Lua tosi ki le kau Kolinto 2 - Tosi Tapu

Ko fua o le fakasemala

¹ Koia na kau fakatotonu loa iate au ke aua na kau toe liliu atu kia koutou i le mamae,

² talie kapau e kau fakamamae koutou, ko ai leia e mafai ke fakafiafia ia loa au ? Pe leaise ko leia fai na mamae iate au ?

³ Koia na kau tosi ai a nea ala na kau tosi, o tupu ke aua na kau maua ia, i laku tau atu, se mamae meia latou ala na tonu ke tuku ia mai kiate au le fiafia, o kau maua kia koutou fuli le amanaki malie leinei ko loku fiafia ko le fiafia foki a ia o koutou fuli.

⁴ E kau fai tosi atu kia koutou i se loto mamae lasi ai, mo se loto tuania, ti mo ni loimata lasi ai, o leaise tupu ke kotou mamae ai, kae o tupu ke kotou iloa le alofa lasi leia e kau maua kia koutou.

Ko le tagata agasala kua fakamolemole

⁵ Ti kapau kua liliu se tasi ko se nea fakatupu mamae, e leaise ko au leia na fakamamae e ia, kae ko koutou fuli, pe ko se koga o koutou, ke aua na fakalalasi se nea.

⁶ Ti kua feauga ki le tagata lena le tua leia kua tuku kiate ia e le toka api.

⁷ Koia e tonu ai ke kotou fakamolemole kiate ia, ti ke kotou fakafimalie a ia, talie ke aua na taomia a ia i se mamae lasi.

⁸ Koia e kau kole atu ai kia koutou ke kotou fakasa le alofa kiate ia ;

⁹ talie na kau fai tosi atu foki kia koutou ko laku fia iloa, i laku asiasii koutou, pe kotou fakalogo i nea fuli.

¹⁰ Koia ko leia e kotou fakamolemole ki ai, e kau toe fakamolemole foki ki ai, ti ko le nea leia kua kau fakamolemole ki ai, mo kapau na kau fakamolemole ki se nea, na kau fai a ia o tupu ko koutou, i mua o Kilisito,

¹¹ o tupu ke aua na tuku ke maua e Satana se faigamalie ia tatou, talie e leaise tou fakapouli ki ana fakatuutuu.

¹² Koia i laku kaku atu ki Toloasi ke fakasa ai le Evaselio a Kilisito, o logo ai na fakamavaa e le Aliki se matapa kiate au i ai, kae na leaise kau maua ia se malolo i loku loto, talie na leaise kau maua ia a Tito, loku taina ;

¹³ koia na kau poloaki ai loa kia latou ti na kau ano loa ki Masetonia.

Malo ia Kilisito

¹⁴ Ke fakafetai ki le Atua, leia e tuku ia kia tatou le malo tuumau ia Kilisito, ti mo liligi ia kia tatou le manogi o lona iloa i ganea fuli !

¹⁵ Talie ko le kaloni tatou o Kilisito ki le Atua, ia latou ala kua fakamauli, ti mo latou ala e mamate :

¹⁶ Ki ni iki, ko se sauga o le mate, leia e soli ia le mate ; ki ni iki ake, ko se sauga o le mauli leia e soli ia le mauli. Ti ko ai e feauga ki le gaoi lasi lena ?

¹⁷ Talie e leaise motou fai kaka ki le folafola a le Atua, ofaipe le fai a se toka api ; kae motou masau i le maoki, i mua o le Atua, ofaipe ni tagata fakasausau a Kilisito.