Lua tosi ki le kau Tesalonika 1 - Tosi Tapu

Fakaalofa

¹ Ko Paulo, mo Silivano, ti mo Timoteo, ki le Ekelesia o le kau Tesalonika, leia nonofo i le Atua ko lotatou Tamana ti mo Sesu-Kilisito ko le Aliki :

² Ko le kalasia mo le tokamalie ke soli atu kia koutou e le Atua ko lotatou Tamana ti mo le Aliki ko Sesu-Kilisito !

Nea ka soko i le toe liliu mai o le Aliki

³ E tonu, fetaina, ke motou fakafetai tuumau ki le Atua o tupu ko koutou, ti e totonu le nea lena, talie e saele lasi ki mua lakotou tui, ti e tuputupua lokoutou fealofani fakatautaina.

⁴ Koia e motou fakakololia ai o tupu ko koutou i Ekelesia o le Atua, i lokoutou kataki fualoa ti mo lakoutou tui i loto malie o fakaveliveli ti mo mamae ala e tonu ke kotou tali.

⁵ Ko le fakamaoki lena o le fakamaau faitotonu o le Atua, o tupu ke lau kotou e kotou gali mo le Puleaga o le Atua, leia e kotou mamae ai.

⁶ Talie e faitotonu le Atua ke totogi le mamae kia latou ala e fakamamae ia koutou,

⁷ kae ke soli atu kia koutou, ala e mamae nei, le malolo mo matou, mo ka sa mai loa le Aliki ko Sesu mei le lagi mo le kau aselo o lona mafimafi,

⁸ i loto malie o se ulai afi, ke tautea ai latou ala e leaise iloa ia le Atua ti mo latou ala e leaise fakalogo ki le Evaselio o lotatou Aliki ko Sesu.

⁹ E tautea loa latou ki se maumau lee gato, o mamao mei mata o le Aliki ti mo le kololia o lona makeke,

¹⁰ mo ka au loa a ia i le aso a ia ke fakakololiai a ia i lana kau sagato, ti ke tio kiate ia latou fuli ala na tui kiate ia ; talie kua kotou tui ki lamatou fakamaoki ia koutou.

¹¹ Koia foki leia e motou faikole tuumau ai kia koutou, o tupu ke lau koutou e lotatou Atua e kotou gali mo lana kalaga, ti ke fakasoko e ia i lona mafimafi a fakatuutuu malilie fuli o lona agamalie, ti ke fakakatoa e ia le gaoi o lakoutou tui ;

¹² Ti e fakakololiai loa le suafa o lotatou Aliki ko Sesu ia koutou, ti e fakakololiai loa koutou iate ia, o fakatatau ki le kalasia o lotatou Atua ti mo le Aliki ko Sesu-Kilisito.