Amosi 1 - Tosi Tapu

Folafola ki Tamaso, mo Kasa, mo Tile, mo Etome, mo Amone

¹ Masau a Amosi, ko se tasi o le kau tausi manu o Tekoa, tio na maua loa e ia ki Iselaele, i le temi o Osiasi, sau o Suta, ti mo le temi o Selopoamo, vosa o Soasi, sau o Iselaele, fetuu e lua i mua o le mafuike.

² Na pati loa a ia : Mei Sione e gugulu le Eteleno, Mei Selusalemi e fakasa e ia lona leo. E tagi laulau a lotoa a le kau tausi manu, Ti kua malo le tumutumu o le Kalemelo.

³ Koia e folafola ai le Eteleno, o pati : O tupu ko agaveli e tolu a Tamaso, E fa foki, e leaise kau toe fetogi laku fakatotonu, Talie kua lotou takatakafi Kalaate ki ni saliote ukamea.

⁴ E kau kakau loa le afi ki le fale o Asaele, Ti e kai loa e ia a fale sau o Pene-Atate.

⁵ E kau fatifatii loa a fakamaumau o Tamaso, E kau tuuti loa i Pikate-Aveni ona kakai, Ti i Pete-Eteni leia e too ia le tokotoko fakasau ; Ti e ave loa le kakai o Silia o fakapopula i Kile, e pati le Eteleno.

⁶ Koia e folafola ai le Eteleno, o pati : O tupu ko agaveli e tolu a Kasa, E fa foki, e leaise kau toe fetogi laku fakatotonu, Talie na lotou too se kakai toka api o ave ki le popula i Etome

⁷ E kau kakau loa le afi ki paa o Kasa, Ti e kai loa e ia a fale sau.

⁸ E kau tuuti loa i Asetoti ona kakai, Ti i Asekaloni leia e too ia le tokotoko fakasau ; E kau fakamaliu loa loku lima ki Ekeloni, Ti e mate loa le toetoega o le kau Filisitini, e pati le Aliki, le Eteleno.

⁹ Koia e folafola ai le Eteleno, o pati : O tupu ko agaveli e tolu a Tile, Ti e fa foki, e leaise kau toe fetogi laku fakatotonu, Talie na lotou ave fakapopula se kakai toka api ki Etome, Kae na leaise manatui e ia le sai fakatautaina.

¹⁰ E kau kakau loa le afi ki paa o Tile, Ti e kai loa e ia ona fale sau.

¹¹ Koia e folafola ai le Eteleno, o pati : O tupu ko agaveli e tolu a Etome, Ti e fa foki, e leaise kau toe fetogi laku fakatotonu, Talie na kapu e ia ona fetaina ki le seleta, Ti na tapono e ia lona manava alofa, Talie e sae tuumau aifai lona ita, Ti e taupau tuumau aifai e ia lona itaita.

¹² E kau kakau loa le afi ki Temane, Ti e kai loa e ia a fale sau o Potesela.

¹³ Koia e folafola ai le Eteleno, o pati : O tupu ko agaveli e tolu a fanau o Amone, Ti e fa foki, e leaise kau toe fetogi laku fakatotonu, Talie na lotou paipaisi a manava o fafine tinae o Kalaate, O tupu ke fakalasi lolatou fenua.

¹⁴ E kau kakau loa le afi ki paa o Lapa, Ti e kai loa e ia ona fale sau, I loto malie o ni kalaga tau i le aso o le tau, I loto malie o le asesio i le aso o le afa ;

¹⁵ Ti e ano loa lolatou sau ki le popula, A ia mo lana kau pule, e pati le Eteleno.