Lua tosi ki le kau Kolinto 13 - Tosi Tapu

6) Fakamakeke fakaoki

¹ E kau natu kia koutou ko lona tua tolu loa a ia. E fakatokatoka loa a nea fuli i le fakamaoki a ni tagata e toka lua pe toka tolu.

² E kau fai se valoki kia latou ala na agasala i mua ti mo latou ake ala ; na kau tuku atu foki a ia i le tua lua o laku nofo mo koutou, kae e kau toe liuga atu a ia i le aso nei e kau mamao ai mo koutou : i le faiaga ka au e kau natu ai loa o tio kia koutou, e leaise kau toe fakaneanea loa ki se tasi,

³ talie e kotou afa se fakamaoki o le masau a Kilisito iate au, a ia leia e leaise gaegae kia koutou, kae e makeke ia koutou.

⁴ Talie na tutuki a ia ki le koluse i lona gaegae, kae e mauli a ia i le mafimafi o le Atua ; ko maua foki, e ma gagae iate ia, kae e ma mauli loa mo ia i le mafimafi o le Atua, o gaoi kia koutou.

⁵ Ke kotou fakatiotio kia koutou totonu, ke iloa pe kotou nonofo i le tui ; kotou asiasii koutou totonu. Pe leaise kotou iloa e nofo Sesu-Kilisito ia koutou ? Kae na saga e leaise kotou maua ia ni fakamaoki o lakoutou tui.

⁶ Kae e kau amanaki e kotou iloa ko maua, e ma maua a ma fakamaoki.

⁷ Koia e ma kole ai ki le Atua ke aua na kotou fai ia se nea leia e veli, o leaise tupu ke ma mata tonu ai kia koutou, kae o tupu ke kotou fai le nea leia e malie, ti ko maua, ke ma faipe ni nea ala e leaise fakamaoki.

⁸ Talie e leaise ma maua se makeke ke agatuu ki le maoki ; kae ke kau fakatasi mo le maoki.

⁹ E ma fiafia mo ka ma gagae, kae kotou makeke ; ti ko le nea leia e ma kole i ama faikole, ko lokoutou malie tukupau.

¹⁰ Koia e kau tosi atu ai a nea ana kae kau puli ia koutou, o tupu ke aua na kau fakaaoga ia loa le makeke, mo ka kau nofo loa mo koutou, o mulimuli ki le pule leia kua soli mai e le Aliki ki le lagai kae leai ki le maumaui.

Fakaalofa fakaoki

¹¹ Ti e kau fakaoki loa, fetaina, kotou nonofo la ! kotou afa ki le malie tukupau, kotou fefakafimalieaki, kotou maua se manatu loto e tasi, kotou mauli i le tokamalie ; ti ko le Atua o le alofa mo le tokamalie e nofo loa mo koutou.

¹² Kotou taualofa ia koutou i se sogi maokioki. E fakaalofa atu kia koutou le kau sagato katoa.

¹³ Ko le kalasia o le Aliki ko Sesu-Kilisito, mo le alofa o le Atua, ti mo le komunio o le Laumalie Maokioki, ke nofo mo koutou fuli.