Uluaki tosi ki le kau Kolinto 12 - Tosi Tapu

Nea alofa fakalaumalie

¹ Ki le nea o uiga mo nea alofa fakalaumalie, e leaise kau loto, fetaina, ke kotou nofo i le fakapouli.

² E kotou iloa, i lakotou koi nofo i le pagani, na kotou tuku koutou ke ave ki ni taulaatua gutu mate, ti na taki koutou e latou.

³ Koia e kau fakasa atu kia koutou e leaise pati se tasi, mo ka masau a ia i le Laumalie o le Atua : e malaia Sesu ! Ti e leaise feala ke pati se tasi, mo ka e leaise masau a ia i le Laumalie Maokioki : e Aliki Sesu.

⁴ Ti ko leinei, e i ai nea alofa kesekese, kae ko le Laumalie fuai e tasi ;

⁵ mo tausi kesekese, kae ko le Aliki fuai e tasi ;

⁶ mo gaoi kesekese, kae ko le Atua fuai e tasi leia e fai ia a nea fuli i tagata fuli.

⁷ Kae kua soli e le Laumalie ki le tagata taki toka tasi le nea leia e tonu ke fakasa talie ke aoga ki tagata fuli.

⁸ Talie kua soli e le Laumalie ki le tasi se masau o le poto ; ki se tasi ake se masau o le iloa i le Laumalie fuai e tasi ;

⁹ ki se tasi ake, le tui, e le Laumalie fuai e tasi ; ki se tasi ake, le nea alofa o le fakamauli o masaki, e le Laumalie fuai e tasi.

¹⁰ Ki se tasi ake, le nea alofa o le fai milakulo ; ki se tasi ake, le fai kikite ; ki se tasi ake, le iloa o laumalie ; ki se tasi ake, a masau kesekese ; ki se tasi ake, le fakamatala o pati.

¹¹ Ko se Laumalie fuai e tasi leia e fai ia a nea fuli ana, ti mo tufa ia latou ki le tagata taki toka tasi o mulimuli ki lona finegalo.

Ko le kilisiteano ko le koga tino o Kilisito

¹² Talie, ofaipe le tino e tasi kae maua e ia ni koga tino mauke, ti ko koga tino fuli o le tino, logo ai lolatou mauke, kae lotou fau se tino e tasi : e tatau foki mo Kilisito.

¹³ Talie kua tou papitema fuli i se Laumalie e tasi, ke fau se tino e tasi, pe Sutea, pe Keleka, pe popula, pe lauatea, ti kua fakainu fuli tatou ki se Laumalie e tasi.

¹⁴ Koia e leaise ko se koga tino fuai e tasi le tino, kae e fau a ia ki koga tino e mauke.

¹⁵ Kapau e pati le vae : Talie e leaise ko se lima au, e leaise kau kau i le tino ; pe leaise kau loa a ia i le tino lena ?

¹⁶ Ti kapau e pati le taliga : Talie e leaise ko se fa mata au, e leaise kau kau i le tino ; pe leaise kau loa a ia i le tino lena ?

¹⁷ Kapau na fa mata le tino katoa, kofea loa le logo ? Kapau na logo katoa a ia, kofea loa le nanamu ?

¹⁸ Ko leinei kua fakatuu e le Atua a koga tino taki tasi i le tino ofai ki lona finegalo.

¹⁹ Kapau ko koga tino fuli ko se koga tino fuai e tasi, kofea loa le tino ?

²⁰ Ka ko leinei, e mauke koga tino, kae ko le tino fai e tasi.

²¹ E leaise mafai ke pati le fa mata ki le lima : E leaise ke aoga mai kiate au ; pe pati le fa ulu ki vae : E leaise kolua aoga mai kiate au.

²² Leai ! Kae ko koga tino o le tino ala e mata gagae e aoga lasi ake.

²³ Ti ko latou ala e tou pati e leaise mauiga i le tino e tou tokaga lasi kia latou. Ti ko otou koga tino ala e leaise malie ke masau ki ai, e tou tokaga lasi ai kia latou ;

²⁴ kae ko latou ala e fulumalilie, e leaise tou tokaga kia latou. Talie kua fakatuu e le Atua le tino ke tuku le fakaapaapa o lasi ake ki koga tino ala e mativa,

²⁵ o tupu ke aua na i ai ni mavaevae i le tino, kae ke fetokagaaki a koga tino fuli.

²⁶ Ti kapau e mamae se koga tino e tasi, e mamae a koga tino fuli mo ia ; ti kapau e fakamauiga se koga tino e tasi, e fiafia a koga tino fuli mo ia.

²⁷ Ko le tino koutou o Kilisito, ti ko ona koga tino koutou taki toka tasi.

²⁸ Ti kua fakanofo e le Atua i le Ekelesia, ko le uluaki ko le kau apositolo, ko le lua ko le kau polofeta, ko le tolu ko le kau fai akonaki, ti sosolo ai mai latou ala e maua ia le nea alofa o milakulo, ti mo latou ala e maua ia a nea alofa ke fakamauli ai a masaki, ke tokoi, ke lagiaki, ke masau ki masau kesekese.

²⁹ Pe lotou apositolo fuli ? Pe lotou polofeta fuli ? Pe lotou fai akonaki fuli ?

³⁰ Pe lotou maua fuli le nea alofa o milakulo ? Pe lotou maua fuli le nea alofa o le fakamauli masaki ? Pe lotou masau fuli ki masau kesekese ? Pe lotou fakamatala fuli a masau kesekese ?

³¹ Ke kotou oli lasi ki nea alofa malilie tukupau. Ti e kau toe fakasa atu loa kia koutou se ala leia e malie tukupau.