Uluaki tosi ki le kau Kolinto 7 - Tosi Tapu

O uiga mo le avaga

¹ O uiga mo nea ala na kotou fai tosi mai ai kiate au, e kau manatu e malie ki le tagata ke aua na lave ki se fafine.

² Kae, o tupu ko le fai feauaki, ke tasi maua e le tagata sona avaga, ti ke tasi maua e le fafine sona avaga.

³ Ke soli e le tagata ki lona avaga le nea leia e maua ai a ia kiate ia, ti ke fai fenaaki foki le fafine ki lona avaga.

⁴ E leaise ko le fafine leia e pule ki lona tino, kae ko lona avaga. Ti e leaise ko le tagata foki leia e pule ki lona tino, kae ko le fafine.

⁵ Ke aua na kolua fefakafitiaki ia koulua, gato fai mo kapau kua kolua loto tasi ki ai i se ga temi ikiiki, o tupu ke kolua tokaga ki le faikole ; kae ka oki a ia, ke kolua toe liliu o fakatasi, talie na fakasalai koulua e Satana i lokoulua sala tataofi.

⁶ E kau fakasa le nea lena ofaipe se fakataga, kae e leaise faipe se fakatotonu.

⁷ E kau fakaamu ake ke tatau tagata fuli mo au. Kae e tali e le tagata taki toka tasi se nea alofa totonu mei le Atua, ko le tasi le nea alofa leinei, ti ko le tasi ake le nea alofa leia.

⁸ Kia latou ala na leaise avaga ti mo fafine lokonui, e kau fakasa e malie ke lotou nonofo ofaipe au.

⁹ Kae kapau e leaise lotou kataki fualoa, ke lotou avaga ; talie e malie ake ke avaga i le vela.

Fakatotonu kia latou kua avaga

¹⁰ Kia latou ala kua avaga, e kau fakatotonu, e leaise ko au, kae ko le Aliki, ke aua na mavae le fafine i lona avaga,

¹¹ (ti kapau kua mavae a ia, ke nofo a ia o leaise toe avaga pe ke toe fakatokatoka a ia mo lona avaga), ti ke aua na kapu e le tagata lona avaga.

¹² Ki la ake, e leaise ko le Aliki, kae ko au leia e pati : Kapau e maua e se taina sona avaga lee tui, ti e loto malie le fafine lena ke la nonofo fakatasi, ke aua na kapu e ia le fafine ;

¹³ ti kapau e maua e se fafine sona avaga lee tui, ti e loto malie le tagata lena ke la nonofo fakatasi, ke aua na kapu e ia le tagata.

¹⁴ Talie e fakatapui le tagata lee tui e lona avaga, ti e fakatapui le fafine lee tui e lona avaga ; talie kapau e leai, e liliu loa akoulua fanau o pagani, kae ko leinei, e lotou maokioki loa.

¹⁵ Kapau e fia mavae leia e lee tui, ke mavae a ia. E leaise sai loa le taina pe ko le tuagaane i nea ana. Talie na kalagai tatou e le Atua ke tou mauli i le tokamalie.

¹⁶ Talie e ke iloa feaki, fafine, pe ke saofaki ia loa lou avaga ? Ti e ke iloa feaki, tagata, pe ke saofaki ia loa lou avaga ?

¹⁷ Ko leia fua, fetaina, ke tasi saele le tagata o mulimuli ki le vaega leia kua tuku e le Aliki kiate ia, ti mo le kalaga leia kua tali e ia mei le Atua. Ko lena le nea leia e kau fakatotonu ki Ekelesia fuli.

¹⁸ Na kalagai se tasi kae kua silikosisio, ke nofo silikosisio a ia ; ti na kalagai se tasi kae lee silikosisio, ke aua na silikosisio a ia.

¹⁹ Ko le nea noa le silikosisio, ti ko le nea noa le lee silikosisio, kae ko le nea leia e mauiga ko le fakalogo ki fakatotonu a le Atua.

²⁰ Ke nofo le tagata taki toka tasi i le nofo leia na nofo ai i temi o lona kalagai.

²¹ Na kalagai a koe e ke popula, aua na ke tokaga ki ai ; kae kapau e mafai ke ke liliu o lauatea, too le faigamalie lena.

²² Talie ko le tagata popula leia kua kalagai e le Aliki ko se tagata lauatea a ia a le Aliki ; ti ko le tagata lauatea leia kua kalagai e le Aliki ko se tagata popula a ia a Kilisito.

²³ Kua totogi koutou ki se totogi lasi ; aua na kotou liliu o popula ki ni tagata.

²⁴ Fetaina, ke kotou tasi nofo i mua o le Atua, i le nofo leia na nofo ai a ia i lona kalagai.

O uiga mo latou e leikiaise avaga

²⁵ O uiga mo latou ala e taupoou, e leaise kau maua ni fakatotonu mei le Aliki, kae e kau tuku atu laku manatu, ofaipe se tagata leia kua tali ia mei le Aliki le kalasia ke agatonu.

²⁶ Ko leinei loa le nea leia e kau manatu e malie, o tupu ko temi faigataa ala ka tuu mai : E malie ki le tagata ke nofo fenaaki.

²⁷ Kua sai a koe ki se fafine, aua na ke faiga ke motusi le sai lena ; e leikiaise sai a koe ki se fafine, aua na ke afa sou avaga.

²⁸ Kapau kua ke avaga, na leaise ke fai ia se agasala ; ti kapau kua avaga le taine taupoou, na leaise agasala a ia ; kae e maua loa e latou ana ni mamae i le tino, ti e kau loto ke kotou sao i ai.

²⁹ Ko leinei le nea leia e kau fia fakasa, fetaina : kua toetoe le temi ; koia i le temi nei e tonu ke mauli a tagata ala kua nonofo mo se avaga o sakinake e lotou sala avaga ;

³⁰ ti ko latou ala e tagi o sakinake e leaise lotou tagi ; mo latou ala e fiafia o sakinake e leaise lotou fiafia ; mo latou ala e fai fakatau o sakinake e leaise lotou maua ia se nea ;

³¹ mo latou ala e fakaaoga ia le malama nei o sakinake e leaise lotou fakaaoga ia a ia, talie e puli loa a teu o le malama nei.

³² Kae e kau loto ke kotou sala tuania. Ko le tagata leia e leaise avaga e tokaga ki nea a le Aliki, mo puleaki ke fiafia ai le Aliki ;

³³ kae ko le tagata leia kua avaga e tokaga ki nea o le malama nei, mo puleaki ke fiafia ai lona avaga.

³⁴ E toe fai kesekese foki le fafine avaga mo le taine taupoou : ko le fafine leia e leaise avaga e tokaga ki nea o le Aliki, o tupu ke maokioki a ia i le tino mo le laumalie ; kae ko le fafine leia kua avaga e tokaga ki nea o le malama nei, ti mo puleaki ke fiafia ai lona avaga.

³⁵ E kau fakasa le nea lena ke aoga kia koutou : e leaise tupu ke maselei ai koutou, kae ke amo ai koutou ki le nea leia e malie mo aoga ke kotou pipiki ai ki le Aliki sala fakavisi.

³⁶ O uiga loa mo laua ala kua feauaki kae kua la loto ke aua na la avaga. Kapau e manatu le tagata e leaise fai nea fakaagatonu a ia ki le taine, ti kapau e pulei a ia e lona oli fakatino, o fuafua e ia e tonu ke la avaga, ti e malie ke la avaga, o fai ki lona loto, e leaise agasala a ia.

³⁷ Kae kapau ko le tagata, sala fakamakeke mei tafa, kua fakapapau e ia i lona loto ke aua na avaga, ti kapau e mafai e ia le pulei o lona loto mo too e ia totonu le nea ke fai, e malie ke aua na avaga a ia mo le taine.

³⁸ Koia, ko le tagata leia e avaga mo lana feauaki e fai ia se nea leia e malie, ti ko le tagata leia e leaise avaga mo lana feauaki e fai ia se nea leia e toe malie lasi ake.

³⁹ Kua sai le fafine ki lona avaga i le temi katoa leia e mauli ai lona avaga ; ti kapau kua mate le tagata, e lauatea le fafine ke toe avaga mo leia e loto a ia ki ai ; ko leia fua ke fai i le Aliki.

⁴⁰ Kae ko laku manatu e fiafia lasi ake le fafine lena mo kapau e nofo fenaaki a ia. Ti ko au foki, e kau tui e kau maua le Laumalie o le Atua.