Lua tosi ki le kau Tesalonika 3 - Tosi Tapu

Faikole mo gaoi

¹ Fakaoki loa, fetaina, kotou ulufaki matou, o tupu ke mafola le folafola a le Aliki, ti ke fakakololiai a ia, ofaipe lona fai ia koutou,

² ti ke motou sao mei tagata itaita mo agaveli, talie e leaise tali e tagata fuli le tui.

³ E agatonu le Aliki, e fakamakeke loa e ia koutou, ti e puipui loa e ia koutou mei leia e veli.

⁴ E motou fanaki i le Aliki kia koutou e kotou fai ti e kotou fai loa a nea ala e motou fakatotonu atu kia koutou.

⁵ Ke takitaki e le Aliki okoutou loto ki le alofa o le Atua ti mo le kataki fualoa o Kilisito !

⁶ E motou kole mamae atu, fetaina, i le igoa o lotatou Aliki ko Sesu-Kilisito, ke kotou fakamamao mei fetaina fuli ala e mauli i le gasueveli kae e leaise mulimuli ki fakatotonu ala kua kotou maua meia matou.

⁷ E kotou iloa e koutou totonu le faifaitaki mai kia matou, talie na leaise motou mauli ia koutou i le gasueveli.

⁸ Na leaise motou kai noa se pane a se tasi, kae i le gaoi ti mo le pakia, na motou gaoi i le po mo le ao, o tupu ke aua na motou liliu ko se kavega ki se tasi ia koutou.

⁹ Na leaise tupu talie na tapui kia matou, kae na motou fia tuku atu kia koutou ia matou totonu se faifaitakiaga ke kotou faifaitaki ki ai.

¹⁰ Talie i le temi leia na motou nonofo ai ia koutou, na motou fakasa fakaagatonu atu kia koutou : Kapau e leaise fia gaoi se tasi, ke aua na kai foki a ia.

¹¹ Kae e motou logo e i ai ni iki ia koutou e mauli i le gasueveli, e leaise lotou gaoi, kae e lotou tokaga ki nea ala e leaise lotou kau ai.

¹² E motou fakaafe latou ana, ti e motou kole kia latou i le Aliki ko Sesu-Kilisito, ke lotou kai lalatou pane totonu, o gaoi i le tokamalie.

¹³ Kia koutou, fetaina, aua na kotou kaekae i le fai o le malie.

¹⁴ Ti kapau e leaise fakalogo se tasi ki le nea leia e motou fakasa atu i le tosi leinei, kotou fakamaumau a ia, ti aua na kotou toe fakatasi loa mo ia, o tupu ke luma ai.

¹⁵ Aua na kotou tio kiate ia ofaipe se fili, kae kotou fai kiate ia se valoki ofaipe se taina.

Tapuaki mo fakaalofa

¹⁶ Ke alofa le Aliki o le tokamalie o soli totonu kia koutou le tokamalie i temi fuli, i nea fuli ! Ke nofo le Aliki mo koutou fuli !

¹⁷ E kau fakaalofa atu kia koutou, a au Paulo, i loku lima totonu. Ko lena laku fakamailoga i aku tosi fuli ; e fenaaki loa laku fai tosi.

¹⁸ Ko le kalasia o lotatou Aliki ko Sesu-Kilisito ke nofo mo koutou fuli !