Uluaki tosi ki le kau Tesalonika 5 - Tosi Tapu

Le saele fakakilisiteano

¹ Ki le nea o uiga mo temi ti mo lakaga, e leaise aoga, fetaina, ke kau fai tosi atu ki ai.

² Talie kua kotou iloa papau e koutou totonu ko le aso o le Aliki e au loa ofaipe se tagata kaia i le pouli.

³ I le temi leia e pati ai loa a tagata : Tokamalie mo fimalie ! I le temi loa lena e fakamauatoka loa latou e se tuutamaki fakapunamauli, ofaipe mamae o le temi fanau ala e fakamauatoka ia le fafine faitoe ; ti e leaise lotou sao loa i ai.

⁴ Kae ko koutou, fetaina, e leaise kotou nofo i le fakapouli, ke fakamauatoka koutou e le aso lena ofaipe se tagata kaia ;

⁵ ko ni fanau fuli koutou o le malama ti mo le ao. E leaise tou kau i le pouli pe i le fakapouli.

⁶ Koia aua na tou momoe ofaipe latou ake ala, kae tou alaala ti mo tou fakapotopoto.

⁷ Talie ko latou ala e momoe, e momoe i le pouli, ti ko latou ala e konana, e konana i le pouli.

⁸ Kae ko tatou ala e kau i le ao, tou fakapotopoto, tou kofu le kofu tau o le tui mo le alofa, ti tou too le puloga tau o le amanaki malie o le fakamauli.

⁹ Talie na leaise fakatuutuu tatou e le Atua ki le sausau, kae ki le maua o le fakamauli i lotatou Aliki ko Sesu-Kilisito,

¹⁰ leia na mate kia tatou, o tupu ke tou mauli fakatasi mo ia, pe ke tou alaala, pe ke tou momoe.

¹¹ Koia, kotou fefakapelepeleaki ia koutou ti kotou fefaufauaki ia koutou, o fai foki pe le nea leia e kotou fai maoki.

Fakatotonu fakamuli

¹² E motou kole atu kia koutou, fetaina, kotou fakaapaapa kia latou ala e gaoi kia koutou, mo takitaki ia koutou i le Aliki, ti mo ako ia koutou.

¹³ Kotou maua kia latou se loto alofa lasi, o tupu ko lalatou gaoi. Kotou nonofo i le tokamalie ia koutou.

¹⁴ E motou kole atu foki kia koutou, fetaina, ke kotou fakatonutonu latou ala e mauli maveuveu, mo kotou fakapelepelei latou ala e mamae, mo kotou tokoi kia latou ala e gagae, ti mo kotou kataki fualoa ki tagata fuli.

¹⁵ Kotou tokaga ke aua na totogi e se tasi le veli ki le veli, kae ke kotou afa tuumau le malie i okoutou vasaa ti mo tagata fuli.

¹⁶ Kotou fiafia tuumau.

¹⁷ Kotou faikole sosoko.

¹⁸ Kotou fakafetai i nea fuli, talie ko le finegalo a ia o le Atua ia Sesu-Kilisito kia koutou.

¹⁹ Aua na kotou tamate le Laumalie.

²⁰ Aua na kotou fakanoai a kikite.

²¹ Kae kotou sivisivi a nea fuli ; kotou taofi le nea leia e malie ;

²² kotou fakamamao mei nea fuli e veli.

²³ Ke alofa le Atua o le tokamalie o fakamaokioki koutou, mo taupau koutou katoa, le loto, mo le laumalie, ti mo le tino, ke lee mele i le aso o le toe liliu mai o lotatou Aliki ko Sesu-Kilisito.

²⁴ E agatonu leia na kalagai ia koutou, ti ko ia leia e fai ia loa le nea lena.

²⁵ Fetaina, kotou ulufaki matou.

²⁶ Fakaalofa atu ki fetaina fuli i se sogi maokioki.

²⁷ E kau kole mamae atu kia koutou i le Aliki, ke lau le tosi leinei ki fetaina fuli.

²⁸ Ke nofo le kalasia o lotatou Aliki ko Sesu-Kilisito mo koutou !