Uluaki tosi ki le kau Kolinto 16 - Tosi Tapu

Tanaki nea alofa

¹ O uiga mo le tanaki nea alofa ki le kau sagato, kotou fai, e koutou foki, ofaipe le nea leia kua kau fakatotonu ki Ekelesia o Kalatia.

² I le uluaki aso o le vasaa, kotou tasi tuku kese i okoutou kaiga, le nea leia e kotou tasi mafai ia, o mulimuli ki lona mou koloa, o tupu ke aua na talitali ki laku kaku atu ke tanaki ai a nea alofa.

³ Ti ka kau kaku atu loa, e kau kakau ia loa mo ni tosi, ke ave ia okoutou nea alofa ki Selusalemi, latou ala e kotou loto loa ki ai.

⁴ Kapau e malie ke kau ano totonu, e lotou folau loa mo au.

⁵ E kau natu loa kia koutou mo ka kau fakalaka loa i Masetonia, talie e kau fakalaka loa i Masetonia.

⁶ E lagi kau nofo loa mo koutou, i le temi momoko katoa, o tupu ke kotou kau fanoga loa mo au ki le ganea leia e kau ano loa ki ai.

⁷ E leaise kau loto i le faiaga leinei ke kau fakalaka o tio fua kia koutou, kae e kau amanaki ke kau nofo fualoa mo koutou, mo kapau e fakataga a ia e le Aliki.

⁸ Kae e kau nofo loa i Efeso o kaku ki le Penikosite ;

⁹ talie kua fakamavaa mai kiate au se matapa lasi mo aoga, ti e toka api le kau fakafesagai.

¹⁰ Kapau e kaku atu loa Timoteo, kotou faiga ke aua na nofo tuania a ia ia koutou, talie e gaoi a ia ofaipe au ki le gaoi a le Aliki.

¹¹ Ke aua na nukinuki se tasi kiate ia. Ke kotou tokoi kiate ia ke folau mai kiate au i le tokamalie, talie e kau talitali kiate ia mo fetaina.

¹² O uiga mo le taina ko Apolosio, na kau kole makeke kiate ia ke natu kia koutou mo fetaina, kae na leaise loto a ia ke natu i le temi nei ; koi natu loa a ia mo ka maua loa e ia se faigamalie.

¹³ Kotou alaala, kotou tuu makeke i le tui, kotou faipe ni tagata, kotou makeke.

¹⁴ Kotou fai nea fuli i le alofa.

¹⁵ Ti ko leinei se tasi a kole leia e kau toe fai kia koutou, fetaina : E kotou iloa ko le famili o Setefanasi ko uluaki fua a ia o Akaia, ti na tokaga ai a ia ki le tausi o le kau sagato.

¹⁶ Ke kotou fakaapaapa foki ki le tau tagata fenaaki, ti mo latou fuli ala e gaoi i le gaoi lena.

¹⁷ E kau fiafia i le kaku mai a Setefanasi, mo Folotunatusi, ti mo Akaikusi ; e lotou fetogi koutou ala e nonofo mamao,

¹⁸ talie kua lotou fakafimalie loku loto ti mo lokoutou foki. Koia ke kotou iloa ai le alofa ki le tau tagata fenaaki.

¹⁹ E fakaalofa atu kia koutou a Ekelesia o Asia. E fakaalofa lasi atu kia koutou i le Aliki a Akilasi mo Pelesila, ti mo le Ekelesia leia e nofo i lola fale.

²⁰ E fakaalofa atu kia koutou a fetaina fuli. Ke kotou fefakaalofaaki ia koutou i se sogi maokioki.

²¹ E kau fakaalofa atu kia koutou, a au Paulo, i loku lima totonu.

²² Kapau e leaise alofa se tasi ki le Aliki ko Sesu-Kilisito, ke anateme a ia ! Malanata, au la Aliki.

²³ Ke nofo le kalasia o le Aliki Sesu mo koutou !

²⁴ E nofo loku alofa mo koutou fuli ia Sesu-Kilisito.