Amosi 2 - Tosi Tapu

Kikite ki Moape, mo Suta, mo Iselaele

¹ Koia e folafola ai le Eteleno, o pati : O tupu ko agaveli e tolu a Moape, E fa foki, e leaise kau toe fetogi laku fakatotonu, Talie na tutu e ia o okioki a ivi o le sau o Etome.

² E kau kakau loa le afi ki Moape, Ti e kai loa e ia a fale sau o Kelisoti ; Ti e mate loa Moape i loto malie o le maveuveu, I loto malie o ni kalaga tau mo le tagi o fakatagi pupusi.

³ E kau tuuti loa i loto malie o Moape le tui fakamaau, Ti e kau tamate loa ona pule fuli mo ia, e pati le Eteleno.

⁴ E folafola ai le Eteleno, o pati : O tupu ko agaveli e tolu a Suta, E fa foki, e leaise kau toe fetogi laku fakatotonu, Talie na lotou maumaui le lao a le Eteleno, Ti na leaise lotou taupau ana fakatotonu, Talie na fakasese latou e taulaatua loi Ala na atolasio ki ai olatou tamana.

⁵ E kau kakau loa le afi ki Suta, Ti e kai loa e ia a fale sau o Selusalemi.

⁶ Koia e folafola ai le Eteleno, o pati : O tupu ko agaveli e tolu a Iselaele, E fa foki, e leaise kau toe fetogi loa laku fakatotonu, Talie na lotou fakatau le tagata agatonu ki se paaga, Ti mo le tagata mativa ki se sa taka.

⁷ E lotou loto ke tio ki le efu o le kele i le ulu o le kau fakaaloalofa, Ti e lotou tiaki le tagi a le kau mativa. E ano le vosa mo le tamana ki le taine e tasi, O tupu ke fakakelekele loku suafa maokioki.

⁸ E lotou momoe i tafa o aletale i ni kofu na tuku ake e le kau mativa kia latou, Ti e lotou inu i le fale o olatou atua le vino a latou ala e lotou fakatua.

⁹ Kae na kau maumaui i olatou mua le kau Amole, Ala na taualuga ofaipe ni sete, Ti na makeke ofaipe ni sene ; Na kau maumaui olatou fua i aluga, Ti mo olatou aka i lalo.

¹⁰ Kae na kau aumai koutou mei le fenua o Esipito, Ti na kau taki koutou i fetuu e kau fa i le toafa, Ke kotou maua le fenua o le kau Amole.

¹¹ Na kau lagai i okoutou vosa ni kau polofeta, Ti i okoutou tagata tupulaga ni kau nasilea. Pe na leaise soko maoki le nea lena, fanau o Iselaele ? e pati le Eteleno…

¹² Kae na kotou fakainu le vino ki le kau nasilea ! Ti na kotou tuku ki le kau polofeta le fakatotonu leinei : Aua na kotou faikikite !

¹³ Ko leinei, e kau takatakafi loa koutou, Ofaipe le taomi o le kele e se saliote kua apele i fui fulumeto.

¹⁴ Ko leia e mauvave e leaise mafai loa ke sola, Ko leia e makeke e leaise mafai loa ke fakaaoga ia lona makeke, Ti e leaise saofaki loa e le tagata toa lona mauli ;

¹⁵ Ko leia e too ia le kalolo e leaise mafai loa ke tuu, Ko leia e vae maamaa e leaise sao loa, Ti e leaise saofaki loa e le tagata ekeosi lona mauli ;

¹⁶ Ko le tagata leia e loto toa i le kau tau E sola telefua loa i le aso lena, e pati le Eteleno.