Akeseo 2 - Tosi Tapu

Le kololia o le fale tapu i le temi ka au

¹ I le aso kau lua tupu tasi o le masina fitu, na fakasa loa le folafola a le Eteleno ia Akeseo, le polofeta, o pati :

² Masau kia Solopapele, vosa o Saletiele, ko le kovana o Suta, mo Sosue, vosa o Sotesatake, le tagata faisakilifisio lasi, ti mo le toega o le kakai, o pati kia latou :

³ Pe i ai se tasi ia koutou ala koi mauli Na tio ki le fale leinei i lona kololia uluaki ? Ti kolea le nea kua kotou tio ki ai i le aso nei ? I lana tuu leinei, pe leaise fai a ia kia koutou pe se nea noa ?

⁴ I temi nei ke ke lotomakeke, Solopapele ! e folafola le Eteleno. Ke ke lotomakeke, Sosue, vosa o Sotesatake, pule faisakilifisio ! Ke ke lotomakeke, kakai katoa o le fenua ! e pati le Eteleno. Ti ke kotou gaoi ! Talie e kau nofo mo koutou.

⁵ E kau agatonu ki le sai leia na kau fai mo koutou I le aso leia na kotou mavae ai i Esipito, Ti e nofo loku Laumalie i loto malie o koutou ; Aua na kotou i !

⁶ Talie e folafola le Eteleno o kau tau : Koi toe fua se ga temi ikiiki, Ti e kau luui loa le atu lagi mo le malama nei, Le tai mo le kele malo.

⁷ E kau luui loa a atu puleaga fuli ; E aumai loa a koloa o atu puleaga fuli, ti e kau fakaapele loa ki le kololia le fale leinei, E pati le Eteleno.

⁸ A aku le paaga, ti a aku le aulo, E pati le Eteleno o kau tau.

⁹ E lasi ake loa le kololia o le fale fakamuli leinei I le kololia o le uluaki fale, E pati le Eteleno o kau tau ; Ti ko le ganea leinei e kau tuku ai loa le tokamalie, E pati le Eteleno o kau tau.

E tonu ke fakamea le kakai

¹⁰ I le aso kau lua tupu fa o le masina iva, i le lua o fetuu o Taliusi, na fakasa loa le folafola a le Eteleno ia Akeseo, le polofeta, o pati :

¹¹ E folafola le Eteleno o kau tau : Fai ki le kau faisakilifisio le vesili leinei o uiga mo le lao :

¹² Kapau e ave loa e se tasi i le tapatapa o lona kofu se ga inati kua fakatapui, ti e lave loa lona kofu ki se pane, mo ni nea kai, mo se vino, mo se lolo, pe ko se tasi ake nea kai, pe liliu loa a nea ana o maokioki ? Ti na tali loa le kau faisakilifisio : Leai !

¹³ Ti na pati loa Akeseo : Kapau kua kelekele loa se tagata o tupu ko se mate, ti e fafa loa a ia ki nea fuli ana, pe kelekele loa a nea kai ana ? Ti na tali loa le kau faisakilifisio : E io, e lotou kelekele loa.

¹⁴ Ti na toe masau loa Akeseo, o pati : Ko le anoaga a ia o le kakai leinei, ko le anoaga a ia o le puleaga leinei i oku mua, e pati le Eteleno, Ko le anoaga a ia o gaoi fuli o olatou lima ; Ko le nea leia e lotou momoli mai kiate au e kelekele.

¹⁵ Koia ke kotou fakakaukau malie Ki le nea leia kua soko o kaku mai ki le aso nei, I mua o le teki o fatu o le fale o le Eteleno !

¹⁶ I le temi a ia, ka ano se tasi ki se tuuga fulumeto ke asu mai ni fua e kau lua, Na maua fai e ia ni fua e kau agafulu ; Ka ano se tasi ki le poe vino ke asu mai ni fua vino e kau lima, Na maua fai e ia ni fua e kau lua.

¹⁷ Na kau tautea koutou ki le kelemea, Mo le manua, ti mo le ua fatu aisi ; Na kau maumaui a gaoiaga fuli o okoutou lima. Kae logo ai a nea ana, na leaise kotou toe liliu mai kiate au, e pati le Eteleno.

¹⁸ Kotou fakakaukau malie Ki le nea leia kua soko o kaku mai ki le aso nei, O kaku mai ki le aso kau lua tupu fa o le masina iva, Talu mei le aso leia na fakavae ai le fale o le Eteleno, Kotou fakakaukau malie ki ai !

¹⁹ Pe na koi i ai se pulapula i okoutou fata ? Tatau foki mo le vite, mo le fiki, mo le kelenati, ti mo le oliveto, Na leaise tuku ia se nea fua e tasi. Kae i le aso nei e kau liligi loa laku tapuakina.

Filifili o Solopapele

²⁰ Na fakasa loa le folafola a le Eteleno ia Akeseo, ko lona tua lua a ia, i le aso kau lua tupu fa o le masina, i kupu anei :

²¹ Masau kia Solopapele, kovana o Suta, o pati : E kau luui loa le atu lagi mo le kele ;

²² E kau maumaui loa le ekeekeaga fakasau o atu puleaga, E kau maumaui loa le makeke o atu puleaga, E kau maumaui loa a saliote tau mo latou ala e eke ai ; E tamate loa a osi mo tagata eke osi, Leia e le seleta a le leia ake.

²³ I le aso lena, e pati le Eteleno o kau tau, E kau too loa a koe, Solopapele, vosa o Saletiele, Laku tagata fakasausau, e pati le Eteleno, Ti e kau taupau loa a koe ofaipe se fakamailoga ; Talie na kau filifili a koe, e pati le Eteleno o kau tau.