Uluaki tosi ki le kau Kolinto 15 - Tosi Tapu

Ko le toe tuuake o Sesu-Kilisito

¹ E kau fakamanatu atu kia koutou, fetaina, le Evaselio leia na kau akonaki atu kia koutou, leia foki kua kotou tali, ti na kotou tuumau ai,

² leia foki kua kotou saofaki ai, mo kapau e kotou taofi a ia ofaipe laku akonaki atu a ia kia koutou ; ka leai, na kotou tui noa.

³ Na kau akonaki atu kia koutou i mua o nea fuli, ofaipe le nea leia na kau tali ia foki : na mate Kilisito o tupu ko atatou agasala, o mulimuli ki le Tosi ;

⁴ ti na tanu a ia, ti na toe tuuake a ia i le aso tolu, o mulimuli ki le Tosi ;

⁵ ti na sa a ia kia Kefasi, ti mo le tino agafulu tupu lua.

⁶ Ti na sa a ia ki ni fetaina e tino lelau lima tupu i le temi e tasi, ti e koi mauli nei le toka api o latou, kae kua mamate ni iki.

⁷ Ti na sa loa a ia kia Sakopo, ti mo la ake apositolo fuli.

⁸ Ti e i muli o latou fuli, na toe sa loa a ia kiate au, ofaipe ki se toe leia na fanaui fakatomua ;

⁹ talie e kau ikiiki oki i le kau apositolo, ti e leaise tonu ke fakaigoa au ko le apositolo, talie na kau fakavelivelii le Ekelesia o le Atua.

¹⁰ Kae i le kalasia o le Atua, kua kau liliu o feneeki, ti na leaise ano noa lona kalasia kiate au ; mamao ai, na kau gaoi lasi ake ia latou fuli, kae na leaise ko au toka tasi, kae ko le kalasia o le Atua iate au.

¹¹ Koia, pe ko au, pe ko latou, ko lena le nea leia e motou akonaki, ti ko lena le nea leia na kotou tui ki ai.

Ko le mauiga o le toe tuuake o Kilisito

¹² Ti ko leinei, kapau e akonaki kua toe tuuake Kilisito mei le kau mate, kolea e pati ai ni iki o koutou e leaise toe tuuake le kau mate ?

¹³ Kapau e leaise toe tuuake le kau mate, ti na leaise toe tuuake foki Kilisito ;

¹⁴ ti kapau na leaise toe tuuake Kilisito, e ano noa loa lamatou akonaki, ti e ano noa foki mo lakoutou tui.

¹⁵ Ti e motou liliu foki ko ni tagata fakamaoki loi ki le Atua, talie na motou fakamaoki loi na fakatuuake Kilisito e le Atua, kae ta la na leaise toe fakatuuake e ia a ia, mo kapau e leaise toe tuuake le kau mate.

¹⁶ Talie kapau e leaise toe tuuake le kau mate, ti na leaise toe tuuake foki Kilisito ;

¹⁷ Ti kapau na leaise toe tuuake Kilisito, e leaise aoga lakotou tui, koi kotou nonofo i akoutou agasala,

¹⁸ ti kua pulinoa foki latou ala na mamate ia Kilisito.

¹⁹ Ti kapau e tou amanaki malie fua kia Kilisito i le mauli leinei, ko nea fakaaloalofa oki tatou i tagata fuli.

Sesu-Kilisito ko le uluaki na toe tuuake

²⁰ Kae ko leinei, kua toe tuuake maoki Kilisito mei le kau mate, ti kua soko a ia ko le uluaki fua o latou ala kua mamate.

²¹ Talie na au le mate mei se tagata e tasi, ti na au foki le toe tuuake mei se tagata e tasi.

²² Ti na mamate a tagata fuli ia Atama, e tatau foki, e toe mauli loa a tagata fuli ia Kilisito,

²³ kae e tasi nofo loa i lona tuuaga : ko le uluaki fua ko Kilisito, ti oki ko latou ala e kau ia Kilisito i lana toe liliu mai.

²⁴ Ti e soko loa le fakaoki, mo ka tuku loa e ia le puleaga ki leia e Atua mo Tamana, i le oki o lana maumaui a pule fuli, mo lagiaki fuli, ti mo makeke fuli.

²⁵ Talie e tonu ke pule a ia o kaku ki lana tuku ia ona fili fuli ki lalo o ona vae.

²⁶ Ko le fili fakamuli leia e maumaui loa, ko le mate.

²⁷ Talie, na tuku e le Atua a nea fuli ki lalo o vae o Kilisito. Kae i lana pati kua fakataulaloi a nea fuli kia Kilisito, e matala ai ko leia na soli ia kiate ia a nea fuli, e leaise kau i ai.

²⁸ Ti ka oki loa le fakataulaloi o nea fuli kia Kilisito, e fakataulalo loa le Alo totonu ki leia na tuku ia a nea fuli kiate ia, o tupu ke katoa le Atua i nea fuli.

Le maoki o le toe tuuake

²⁹ Ka leai, kolea e fai loa e latou ala kua papitema ki le kau mate ? Kapau e leaise toe tuuake ai le kau mate, kolea e lotou papitema ai ki le kau mate ?

³⁰ Ti ko matou, kolea e motou teiteiki ai omatou mauli i ola fuli ?

³¹ I le aso taki tasi e fakaali au ki le mate, e kau fakasa atu, fetaina, i le kololia leia e kau maua o tupu ko kotou ia Sesu-Kilisito lotatou Aliki.

³² Kapau ko ni tio fakatagata ala na kau tau ai ki manu fekai i Efeso, kolea lona aoga mai kiate au ? Kapau e leaise toe tuuake le kau mate, Tou kai ti tou inu, talie e tou mamate loa apogipogi.

³³ Aua na kotou fai sala : E maumaui e kaukaunea veveli a aga malilie.

³⁴ Kotou toe liliu mai kia koutou totonu, ko lena le nea leia e totonu, ti aua na kotou agasala ; talie e leaise iloa e ni iki o koutou le Atua, e kau fakasa a ia ke kotou luma ai.

Le tino o latou e toe tuuake

³⁵ Kae e pati loa se tasi : E feaki loa le toe tuuake a le kau mate, ti ko tino feaki ala e au loa mo latou ?

³⁶ Ko le vale a koe ! ko le nea leia e ke muluki e leaise mauli mo kapau e leaise mate mua a ia.

³⁷ Ti ko le nea leia e ke muluki, e leaise ko le tino lena e somo ake loa ; ko se fatui fakaili fai a ia, ofaipe se fatui fulumeto, pe ko se tasi ake fatui fakaili ;

³⁸ Ti e soli loa e le Atua kiate ia se tino ofai ki lona loto, ti e soli e ia ki pulapula taki tasi se tino leia e ano totonu mo ia.

³⁹ E leaise tatau a kanofi fuli ; e kese fai le kanofi o tagata, ti e kese le kanofi o le manu, ti e kese le kanofi o manu lele, ti e kese le kanofi o ika.

⁴⁰ E i ai foki ni tino fakaselo, ti mo ni tino fakakele ; kae e kese fai le gigila o tino fakaselo, ti e kese le gigila o tino fakakele.

⁴¹ E kese fai le gigila o le laa, ti e kese le gigila o le masina, ti e kese le gigila o fetuu ; ti e kese le gigila o le tasi fetuu mei le tasi fetuu.

⁴² E toe fenaaki foki mo le toe tuuake o le kau mate. E muluki le tino e pala, kae e toe tuuake a ia e lee pala ;

⁴³ E to a ia e fakalialia, kae e toe tuuake a ia e fakakololia ; e muluki a ia e gaegae, kae e toe tuuake a ia e apele i le makeke ;

⁴⁴ E to a ia e fakanatula, kae e toe tuuake loa a ia e fakalaumalie. Kapau e i ai se tino fakanatula, e i ai foki se tino fakalaumalie.

⁴⁵ Koia e tuu ai i le tosi : Ko le uluaki tagata, ko Atama, na liliu a ia ko se laumalie mauli. Ko le Atama fakamuli, ko Sesu, kua liliu a ia ko se Laumalie fakamauli.

⁴⁶ Kae e leaise muamua le nea leia e fakalaumalie, ko le nea leia e fakanatula ; e mulimuli le nea leia e fakalaumalie.

⁴⁷ Ko le uluaki tagata, leia na tupu mei le kele, e fakakele ; ko le lua tagata ko le Aliki a ia mei lagi.

⁴⁸ Ko latou ala e kau ki le kele, e tatau mo leia na au mei le kele ; kae ko latou ala e kau ki Selo e tatau mo leia na au mei Selo.

⁴⁹ Ti e tatau foki mo tatou : na tou maua le paaki o le tagata mei le kele, ti kua tou toe maua foki le paaki o leia na au mei Selo.

Malo o le toe tuuake i le mate

⁵⁰ Ko le nea leia e kau fakasa, fetaina, e leaise feala ke maua e le kanofi mo le toto le puleaga o le Atua, ti e leaise feala ke maua e nea pala a nea lee pala.

⁵¹ Ko leinei, e kau fakasa kia koutou se misitelio : E leaise tou mamate fuli loa, kae e tou fetogi fuli loa,

⁵² i se temi e tasi, i le kemo o le mata, i le pupusi o le fakatagi fakamuli. E tagi loa le fakatagi pupusi, ti e toe tuuake loa le kau mate i ni tino lee pala, ti ko tatou, e tou fetogi loa.

⁵³ Talie e tonu ke kofu e le tino pala leinei le lee pala, ti ke kofu e le tino mate leinei le mauli lee gato.

⁵⁴ Ka kofu loa e le tino pala leinei le lee pala, ti ka kofu loa e le tino mate leinei le mauli lee gato, ti e soko loa le folafola leia e tuu i le Tosi : Kua folo le mate e le malo.

⁵⁵ Ei mate, kofea lou malo ? Ei mate, kofea lou makeke ?

⁵⁶ Ko le pule o le mate ko le agasala ; ti ko le makeke o le agasala ko le lao.

⁵⁷ Kae ke tuku le fakafetai ki le Atua, leia kua soli ia kia tatou le malo i lotatou Aliki ko Sesu-Kilisito !

⁵⁸ Koia, ei oku fetaina alofaina, ke kotou tuu makeke, lee taugaoi, o gaoi ke asilisili malie ki le Aliki, o kotou iloa e leaise ano noa akoutou gaoi i le Aliki.