Uluaki tosi ki le kau Tesalonika 3 - Tosi Tapu

¹ Koia i le leaise koi ma faakatakii ia lomatou fia ilo kia koutou, na motou loto tasi loa ke motou nonofo tefua i Atene,

² kae motou kakau atu kia koutou Timoteo, lomatou taina, tagata gaoi a le Atua ki le Evaselio a Kilisito, ke natu o fakamakeke koutou mo fakafimalie koutou i lakotou tui,

³ o tupu ke aua na gaegae se tasi i mamae o le temi nei ; talie e kotou iloa kua fakatuutuu tatou ki ai.

⁴ Ti i le temi leia na motou nonofo ai mo koutou, na motou fakasa fakatomua atu kia koutou e tou tali loa ni mamae, ofaipe le nea leia kua soko ti kua kotou iloa.

⁵ Koia, i loku le leaise koi mafai laku kataki, na kau kakau loa se tasi ke fakasa ia mai kiate au le anoaga o lakoutou tui, talie na kau i na fakasalai koutou e le fili kae ano noa lamatou gaoi.

⁶ Ti ko leinei, kua tau mai Timoteo meia koutou, o fakamatala mai kia matou ni logo malilie o lakotou tui ti mo lokotou alofa, ti na pati mai a ia kia matou e kotou taupau tuumau se manatu malie kia matou, ti e kotou fia tio kia matou ofaipe lomatou fia tio foki kia koutou.

⁷ Koia, fetaina, i omatou fitaa mo omatou mamae, na motou fimalie loa o uiga mo lakotou tui.

⁸ Koia kua motou mauli ai i le temi nei, talie kua kotou tuu makeke i le Aliki.

⁹ Koia na motou fakafetai lasi ai ki le Atua o uiga mo koutou, o tupu ko le fiafia leia e motou maua ia koutou i mua o lotatou Atua !

¹⁰ I le po mo le ao, e motou kole kiate ia i se loto makeke lasi ke fakataga e ia ke motou tio kia koutou, ti ke motou fakakatoa le nea leia koi puli ki lakotou tui.

¹¹ Io, ko le Atua totonu lotatou Tamana ti mo lotatou Aliki ko Sesu, ke fakatokatoka ia lomatou ala ke motou natu ai kia koutou !

¹² Ti ke fakatuputupua mo fakaapele e ia le alofa leia e kotou maua i okoutou vasaa, ti ki tagata fuli, o faifaitaki ki le alofa leia e motou maua kia koutou ;

¹³ ke fakamakeke e ia o okoutou loto o tupu ke kotou lee mele mo maokioki i mua o le Atua ko lotatou Tamana, i le aso o le toe liliu mai o lotatou Aliki ko Sesu mo ana sagato fuli.