Lua tosi ki le kau Kolinto 11 - Tosi Tapu

2) Tauaga o le gaoi fakaapositolo maoki : Kilisito toka tasi.

¹ Oi ! E kau fakaamu ke kotou mafai ia le tali o se valea ikiiki fua iate au ! io, kotou kataki au !

² Talie e kau finenonofo kia koutou i se finenonofo o le Atua, talie kua kau fakatasii koutou ki se tagata avaga e tasi, o tupu ke kau fakaali koutou kia Kilisito ofaipe se taupoou mea.

3) Tokaga ki apositolo loi

³ Kae, ofaipe le gata leia na kakai ia a Eva i lana puleaki kaka, e kau i na kua fakasalai okoutou fakakaukau ke kotou maliu kese i le faigaofie leia e mau ia Kilisito.

⁴ Talie, kapau e natu se tasi o fakasa atu kia koutou se tasi ake Sesu i leia kua motou fakasa ia atu, pe kapau e kotou tali se tasi ake laumalie i leia kua kotou tali ia, pe ko se tasi ake Evaselio i leia kua kotou tui ki ai, e kotou kataki malie le tagata lena.

⁵ Ka e kau fuafua atu e au e leaise kau taulalo ake i se nea i apositolo lalasi ana.

⁶ Kapau e leaise kau poto i le masau, kae e leaise kau fenaaki i le iloa, ti na ma fakasa le nea lena kia koutou o lasi ai i nea fuli.

⁷ Pe na kau fai ia se agasala i laku fakataulalo a au totonu, o tupu ke siki ake koutou ki aluga, i laku fakasa atu le Evaselio a le Atua kia koutou, kae na leaise totogi au ?

⁸ Na kau fakamativa ni iki ake Ekelesia, i laku tali meia latou se totogi ke kau gaoi ai kia koutou. Ti i le temi leia na kau nofo ai ia koutou ti na kau mativa ai, na leaise kau fakamativa ia fua se tagata e toka tasi,

⁹ talie ko fetaina ala na au mei Masetonia, na aumai ia a nea fuli ala na aoga kiate au. I nea fuli, na kau tokaga ke aua na kau liliu ko se kavega kia koutou, ti e kau tokaga tuumau foki ki le nea lena.

¹⁰ I le maoki o Kilisito leia e nofo iate au, e kau fakasa e leaise too loa iate au le kololia lena i fenua o Akaia.

¹¹ O tupu kolea ?… Talie e leaise kau alofa kia koutou ?… E iloa a ia e le Atua !

¹² Kae e kau fai, ti e kau fai loa fenaaki ke tuuti ai a faigamalie fuli kia latou ala e fia afa ia se nea ke lotou fakavikiviki ai, ti mo se fakamaoki e lotou gaoi o tatau mo maua.

¹³ Ko tagata ana ko ni apositolo loi, ko ni tagata gaoi kaka, e lotou kofu pe ni apositolo a Sesu-Kilisito.

¹⁴ Ti e leaise fakapunamauli le nea lena, talie ko Satana totonu e kofu pe se aselo o le malama.

¹⁵ Koia e leaise ko se nea foou foki, mo ka kofu tagata gaoi ana ofaipe ni tagata fakasausau o le maokioki. Ko lolatou ikuaga e mulimuli loa ki alatou gaoi.

4) Fakamailoga o le apositolo maoki : Mamae o Paulo i lana gaoi

¹⁶ E kau toe pati, aua na tio se tasi kiate au ko se vale ; ka leai, kotou tali au ofaipe se vale, o tupu ko au foki, ke kau fakakololia fakaikiiki kiate au.

¹⁷ Ko le nea leia e kau pati ki ai, i loku loto ke kau fakakololia au, e leaise au mei le Aliki, kae e kau masau ofaipe se vale.

¹⁸ Talie e toka api latou ala e fakakololia kia latou i le kanofi, e kau fakakololia foki kiate au.

¹⁹ Talie e kotou kataki le kau vale, e koutou ala e popoto !

²⁰ Kapau e fakapopulai koutou e se tasi, kapau e folo koutou e se tasi, kapau e fakamakeke koutou e se tasi, kapau e masau lalasi se tasi, kapau e paai okoutou mata e se tasi, e kotou kataki a ia.

²¹ E kau luma i lona fakasa, na ma fakasa loma gagae. Kae, ko nea fuli ala e feala ke toa ai se tasi - e kau masau pe se vale - e kau toa foki mo au i lona fai !

²² Pe lotou Epeleo ? Mo au foki. Pe lotou Iselaele ? Mo au foki. Pe lotou au mei le sakoga o Apalaamo ? Mo au foki.

²³ Pe ko tagata fakasausau latou a Kilisito ? E kau masau fakavale, e kau fakalaka ake ia latou : i gaoi, e kau lasi ake ; i sasa, e kau toe lasi ake ; i fakapilisoni, e kau lasi ake. Na tua lasi loku tutamaki ki le mate.

²⁴ Na tua lima loku sasa e le kau Sutea, ti na taki kau tolu tupu iva fa ta le sasaaga.

²⁵ Na tua tolu loku ta ki laakau, tua tasi loku tuki fatui, tua tolu loku tutamaki i le tai, na kau goto o nofo i se aso mo se po e tasi i le moana.

²⁶ Na tua lasi laku fefolauaki, na kau tutamaki i vaitafe, teiteiki mei le potu o le kau kaia, teiteiki mei le potu o latou o loku fenua, teiteiki mei le potu o le kau pagani, teiteiki i kolo, teiteiki i toafa, teiteiki i le tai, teiteiki i fetaina loi.

²⁷ Na kau fai ni gaoi pakia mo mamae, o tau mo ni alaala pouli lasi ai, mo le fia kai, mo le fia inu, mo ni sesunio liuliuga, mo le momoko, ti mo le mativa.

²⁸ Ti e leaise kau masau ki la ake a nea, ti e kau tau i le aso taki tasi mo tuania o Ekelesia fuli.

²⁹ Kapau e gaegae se tasi, e kau logoi foki se gaegae ? Kapau e vilo ki le agasala se tasi, e kau logoi se mamae lasi ?

³⁰ Kapau e tonu ke kau fakakololia kiate au, ti e kau fakakololia loa i loku gaegae !

³¹ Ko le Atua, leia ko le Tamana o le Aliki Sesu, leia e manuia o lee gato, e iloa ia e leaise kau loi !

³² I Tamaso, ko le kovana a le sau ko Aletasi, na fakatotonu ia ke leoleo le kolo o le kau Tamaso, o tupu ke maua au,

³³ kae na fakaifo au i se katupa i se maea, i se kete, i le kaua o le kolo, o kau sao ai mei olotou lima.