Uluaki tosi ki le kau Tesalonika 4 - Tosi Tapu

Fakamakeke ki le mauli mea

¹ Koia, fetaina, talie kua kotou ako meia matou le mauli leia e tonu ke kotou maua o tupu ke kotou mata malie ai ki le Atua, ti e kotou fai le nea lena, e motou kole atu kia koutou, ti e motou kole mamae atu a ia kia koutou i le suafa o le Aliki ko Sesu, ke kotou saele i le nea lena o lakalaka ki mua.

² Talie e kotou iloa foki a fakatotonu ala na motou tuku atu kia koutou mei le Aliki Sesu.

³ Talie ko le finegalo o le Atua ke kotou maokioki, ti ke kotou fakamamao mei le fai feauaki :

⁴ Koia ke tasi iloa e le tagata o koutou le tausi o lona tino i le maokioki mo le fakaapaapa,

⁵ kae tuku lakoutou fai a oli fakavale o le tino, ofaipe le fai a le kau pagani ala e leaise iloa ia le Atua ;

⁶ ke aua na fakatotolo e se tasi le avaga o lona taina, talie e tautea e le Aliki a tagata fenaaki, ofaipe lamatou fakasa fakatomua mo fakamaoki a ia kia koutou.

⁷ Talie na leaise kalagai tatou e le Atua ki le mauli fakalialia, kae ki le maokioki.

⁸ Koia, ko leia e tiaki ia a fakatotonu ana, e leaise tiaki e ia se tagata kae le Atua, leia na soli ia atu foki kia koutou lona Laumalie Maokioki.

⁹ O uiga mo le alofa fakatautaina, e leaise aoga kia koutou ke toe fai tosi atu ki ai, talie kua kotou ako e koutou totonu mei le Atua le fealofani fakatautaina,

¹⁰ ti e kotou fai foki le nea lena ki fetaina fuli i Masetonia katoa. Kae e motou kole atu kia koutou, fetaina, ke kotou tuputupua tuumau i le alofa lena,

¹¹ ti ke kotou tokaga lasi ke kotou mauli i le tokamalie, ke kotou tasi tokaga ki ana nea totonu, ti ke kotou gaoi ki okoutou lima, ofaipe lamatou fakatotonu atu kia koutou,

¹² ti ke kotou mauli agatonu kia latou mei tafa, ti ke aua na kotou liliu ko se kavega ki se tasi.

Too o le Ekelesia mo le toe liliu mai o le Aliki

¹³ E leaise motou loto, fetaina, ke kotou nonofo i le fakapouli o uiga mo latou ala kua mamate, o tupu ke aua na kotou mamae ofaipe latou ake ala e leaise maua ia se amanaki malie.

¹⁴ Talie, kapau e tou tui na mate Sesu ti na toe tuuake, ti e tou tui foki e aumai loa e le Atua o fakatasi mo Sesu latou ala na mamate iate ia.

¹⁵ Talie ko leinei le nea leia e motou fakasa atu kia koutou i le folafola a le Aliki : Ko tatou ala e mauli mo toe ki le au a le Aliki, e leaise tou muamua loa ia latou ala kua mamate.

¹⁶ Talie e ifo loa le Aliki totonu mei le lagi, i se kalaga fakalagiaki, i le leo o se alekaselo, ti mo le tagi o le fakatagi pupusi a le Atua : ti ko le kau mate ia Kilisito e toe tuuake loa i mua.

¹⁷ Ti oki ko tatou ala na mauli mo toe, e too loa tatou fuli o fakatasi mo latou i se ao, ke fakafetaulaki ki le Aliki i le aele, ti ke tou nonofo loa mo le Aliki, o lee gato.

¹⁸ Ke kotou fefakapelepeleaki ia koutou i kupui folafola ana.