou tefua i famili fuli o le malama nei ; Koia leia e kau tautea ai loa koutou o tupu ko akoutou agaveli fuli.

³ Pe saele fakatasi ni tagata e toka lua Kae e leikiaise la tonu tasi ?

⁴ Pe gugulu le laione i le vaomatua, Kae e leikiaise maua e ia sana nea kai ? Pe tagi le uviki laione i lona ana, Kae e leikiaise tapo e ia se manu ke kai ?

⁵ Pe vilo le manu lele ki le kupega leia e tuku i le kele, Kae e leikiaise fai se masele ? Pe malaga le kupega i le kele Kae e leikiaise piki i ai se nea ?

⁶ Pe pupusi le fakatagi pupusi i se kolo, Kae e leaise i le kakai ? Pe soko se malaia i se kolo, Kae e leikiaise fakataga e le Eteleno ?

⁷ Talie e leaise fai e le Aliki, le Eteleno, se nea e tasi, Kae e leikiaise fakasa e ia a ia ki ana tagata fakasausau ko le kau polofeta.

⁸ E gugulu le laione : Ko ai e leaise i loa ? E folafola le Aliki, le Eteleno : ko ai e leaise kikite loa ?

Agasala a Iselaele mo le tautea

⁹ Kotou fakagugulu okoutou leo i fale sau o Asetoti, Mo fale sau o le fenua o Esipito, Ti kotou pati : Kotou fakatasi ki mauga o Samalia, Ti kotou tio ki le maveuveu lasi i ai, Ti mo agamakeke i loto malie o ona !

¹⁰ E leaise lotou iloa le fai o le nea leia e totonu, e pati le Eteleno, E lotou tanaki fakatuuga i olatou fale sau a fua o le agamakeke mo le kaia.

¹¹ Koia e folafola ai le Aliki, le Eteleno, o pati : E ulu loa le fili ki le fenua, Ti e maumaui loa e ia lou makeke, Ti e kaia loa e ia ou fale sau.

¹² Koia e folafola ai le Eteleno, o pati : Ofaipe le tagata tausi manu e taaki ia i le gutu o le laione Ni vae e lua pe ko se koga o se taliga, E fenaaki loa le fakamauli o fanau o Iselaele ala e tonatona i Samalia, I le tifi o se palepale, i aluga o ni tapi mei Tamaso.

¹³ Kotou fakalogo, kotou fakasa le nea leinei ki le fale o Sakopo ! E pati le Aliki, le Eteleno, le Atua o kau tau :

¹⁴ I le aso leia e kau tautea ai loa Iselaele o tupu ko ana agasala, E kau taai loa a aletale o Petele ; E fatifati loa a tala o le aletale, O vivilo loa ki le kele.

¹⁵ E kau maumaui loa a fale o le temi momoko mo fale o le temi vevela ; E maumau loa a fale sau lei, E pupuli loa a fale o le kau lalasi, e pati le Eteleno.