Lua tosi ki le kau Kolinto 6 - Tosi Tapu

Fakataulalo mo le agatonu o Paulo

¹ Talie e ma kaukau gaoi mo le Atua, e ma fakakolekole foki kia koutou ke aua na kotou tuku ke to noa le kalasia o le Atua.

² Talie e pati i le Tosi : I le temi faigamalie na kau tali a koe, Ile aso o le fakamauli na kau tokoi kiate koe. Tio, ko leinei le temi faigamalie ; Tio, ko leinei le aso o le fakamauli.

³ E leaise ma loto ke siga se tasi i se nea, o tupu ke aua na liliu le gaoi ko se nea fakatupu lauveli.

⁴ Kae e ma faiga ke ma malie kia koutou i nea fuli, ofaipe ni tagata fakasausau a le Atua, i se kataki fualoa i mamae, i mativa, i tutamaki,

⁵ i sasa, i pilisoni, i maveuveu, i gaoi pakia, i alaala pouli, i sesunio ;

⁶ i le maokioki, i le iloa, i le kataki fualoa, i le agamalie, i le Laumalie Maokioki, i le alofa maoki,

⁷ i le folafola o le maoki, i le makeke o le Atua, i masafu tau mo masafu tali tau o le maokioki ;

⁸ i loto malie o le kololia mo le matagafua, i loto malie o le logologona malie mo le logologona veli ; ofaipe ni tagata kaka, kae e ma maoki ;

⁹ ofaipe ni tagata e leaise iloa, kae e iloa malie maua ; ofaipe ni tagata kua mamate, ti ko leinei e ma mauuli ; ofaipe ni tagata e tautea, kae e leaise tamate ;

¹⁰ ofaipe ni tagata e loto mamae, kae e ma fiafia tuumau ; ofaipe ni mativa, kae e ma fakakoloa ia le toka api ; ofaipe ni tagata e leaise maua ia ni nea, logo ai e ma maua a nea fuli.

Kalaga ki le mavae mo le fakamea

¹¹ Kua mavaa atu oma gutu kia koutou, kau Kolinito, kua fakamavaa fakalaulasi atu kia koutou oma loto,

¹² e leaise kotou kopi ia fua i ai, kae ko lokoutou loto leia kua lau ikiiki kia maua.

¹³ Ke kotou liufaki mai kia maua le tatau, E kau masau atu kia koutou ofaipe ki ni aku fanau totonu, Kotou fakalaulasi foki lokoutou loto !

¹⁴ Aua na kotou kau fakatasi mo le kau lee agatonu i lalo o se laakau taki kese. Talie e fakatasi feaki le maokioki mo le agasala ? Pe fakatasi feaki le malama mo le fakapouli ?

¹⁵ Pe kau fakatasi feaki Kilisito mo Peliale (Satana) ? Pe vaega tasi leia e tui mo leia e lee tui ?

¹⁶ Ko le nea fea leia e fakatasi ai le fale tapu o le Atua mo taulaatua ? Talie ko le fale tapu tatou o le Atua mauli, ofaipe le pati a le Atua : E kau nofo loa ti e kau saele loa i loto malie o latou ; e kau liliu loa ko lolatou Atua, ti e lotou liliu loa ko loku kakai.

¹⁷ Koia e pati ai le Aliki : Kotou au kese meia latou, Ti kotou mavae kese, e pati le Aliki ; Aua na kotou fafa ki le nea leia e kelekele, Ti e kau tali loa koutou.

¹⁸ E kau fai loa kia koutou pe se Tamana, Ti e kotou fai loa kiate au pe ni vosa mo ni taineliki, Efolafola le Aliki mafimafi.