Lua tosi ki le kau Kolinto 1 - Tosi Tapu

Fakaalofa

¹ Ko au Paulo, apositolo a Sesu-Kilisito i le finegalo o le Atua, mo le taina ko Timoteo, ki le Ekelesia o le Atua i Kolinito, ti mo le kau sagato fuli i le Akaia katoa ;

² Ke tuku atu kia koutou le kalasia mo le tokamalie e le Atua lotatou Tamana ti mo le Aliki ko Sesu-Kilisito !

Fakafetai a Paulo

³ Ke fakafetai ki le Atua, le Tamana o lotatou Aliki ko Sesu-Kilisito, le Tamana o manavaalofa ti mo le Atua o fakafimalie fuli,

⁴ leia e fakafimalie ia maua i oma mamae fuli, o tupu ke ma mafai ia le toe fakafimalie o latou ala e nonofo i mamae, ki le fakafimalie leia na fakafimalie ai maua e le Atua !

⁵ Talie kapau e lasi mamae o Kilisito ia maua, e toe lasi foki loma fakafimalie ia Kilisito.

⁶ Ti kapau e ma mamae, e tupu ke kotou maua le fakafimalie mo le fakamauli ; ti kapau e ma maua le fakafimalie, e tupu ke kotou maua le fakafimalie, leia e fakaliliu ia koutou o makeke ki le tali mo le kataki o mamae ala e ma tali ia.

⁷ Ti e tuu makeke lama amanaki malie kia koutou, talie e ma iloa, kapau e kotou kau i mamae, ti e kotou toe kau foki ki le fakafimalie.

⁸ Talie e leaise ma loto, fetaina, ke tuku koutou i le fakapouli o uiga mo mamae ala na soko kia maua i Asia, talie na ma taomia lasi ai, o fakalaka foki i oma makeke, koia na leaise ma amanaki e ma toe mauuli.

⁹ Kae na ma tio kua tuku maoki maua ki le mate, o tupu ke aua na ma fanaki kia maua totonu, kae ki le Atua leia e toe fakatuuake ia le kau mate.

¹⁰ Ko ia leia na saofaki ia maua mei le mate lasi a ia, ti e toe saofaki loa e ia maua : io, e ma amanaki kiate ia e toe saofaki loa e ia maua ;

¹¹ ti e kotou tokoi mai foki kia maua ia koutou faikole, o tupu ke liliu le kalasia leia kua tuku mai kia maua ko se faigamalie ke fakafetai ai se toka api o tupu ko maua.

Le loto maoki o Paulo

¹² Talie ko le nea leia e ma fiafia ai, ko le fakamaoki leinei o ma loto, na ma mauli i le malama nei, kae tafito kia koutou, i le maokioki ti mo le mea i mua o le Atua, o leai i se poto fakatagata, kae i le kalasia o le Atua.

¹³ Talie e leaise ma tosi atu kia koutou se nea kese i le nea leia e kotou lau ia, ti mo kotou matala ki ia. Ti e kau amanaki foki e kotou kaku loa o matala malie ki le nea leinei i le fakaoki :

¹⁴ I le aso nei kua kotou kamata iloa ko lokoutou kololia ko maua, kae e kotou liliu loa ko loma kololia i le aso o le Aliki Sesu.

Le fai a Paulo i lana gaoi

¹⁵ I le tui lena, na kau loto ke kau natu kia koutou i mua, o tupu ke kotou maua ni kalasia e lua ;

¹⁶ na kau loto ke kau fakalaka atu ia koutou o ano ki Masetonia, ti ke kau toe liliu loa mei Masetonia kia koutou, ti ke kotou kau fanoga loa mo au ki Sutea.

¹⁷ Pe i laku loto ki le nea lena, na kau fai loa se nea fakafuanoa ? Pe ko aku fakatuutuu ko ni fakatuutuu fakatagata, o sakinake e maua iate au le io mo le leai ?

¹⁸ E kau fakamaoki atu i le Atua, leia e agatonu, ko le folafola leia na ma fakasa atu kia koutou na leaise io mo leai.

¹⁹ Talie ko le Alo o le Atua, Sesu-Kilisito, leia na motou akonaki kia koutou, e au, mo Silivano, ti mo Timoteo, na leaise io mo leai, kae na io fai a ia ;

²⁰ talie ko fakapapau fuli a le Atua e io iate ia ; ti koia foki leia e tou puaki ai le Amene iate ia ki le kololia o le Atua.

²¹ Ti ko leia e fakatuumakeke ia maua o fakatasi mo kotou ia Kilisito, ti na pani lolo ia tatou, ko le Atua,

²² leia kua fakamailoga ia foki tatou, o soli mai kia tatou se fakamaoki, ko le Laumalie i otatou loto.

Mamae mo fiafia o Paulo

²³ Kae e kau too le Atua ko se fakamaoki ki loku laumalie, e tupu ko loku alofa kia koutou, leia na leaise kau toe natu ai ki Kolinito ;

²⁴ kae leaise tupu ke ma pulei ai lakoutou tui, kae tupu ke ma tokoi ki lokotou fiafia, talie kua kotou tuu makeke i le tui.