Lua tosi ki le kau Kolinto 9 - Tosi Tapu

4) Tapuakina o le soli i le loto malie

¹ E leaise aoga ke kau fai tosi atu kia koutou o uiga mo le tokoi ki le kau sagato.

² Talie e kau iloa lokoutou loto malie, leia e kau fakakololia ai ia koutou ki le kau Masetonia, o kau pati kia latou kua tokamalie Akaia mei le fetuu kua sili ; ti ko lokoutou oli fakamalotoloto na lagai ia le toka api.

³ E kau kakau atu a fetaina, o tupu ke aua na ano noa le fakavikiviki leia na ma fai kia koutou i le nea lena, kae ke kotou nonofo teuteu, ofaipe le nea leia na kau fakasa atu kia latou.

⁴ Talie e leaise kau loto loa, mo ka ma natu mo ni iki o le kau Masetonia, ke lotou maua atu koutou e leikiaise kotou tokamalie, ti ke liliu le fanaki lena ko se luma kia maua, ke aua na pati ko se luma kia koutou.

⁵ Koia na kau manatu ai e aoga ke kole ki fetaina ke muamua atu kia koutou, o tanaki lokotou nea alofa, leia na kotou tomua fakapapau ki ai, o tupu ke tokamalie a ia, ti ke fai a ia pe se alofa maoki, kae leaise pe se fulupipiki.

⁶ Ke kotou iloa, ko leia e muluki fakaikiiki, e tau fakaikiiki loa, ti ko leia e muluki lasi, e tau lasi loa.

⁷ Ke soli e le tagata taki toka tasi o mulimuli ki le nea leia kua fakapapau ki ai i lona loto, kae leai i le loto mamae, pe i le fakamaua, talie e alofa le Atua ki leia e soli fiafia.

⁸ Ti e mafai e le Atua lana fakaapele koutou ki ona kalasia fuli, o tupu ke kotou maua tuumau a nea fuli ala e aoga kia koutou, ti ke kotou toe maua foki o fakalaka ki gaoi malilie fuli,

⁹ o mulimuli ki le nea leia e tuu i le tosi : Na tufa e ia ona nea alofa, Na soli e ia ki le kau mativa ; Etuu lona agatonu o lee gato.

¹⁰ Ko leia E soli ia se fakaili ki le tagata gaoi kele, Ti mo se pane ki lana nea kai, E soli ia loa kia koutou ti mo liuliuga ia loa kia koutou le fakaili, ti e fakalasi loa e ia a fua o akoutou gaoi malilie fuli.

¹¹ Ti e fakamoukoloa loa e ia koutou i nea fuli ki le fai o nea alofa kesekese, ala e fakatupu ia loa ni fakafetai ki le Atua ia maua.

¹² Talie ko le gaoi malie lena e kotou fai ia, e leaise gato fua i le soli o nea ala e aoga ki le kau sagato, kae ko se matapuna lasi foki a ia o ni fakafetai lasi ki le Atua.

¹³ I le tio loa ki le tokoi lena kia latou, e lotou fakakololia loa ki le Atua o uiga mo lakoutou fakalogo ki le fakasa o le Evaselio a Kilisito, ti mo lokotou alofa lasi o vaevae okoutou koloa mo latou ti mo le kakai katoa ;

¹⁴ e lotou ulufaki koutou, talie e lotou alofa kia koutou o tupu ko le kalasia mauiga leia kua fai e le Atua kia koutou.

¹⁵ Ke fakafetai ki le Atua, o tupu ko lona nea alofa fulumalie ai !