Uluaki tosi ki le kau Tesalonika 2 - Tosi Tapu

Tali o le Evaselio e le kau Tesalonika

¹ E kotou iloa e koutou totonu, fetaina, na leaise sala fua lamatou kaku atu kia koutou.

² I le oki o lamatou tali a mamae ti mo lauveli i Filipe, ofaipe le nea leia kua kotou iloa, na toe fakamakeke o motou loto e le Atua ke motou fakasa kia koutou le Evaselio o le Atua, i loto malie o ni tau lasi ai.

³ Talie e leaise fakatafito lamatou akonaki ki le kaka, pe ki ni manatu kelekele, pe ki le fakasolosolo veli ;

⁴ kae na malie ki le Atua ke tuku mai kia matou le Evaselio, koia e motou masau ai, o leaise ke fakamatamalie ki ni tagata, kae ke fakamatamalie ki le Atua leia e asiasii ia omatou loto.

⁵ Talie e kotou iloa na leaise motou fai fua i se aso ni masau fakalaupisi ; ti e iloa e le Aliki na leaise taki matou e le manumanu ; e fakamaoki ki ai le Atua.

⁶ Na leaise motou afa le kololia leia e au mei tagata, pe meia koutou, pe mei ni iki ake ; i lomatou uiga ko apositolo a Kilisito na feala ke motou pulei fakamakeke koutou,

⁷ kae na motou apele i le agamalu i loto malie o koutou, io ofaipe se fafine taupau toe leia e tokaga malie ki ana fanau :

⁸ Koia na motou loto ai, i le lasi o lomatou alofa kia koutou, ke soli atu kia koutou o leaise gato fua i le Evaselio o le Atua, kae mo omatou mauli totonu foki, i le lasi o lomatou alofa kia koutou.

⁹ Ke kotou manatui, fetaina, lamatou gaoi ti mo lomatou pakia : I le po mo le ao na motou gaoi o tupu ke aua na motou liliu ko se kavega ki se tasi ia koutou, i le temi leia na motou fakasa atu ai kia koutou le Evaselio o le Atua.

¹⁰ E kotou fakamaoki, ti e fakamaoki foki le Atua, na motou mauli maokioki, mo faitotonu, ti mo lee mele i mua o koutou ala kua tui.

¹¹ Ti e kotou toe iloa foki na motou fai kia koutou taki toka tasi pe se tamana ki ana fanau,

¹² talie na motou fakalotomakeke koutou, mo fakapelepele koutou, ti mo fakakolekole koutou, ke kotou saele o gali mo le Atua, leia kua kalagai ia koutou ki lona puleaga ti mo lona kololia.

Agatonu o le kau Tesalonika

¹³ Koia e motou fakafetai tuumau ai ki le Atua, talie, i lakotou tali le folafola a le Atua leia na motou fakasa atu kia koutou, na kotou tali a ia, o leaise faipe le folafola a ni tagata, kae ofaipe le folafola totonu a le Atua, leia e gaoi ia koutou ala e tui.

¹⁴ Talie ko koutou, fetaina, kua kotou liliu ko le kau faifaitaki ki Ekelesia o le Atua i Sutea ala ia Sesu-Kilisito, talie ko koutou foki, kua kotou mamae mei lokoutou kakai totonu, ofaipe latou mei le kau Sutea,

¹⁵ ala na tamate ia le Aliki ko Sesu mo le kau polofeta, ala na fakaveliveli ia matou, ala e leaise malie ki le Atua, ala ko fili o tagata fuli,

¹⁶ Ti e lotou ponopono matou ke aua na motou fakasa ki le kau pagani le folafola leia e fakamauli ai latou. O tupu ke fakakatoa ai alatou agasala. Kae e maua loa latou e le sausau o le Atua.

Oli o Paulo ke tio ki le kau Tesalonika

¹⁷ Kia matou, fetaina, i le sili o lamatou mavae i se ga temi ikiiki meia koutou, i le tino kae leai i le loto, na motou fia tio lasi ai kia koutou.

¹⁸ Koia na motou fia natu ai kia koutou, io, a au Paulo, o tua tasi mo tua lua foki ; kae na taofi matou e Satana.

¹⁹ Talie kolea lamatou amanaki malie, mo lomatou fiafia, ti mo lomatou pala o le kololia ? Pe leaise ko koutou foki i mua o lotatou Aliki ko Sesu, i le aso o lona toe liliu mai ?

²⁰ Io, ko lomatou kololia mo lomatou fiafia ko koutou.