Lua tosi ki le kau Kolinto 12 - Tosi Tapu

E fakasa le makeke o le Atua i le gaegae o le tagata

¹ E tonu ke fakakololia… E leaise malie le nea lena. Kae e kau fia masau i le temi nei ki nea ala na kau tio ki ai mo logo ki ai ti na fakasa mai e le Aliki kiate au.

² E kau iloa se tagata ia Kilisito, kua sili ki ai ni fetuu e kau agafulu tupu fa, na ave a ia ki le tolu o lagi (pe na ave a ia i lona tino, e leaise kau iloa, pe sala i lona tino, e leaise kau iloa, ko le Atua e iloa ia).

³ Ti e kau iloa ko le tagata lena (pe na soko i lona tino pe sala i lona tino, e leaise kau iloa, ko le Atua e iloa ia)

⁴ na ave loa a ia ki le Palatiso ti na logo loa a ia ki ni masau fulumalilie ai ala e leaise taga ki se tagata ke fakasa ia.

Kafo o Paulo i lona tino

⁵ E kau fakakololia loa ki se tagata fenaaki, kae kiate au totonu e leaise kau fakakololia loa, e kau fakakololia fai i oku gaegae.

⁶ Kapau e kau loto ke kau fakakololia, e leaise kau fai loa pe se vale, talie e kau fakasa loa le maoki ; kae e leaise kau fai le nea lena, o tupu ke aua na maua e se tasi se manatu kiate au leia e taualuga ake i le nea leia e tio a ia ki ai iate au pe ko le nea leia e logo a ia ki ai meiate au.

⁷ Tie talie ke aua na kau makita i le fia nealasi i nea malilie ala na fakatio au e le Atua ki ai, kua tuku e ia ki loku tino se maimoa mamae ai, ko se aselo o Satana leia ke ta ia au ti mo taofi ia au ke aua na kau fia nealasi.

⁸ Ti na tua tolu laku kole ki le Aliki ke fakamamao le nea lena iate au,

⁹ kae na pati mai a ia kiate au : e feauga loku kalasia kiate koe, talie e fakasoko loku makeke i le gaegae. Koia e kau fakakololia tafito loa i oku gaegae, o tupu ke nofo le makeke o Kilisito iate au.

¹⁰ Koia e kau fiafia i oku gaegae, mo oku lauvelii, mo oku mativa, mo oku fakavelivelii, mo oku mamae, o tupu ko Kilisito ; talie ka kau gaegae, ti e kau makeke loa.

5) Fakatokaga a Paulo

¹¹ Kua kau valea : Na kotou eke au ke kau fenaaki. Ko kotou ala na tonu ke puipui ia au, talie na leaise kau taulalo fua i se nea i apositolo lalasi, logo ai e leai soku uiga.

¹² Kua fakasa a fakamaoki o laku gaoi fakaapositolo ia koutou i le kataki fualoa i asiasi fuli, mo ni fakamailoga, mo ni nea fakamanamana, ti mo ni milakulo.

¹³ Pe na i ai se nea leia na kau fai fakaikiiki kia koutou i la ake Ekelesia ? Pe ko laku leaise fakaamo kia koutou loku taupau ? Kotou fakamolemole mai ki le sala lena !

¹⁴ Ko leinei, ko le tua tolu leinei o laku tokamalie ke kau natu kia koutou, ti e leaise kotou taupau loa kiate au ; talie e leaise kau afa okoutou koloa, kae ko koutou totonu : E leaise gali ke tanaki a fanau ki olatou matua, kae ko matua ki olatou fanau.

¹⁵ Kiate au, e kau fiafia lasi loa i le soli o nea fuli ala e kau maua mo loku mauli totonu o tupu ko okoutou laumalie. Pe kotou alofa ikiiki loa kiate au, mo kapau e kau alofa lasi kia koutou ?

¹⁶ Io ! Na leaise kau liliu ko se kavega kia koutou ; kae, pe se tagata kaka, na kau tapo koutou ki se masele !

¹⁷ Pe na kau maua ia se nea meia koutou i se tasi o latou ala na kau kakau atu kia koutou ?

¹⁸ Na kau kole kia Tito ke natu kia koutou, ti na kau kakau atu mo ia le taina leia na kau masau atu ki ai. Pe na kole fakamakeke e Tito se nea kia koutou ? Pe na leaise ma saele i se laumalie e tasi ti mo se ala e tasi ?

¹⁹ Lagi kua fualoa lakotou pati e ma fakamatatonu ia maua i okoutou mua. E ma masau atu i mua o le Atua, ia Kilisito : ti ko nea fuli ana, alofaaga, e ma fakasa atu o tupu ke lagai ai koutou ki aluga.

²⁰ Talie e kau i na leaise kau maua koutou, i laku tau atu, ofaipe le nea leia e kau loto ki ai, ti ke kotou maua au ofaipe le nea leia e leaise kotou loto ki ai. E kau tuania na i ai ni fefele, mo ni finenonofo, mo ni masau lalasi, mo ni fefiliaki, mo ni fatufatu, mo ni lauveli, mo ni fia nealasi, ti mo ni maveuveu.

²¹ E kau tuania, i laku tau atu, na toe fakataulaloi au e loku Atua i mua o koutou, ti ke kau tagi loa ki se toka api o latou ala na agasala i mua, ti na leikiaise fakasemala ki le aga fakakelekele, mo le fai feauaki, ti mo nea fakalialia fuli ala na lotou fai.