Uluaki tosi ki le kau Kolinto 2 - Tosi Tapu

E leaise fanaki fua Paulo ki le poto fakatagata

¹ Kiate au, fetaina, i laku natu kia koutou, na leaise kau natu o fakasa atu kia koutou le fakamaoki o le Atua i se masau malie pe ko se poto lasi.

² Talie na leaise kau maua le manatu ke iloa ia koutou se tasi ake a nea ia Sesu-Kilisito, ti ko Sesu-Kilisito leia na tutuki i le koluse.

³ Ti ko au totonu, na kau nofo ia koutou i se gaegae, mo se tuania, ti mo se lulu lasi ;

⁴ ti na leaise fai aku masau mo aku akonaki ki ni masau logo malie o le poto fakatagata, kae ki se fakamaoki o le Laumalie mo se makeke,

⁵ o tupu ke fakatafito lakoutou tui, o leai ki le poto o tagata, kae ki le mafimafi o le Atua.

⁶ Kae ko se poto leia e motou fakasa ia latou ala e saosaoa, poto leia e leaise au mei le sekulo leinei, pe mei pule o le sekulo leinei, ala ka maumaui loa.

⁷ Kae e ma fakasa le poto fakafufu o le Atua, leia e fufu ki le tagata, kae na fakatuutuu e le Atua, i mua o le fakatupu o le malama nei, ki lotatou kololia,

⁸ Poto leia na leaise iloa e se tasi fua o le kau pule o le sekulo leinei, talie, kanapau na lotou iloa a ia, na leaise lotou tutuki loa i le koluse le Aliki o le kololia.

⁹ Kae, ofaipe lona tuu i le tosi : Ko ni nea ala na leaise tio ki ai le mata, ti na leaise logo ki ai le taliga, ti na leaise ulu ki le loto o le tagata, ko ni nea ala na teuteui e le Atua kia latou ala e alofa kiate ia.

¹⁰ Ti kua fakasa e le Atua a nea ana kia tatou i lona Laumalie : Talie e ului e le Laumalie a nea fuli, tatau foki mo nea loloto o le Atua.

¹¹ Talie koai le tagata leia e iloa ia a nea a le tagata, kae ko le laumalie fuai o le tagata leia e nofo iate ia ? Ti e tatau foki, e leaise iloa e se tagata a nea o le Atua, kae ko le Laumalie fuai o le Atua.

¹² Ti ko tatou, na leaise tou tali le laumalie o le malama nei, kae ko le Laumalie leia e au mei le Atua, o tupu ke tou iloa a nea ala na soli mai e le Atua kia tatou i lona kalasia.

¹³ Ti e ma masau ki nea ana, o leai i ni masau ala e ako mai e le poto fakatagata, kae ki ni masau ala e ako mai e le Laumalie, o fakaaoga se masau fakalaumalie ki nea fakalaumalie.

¹⁴ Kae e leaise tali e le tagata fakanatula a nea o le Laumalie o le Atua, talie ko se valea latou kiate ia, ti e leaise mafai ke iloa e ia latou, talie koi iloa fakalaumalie fai latou.

¹⁵ Kae e iloa e le tagata fakalaumalie a nea fuli, ti e leaise mafai ke fakamaaui a ia e se tasi.

¹⁶ Talie Ko ai na iloa ia le manatu a le Aliki ? Ko ai na tuku ia ni tokoi kiate ia ? Kae ko tatou, e tou maua le manatu a Kilisito.