Uluaki tosi ki le kau Kolinto 3 - Tosi Tapu

Le gaoi a tagata fakasausau a le Atua

¹ Kiate au, fetaina, na leaise mafai ke kau masau atu kia koutou ofaipe ki ni tagata fakalaumalie, kae ofaipe ki ni tagata fakakanofi, ofaipe ki ni fanau liliki ia Kilisito.

² Na kau soli atu kia koutou se sua u, kae leai se nea kai fefeka, talie na leaise kotou ma tatali a ia ; ti e tatau foki i le temi nei, e leaise kotou ma tatali a ia, talie koi kotou fakakanofi.

³ Talie koi maua ia koutou se finenonofo mo ni fefele, pe leaise kotou fakakanofi, pe leaise kotou saele o mulimuli ki le tagata ?

⁴ Talie ka pati se tasi : Ko au, o Paulo au ! Ti mo se tasi ake : Ko au, o Apolosio ! Pe leaise ko ni tagata koutou ?

⁵ Ko ai Apolosio, ti ko ai Paulo ? Ko ni tagata fakasausau fai laua, ala na kotou tui ai, o mulimuli ki le nea leia na soli e le Aliki kia laua taki toka tasi.

Ko le Atua toka tasi e mauiga i le gaoi fakakilisiteano

⁶ Na kau to ia, ti na fakavai e Apolosio, kae na fakasomo e le Atua.

⁷ Koia e leaise ko ia leia e to ia ko se nea, pe ko leia e fakavai ia, kae ko le Atua leia e fakasomo ia.

⁸ Ko leia e to ia mo leia e fakavai ia e tatau laua, ti e la tasi maua loa lona fakapale o fakatatau ki lana gaoi.

Ko le fakapale o le gaoi ki le Atua

⁹ Talie e ma kau gaoi mo le Atua. Ko koutou ko le faigasaga a le Atua, le fale o le Atua.

¹⁰ O mulimuli ki le kalasia o le Atua leia kua soli mai kiate au, kua kau teki le fakavae ofaipe se tufuga fale poto, ti na fau loa e se tasi ake i aluga. Kae ke tasi tokaga ki lana faasiga fau i aluga.

Ko le fakatafito e tasi : ko Sesu-Kilisito

¹¹ Talie e leaise mafai e se tasi ke teki e ia se tasi ake fakavae kese i leia kua teki, ke iloa ko Sesu-Kilisito.

Ko fau fale e lua mo ola anoaga

¹² Ti kapau e fau loa e se tasi i aluga o le fakavae lena ki se aulo, se siliva, ni fatu mauiga, ni laakau, se mutie, se penui fulumeto, e fakasa loa le gaoi a le tagata taki toka tasi :

¹³ Talie e fakasa loa a ia i le aso, talie e fakasa loa a ia e le afi ; ti e asiasii loa e le afi le anoaga o le gaoi a le tagata taki toka tasi.

¹⁴ Kapau e tuumau le gaoi leia na fai e se tasi i aluga o le fakavae lena, e maua loa e ia se fakapale.

¹⁵ Kae kapau e vela le gaoi a se tasi, e puli loa lona fakapale ; kae e fakamauli loa a ia, kae sakinake na fakalaka mua a ia i le afi.

¹⁶ Pe leaise kotou iloa ko le fale tapu koutou o le Atua, ti e nofo le Laumalie o le Atua ia koutou ?

¹⁷ Kapau e maumaui e se tasi le fale tapu o le Atua, e maumaui loa a ia e le Atua ; talie e maokioki le fale tapu o le Atua, ti ko lona fale tapu ko koutou.

¹⁸ Ke aua na kakai e se tasi a ia totonu : Kapau e tui se tasi ia koutou ko se poto a ia i le sekulo leinei, ke liliu a ia ko se vale, o tupu ke liliu a ia ko se poto.

¹⁹ Talie ko le poto o le malama nei ko se valea a ia i mua o le Atua. Talie kua tosi : E tapo e ia le kau poto i lalatou fia poto.

²⁰ Ti e toe pati foki : E iloa e le Aliki a manatu a le kau poto, Eiloa e ia e lotou vaiga.

²¹ Koia ke aua na fakakololia ai e se tasi ni tagata ; talie ko nea fuli ai a koutou :

²² Pe ko Paulo, pe ko Apolosio, pe ko Sefasi, pe ko le malama nei, pe ko le mauli, pe ko le mate, pe ko nea o le temi nei, pe ko nea o le temi ka au.

²³ Ko nea fuli a koutou ; ti ko koutou a Kilisito, ti ko Kilisito a le Atua.