Lua tosi ki le kau Kolinto 5 - Tosi Tapu

Fakaamu a Paulo

¹ Talie e ma iloa, ka maumaui loa le falela leinei leia e ma nonofo ai i le malama nei, e ma maua ia loa i le lagi se fale leia na fai e le Atua, ko se nofoaga lee gato leia na leaise fai e le lima o tagata.

² Talie ma lauga i le falela leinei, o oli lasi ke ma kofu loma nofoaga mei Selo,

³ mo ka maua mai maua e ma kofu, kae leaise ma telefua.

⁴ Talie i le temi katoa leia e ma nonofo ai i le falela leinei, e ma lauga i le mafaia, talie e ma loto, ke aua na tatala oma kofu fakakele, kae ke ma kofu oma tino fakaselo, o tupu e folo le nea leia e mate e le mauli.

⁵ Ti ko leia kua teuteui ia maua ki le nea lena, ko le Atua, leia kua soli ia foki kia maua a fakamaoki o le Laumalie.

⁶ Koia e ma apele tuumau ai i le fanaki, ti e ma iloa i la ma nonofo i le tino leinei e ma nonofo mamao mei le Aliki,

⁷ talie e ma saele i le tui, kae leai i le tio ;

⁸ e ma apele i le fanaki, ti e ma malie ia ake lama mavae i le tino leinei, o nonofo mo le Aliki.

⁹ Koia foki leia e ma faiga ai ke ma malilie kiate ia, pe ma nonofo i le tino leinei, pe ma mavae i ai.

¹⁰ Talie e tonu ke tou tutuu fuli i mua o le fakamaauaga a Kilisito, o tupu ke tali e le tagata taki toka tasi o mulimuli ki le malie mo le veli leia na fai i le tino.

Gaoi o le fakatokatoka

¹¹ I lama iloa le sausau o le Aliki, e ma faiga ke fakalotoi a tagata ; e iloa maua e le Atua, ti e kau amanaki e kotou iloa foki maua i okoutou loto.

¹² Talie e leaise ma fia mata malie atu kia koutou, kae e ma tuku atu kia koutou le faigamalie ke kotou fakakololia ai o tupu ko maua, ti ke kotou maua ai se tali kia latou ala e fakakololia i nea ala e sa i tafa kae e leaise au mei le loto.

¹³ Talie, kapau kua kau valea, ti e tupu ko le Atua ; kapau e kau poto, ti e tupu ko koutou.

¹⁴ Talie e ekenaki maua e le alofa o Kilisito, talie e ma iloa kapau na mate se toka tasi ki tagata fuli, ti na mamate a tagata fuli ;

¹⁵ ti na mate a ia ki tagata fuli, o tupu ko latou ala e mauuli ke aua na lotou mauli kia latou totonu, kae ki leia na mate ti na toe tuuake o tupu ko latou.

¹⁶ Koia, i le temi nei, e leaise ma iloa ai se tasi fua i le kanofi ; ti kapau na ma iloa Kilisito i le kanofi, i le temi nei e leaise koi ma iloa a ia i le fai lena.

¹⁷ Koia kapau e nofo se tasi ia Kilisito, ko se keleatula foou a ia : kua puli a nea afea ; ko leinei kua liliu a nea fuli o foou.

¹⁸ Ti ko nea fuli ana e au mei le Atua, leia na fakatokatoka ia tatou mo ia ia Kilisito, ti na soli ia kia tatou le gaoi o le fakatokatoka.

¹⁹ Talie na nofo le Atua ia Kilisito, o fakatokatoka ia le malama nei mo ia totonu, o leaise lau ki tagata alatou agasala ; ti kua tuku e ia kia maua le folafola o le fakatokatoka.

²⁰ Ti ko leinei, e ma fai a gaoi a tagata fakafofoga o Kilisito, o sakinake e fakakolekole le Atua ia maua ; e ma kolekole atu kia koutou i le igoa o Kilisito : Kotou fakatokatoka mo le Atua !

²¹ Ko leia na leaise iloa ia le agasala, na fakaliliu a ia e le Atua ko le agasala kia tatou, o tupu ke tou liliu iate ia ko le faitotonu a le Atua.