Uluaki tosi ki le kau Kolinto 8 - Tosi Tapu

Inati na momoli ki taulaatua

¹ O uiga mo inati ala kua momoli ki taulaatua, e tou iloa e tou maua fuli le iloa. E fakamakita le iloa, kae e faufau le alofa.

² Kapau e manatu se tasi e iloa e ia se nea, e leikiaise iloa e ia ofaipe lona tonu ke iloa.

³ Kae kapau e alofa se tasi ki le Atua, e iloa a ia e le Atua.

⁴ O uiga mo le kai o inati kua momoli ki taulaatua, e tou iloa e leai ni taulaatua i le malama nei, ti e i ai se Atua fuai e tasi.

⁵ Talie, kapau e i ai ni nea ala e fakaigoa ko ni atua, pe i le lagi, pe i le malama nei, ti e mauke ai a atua mo aliki,

⁶ kae kia tatou ko le Atua fai e tasi, ko le Tamana, leia e au mei ai a nea fuli ti e fakalogo ki ai otatou mauli, ti mo le Aliki fai e tasi, ko Sesu-Kilisito, leia na fakatupu ia a nea fuli ti mo tatou foki.

⁷ Kae e leaise maua e tagata fuli le iloa lena. Talie koi tio ni iki ki taulaatua, ti e lotou kai a inati ana ofaipe ni inati kua momoli maoki ki taulaatua, ti ko olatou loto, ala koi gagae, e kelekele i ai.

⁸ E leaise ko se nea kai leia e fakafeofi ia loa tatou ki le Atua : Kapau e tou kai ki ai, e leaise tou malie ake ai ; ti kapau e leaise tou kai ki ai, e leaise tou asili veli ai.

⁹ Kae kotou tokaga, ke aua na liliu lokoutou lauatea ko se fatu tukiaaga ki le kau gagae.

¹⁰ Talie, kapau e tio se tasi kiate koe, a koe leia e maua ia le iloa, e ke ekeeke o kai i se fale tapu o taulaatua, pe leaise ke lagai i ai le loto o leia e gaegae ke kai ki inati kua momoli ki taulaatua ?

¹¹ Ti e mate loa, o tupu ko lau iloa, le taina gaegae leia na mate ki ai Kilisito !

¹² I lakotou fai le agasala lena ki fetaina, ti mo le lavea i olatou loto, e kotou agasala kia Kilisito.

¹³ Koia, kapau e siga loku taina o tupu ko se nea kai, e leaise kau toe kai loa ki se inati i se aso, o tupu ke aua na siga loku taina.