Lua tosi ki le kau Kolinto 4 - Tosi Tapu

¹ Koia, i lama maua le gaoi lena o mulimuli ki le manavaalofa leia na tuku mai kia maua, e leaise ma loto gaegae.

² Kae kua ma tiaki a nea fakalumaluma ala e fai fakafufu, ti e leaise ma fai ia ni nea fakakaka, ti e leaise ma fulusi ia le folafola a le Atua. Kae e ma fakasa ia le maoki, ti e ma tuku ia maua ki le loto o tagata fuli i mua o le Atua.

³ Kapau koi fakapulou lama Evaselio, ti e fakapulou a ia kia latou ala e mamate,

⁴ ki le kau tui gataa ala kua fakakivi olatou mata e le atua o le sekulo leinei, o tupu ke aua na lotou tio ki le gigila o le malama o le Evaselio o le kololia o Kilisito, leia ko le paaki o le Atua.

⁵ E leaise ma akonaki kia maua totonu ; ko le Aliki ko Sesu-Kilisito leia e ma akonaki ki ai, ti e ma pati ko akoutou tagata fakasausau maua o tupu ko Sesu.

⁶ Talie ko le Atua leia na pati, ke mu le malama i le fakapouli ! ti kua fakamu le malama lena i otatou loto ke fakagigila ai le iloa o le kololia o le Atua i mata o Kilisito.

Ko se koloa i loto o ni ipu kele

⁷ E ma amo le koloa lena i ni ipu kele, o tupu ke tuku le makeke lasi lena ki le Atua, kae leai kia maua.

⁸ Talie kua taomi maua e mamae kesekese, kae leaise ma taomia ; tuania, kae leaise loto gaegae ;

⁹ fakavelivelii, kae e leaise tiaki ; ti ki le kele, kae leaise tamate.

¹⁰ E ma fafa tuumau i oma tino le mate o Sesu, o tupu ke fakasa foki le mauli o Sesu i oma tino.

¹¹ Talie ko maua ala e mauuli, e tuku tuumau maua ki le mate o tupu ko Sesu, o tupu ke fakasa foki le mauli o Sesu i oma tino mate gaofie.

¹² Koia e gaoi ai le mate ia maua, kae gaoi le mauli ia koutou.

¹³ Ti e tupu e tou maua foki le Laumalie e tasi o le tui leia na fakasa i kupu anei o le Tosi : Na kau tui, koia kua kau masau ai ! Kua ma tui foki, ti koia kua ma masau ai,

¹⁴ o ma iloa ko leia na toe fakatuuake ia le Aliki ko Sesu, e toe fakatuuake ia loa maua foki mo Sesu, ti e fakasa loa e ia maua mo koutou i ona mua.

¹⁵ Talie e soko a nea fuli ana ko koutou, o tupu ke liuliuga le kalasia leia e fakalasi ia a fakafetai a se toka api ki le kololia o le Atua.

Mamae o le temi nei mo le kololia o le temi ka au

¹⁶ Koia e leaise ma loto gaegae ai. Ti kapau foki e maumau loma tagata i tafa, e fakafoou loma tagata i loto i le aso taki tasi.

¹⁷ Talie ko oma mamae maamaa i le temi leinei, ala e oki vave, e fakatupu ia kia maua, o lasi ake i fuafua fuli,

¹⁸ se fua malie lee gato o le kololia, talie e ma tio, o leai ki nea ala e tio ki ai a mata, kae ki nea ala e leaise tio ki ai a mata ; talie ko nea ala e tio ki ai a mata e fakatemi ; kae ko nea ala e leaise tio ki ai a mata e lee gato.