Lua tosi ki le kau Kolinto 10 - Tosi Tapu

fakaapositolo : 1) Na tuku a ia e le Atua

¹ Ko au Paulo, e kau kole atu kia koutou, i le agamalu mo le agamalie o Kilisito, a au leia e mata gaegae i okoutou mua mo ka kau nofo mo koutou, ti e apele i le loto toa kia koutou mo ka kau nofo mamao.

² E kau kole atu kia koutou, mo ka kau nofo loa mo koutou, ke aua na kotou fakamakeke loa au ke kau fakaaoga le loto toa lena, leia e kau taofi ki ni iki ala e tio mai kia maua o sakinake e ma saele o mulimuli ki le kanofi.

³ Kapau e ma saele i le kanofi, kae e leaise ma tau i le kanofi.

⁴ Talie ko masafu ala e ma tau ai e leaise fakatagata ; kae e lotou makeke lasi i le Atua, ke soloi ai ki lalo ni kolo tau.

⁵ E ma soloi ki lalo a fakakaukau mo nea taualuga fuli ala e malaga ake ki le iloa o le Atua, ti e ma fakapilisoni a manatu fuli o aumai latou ki le fakalogo kia Kilisito.

⁶ E ma teuteu foki ke ma tautea a patigataa fuli, mo ka e katoa loa lakoutou fakalogo.

⁷ E kotou tio ki le nea leia e sa i tafa ! Kapau e pati se tasi e kau a ia kia Kilisito, ke pati a ia iate ia totonu, kapau e kau maoki a ia kia Kilisito, ko maua foki e ma kau kia Kilisito.

⁸ Ti kapau foki na kau fakakololia a au totonu o lasi fakaikiiki i le pule leia kua tuku mai kiate au e le Aliki ki lokoutou faufau, kae leai ki lokoutou maumaui, e leaise kau luma ai.

⁹ Ti e leaise kau loto ke sakinake e kau fakaii koutou i aku tosi.

¹⁰ Talie e pati : e mamafa mo makeke ana tosi ; kae ka nofo totonu a ia, e gaegae fua a ia, ti e veli lana masau.

¹¹ Ke iloa e leia e masau fenaaki, e ma fenaaki i masau i ama tosi mo ka ma nonofo mamao, e ma toe fenaaki foki i ama gaoi mo ka ma nonofo totonu mo koutou.

¹² E leaise mafai ke ma fia fakatatau ki ni iki o latou ala e fia matamua, talie e lotou fakatuu alotou fua totonu ke fuafua ai latou, ti i lalatou fakatatau latou kia latou totonu, e lotou sala atamai ai.

¹³ Kia maua, e leaise ma loto ke ma fakakololia i se nea leia e tuu i tafa o koiga o le faisaga leia na tuku mai e le Atua kia maua, o ave ai maua o kaku kia koutou.

¹⁴ E leaise ma mavae i oma koiga, o sakinake na leaise ma au o kaku mai kia koutou ; talie ko koutou ala na ma kaku atu ki ai mo le Evaselio o Kilisito.

¹⁵ E leaise ma fakakololia i ni gaoi a ni iki ake ala e tuu i tafa oma koiga. Kae e ma maua le amanaki malie, mo kapau e tupu loa o lasi lakoutou tui, ke ma liliu o toe lasi ake ia koutou, i loma faisaga totonu,

¹⁶ ti ke ma fakamafola le Evaselio ki fenua ala e mamao atu ia koutou, kae leaise ma fakakololia ki le nea leia kua fai i le faisaga a ni iki ake.

¹⁷ Ko leia e fakakololia ke fakakololia a ia i le Aliki.

¹⁸ Talie e leaise ko leia e vikiviki kiate ia totonu e fakamaoki ki ai, kae ko leia e fakamaoki ki ai le Aliki.