Akeseo 1 - Tosi Tapu

Fakamakeke o le kakai ke toe laga le fale tapu

¹ I le lua fetuu o le sau ko Taliusi, i le uluaki aso o le masina ono, na tuku loa le folafola a le Eteleno ki le polofeta ko Akeseo, mo Solopapele, vosa o Saletiele, kovana o Suta, kia Sosue, vosa o Sotesatake, tagata faisakilifisio lasi, i kupu anei :

² E folafola le Eteleno o kau tau : E pati le kakai leinei : E leikiaise soko mai le temi, le temi ke toe laga ai le fale o le Eteleno.

³ Koia na tuku ai le folafola a le Eteleno kia latou ia Akeseo, le polofeta, i kupu anei :

⁴ Pe ko le temi leinei ke kotou nonofo ai i okoutou fale aofi papa, Kae kua maumau le fale leinei ?

⁵ Koia e folafola ai i le aso nei le Eteleno o kau tau, o pati : Kotou fakakaukau ki okoutou ala !

⁶ Kua lasi lakoutou muluki, kae kotou utu ikiiki, E kotou kai, kae e leaise kotou makokona, E kotou inu, kae e leaise kotou mau, E kotou kofu, kae e leaise kotou mafana, Ko le totogi o leia e gaoi paaga, E vilo ki se taga pu.

⁷ Koia e folafola ai le Eteleno o kau tau : Kotou fakakaukau malie ki okoutou ala !

⁸ Kotou pale ki le mauga, kotou aumai ni laakau, Ti kotou laga le fale : E kau maua loa i ai loku fiafia, ti e kau kololia ai loa, E folafola le Eteleno.

⁹ Na kotou amanaki ki se nea lasi, Kae ko leinei e kotou maua se ganea ikiiki fua ; Na kotou fakaulu a ia ki okoutou fale, kae na kau pusii a ia. Kolea lona tupuaga ? e pati le Eteleno o kau tau. O tupu ko loku fale, leia kua maumau, Kae kua kotou feoso le tagata ki lona fale.

¹⁰ Koia kua fakafiti ai e le lagi lona sasau kia koutou, Ti kua taofi ai e le kele ona fua.

¹¹ Na kau kakau mai le taulaa ki le fenua, mo mauga, Mo le fulumeto, mo le vino, mo le lolo, Mo nea fuli ala e feala ke maua mei le kele, Mo tagata mo manu, Ti mo gaoiaga fuli o lima.

¹² Ko Solopapele, vosa o Saletiele, mo Sosue vosa o Sotesatake, le tagata faisakilifisio lasi, ti mo le toega fuli o le kakai, na logo loa ki le leo o le Eteleno, lolatou Atua, ti mo folafola a Akeseo, le polofeta, o mulimuli ki le kauga leia kua tuku kiate ia e le Eteleno, lolatou Atua. Ti na maua loa e le kakai se i ki le Eteleno.

¹³ Na pati loa Akeseo, le tagata fakasausau a le Eteleno, ki le kakai, o mulimuli ki le fakatotonu a le Eteleno : e pati le Eteleno : E kau nofo mo koutou.

¹⁴ Na fafagu loa e le Eteleno le laumalie o Solopapele, vosa o Saletiele, kovana o Suta, ti mo le laumalie o Sosue, vosa o Sotesatake, le tagata faisakilifisio lasi, ti mo le laumalie o le toega katoa o le kakai. Na lotou au loa, ti na lotou kamata loa le gaoi i le fale o le Eteleno o kau tau, lolatou Atua,

¹⁵ i le aso kau lua tupu fa o le masina ono, i le lua o fetuu o le sau ko Taliusi