Lua tosi ki le kau Tesalonika 2 - Tosi Tapu

Le sa o le tagata veli

¹ O uiga mo le toe liliu mai o lotatou Aliki ko Sesu-Kilisito ti mo latatou fakatasi mo ia, e motou kole atu, fetaina,

² ke aua na gaga faigaofie lakoutou fakakaukau, ti ke aua na kotou oso noa, o tupu ko se tio fakalaumalie, pe ko se kikite, pe ko se tosi sii meia matou, o sakinake kua soko le aso o le Aliki.

³ Ke aua na kakai koutou e se tasi i se nea fua ; talie e tonu ke soko le aposetasia i mua ti ke fakasa le tagata o le agasala, ko le vosa o le malaia,

⁴ le tagata agatuu leia e malaga i aluga o nea fuli ala e igoa ko Atua, pe ko nea fuli ala e atolasio ki ai ; ti e kaku a ia o nofo ofaipe le Atua i le fale tapu o le Atua, o fakasa a ia ko le Atua.

⁵ Pe leaise kotou manatui na kau fakasa atu a nea ana kia koutou i le temi leia na kau nofo ai mo koutou ?

⁶ Ti e kotou iloa le nea leia e taofi ia a ia i le temi nei, o tupu ke sa a ia i lona temi totonu.

⁷ Talie kua gaoi nei le misitelio o le agasala ; e tonu fua ke puli leia e taofi ia a ia i le temi nei.

⁸ Ti ka oki a ia, e sa loa le tagata Agaveli, leia e tamate loa e le Aliki Sesu ki le tukumanava o lona gutu, ti mo maumaui loa ki le gigila o lana toe liliu mai.

⁹ E fai loa le sa o le tagata agatuu lena i le makeke o Satana, i ni milakulo kesekese, mo ni fakamailoga, ti mo ni nea fakamanamana loi,

¹⁰ ti mo kaka fuli o le agasala kia latou ala e mamate, o tupu na leaise lotou tali le alofa ki le maoki, ke fakamauli ai latou.

¹¹ Koia e kakau ai loa e le Atua se makeke kaka kia latou, o tupu ke lotou tui ki le loi,

¹² ti ke tautea ai latou fuli ala na leaise tui ki le maoki, kae na fiafia ki le lee agatonu.

Fakamakeke o le kau Tesalonika

¹³ Kia matou, fetaina alofaina i le Aliki, e tonu ke motou fakafetai tuumau ki le Atua o tupu ko koutou, talie kua filifili koutou e le Atua talu mei le kamataaga ki le saofaki, i le fakamea a le Laumalie ti mo le tui ki le maoki.

¹⁴ Ko le nea lena na kalagai e ia koutou ki ai i lamatou Evaselio, o tupu ke kotou maua le kololia o lotatou Aliki ko Sesu-Kilisito.

¹⁵ Koia, fetaina, kotou tuu makeke, ti kotou taofi a akonaki ala kua kotou tali, pe i lamatou folafola, pe i lamatou tosi.

¹⁶ Ko lotatou Aliki ko Sesu-Kilisito totonu, ti mo le Atua ko lotatou Tamana, leia na alofa kia tatou, ti na soli ia kia tatou i lona kalasia se fakapelepele lee gato ti mo se amanaki malie,

¹⁷ ke fakapelepele ia okoutou loto mo fakamakeke ia koutou i gaoi malilie fuli ti mo masau malilie fuli !