Uluaki tosi ki le kau Kolinto 11 - Tosi Tapu

¹ Kotou faifaitaki mai kiate au, ofaipe laku faifaitaki foki kia Kilisito.

Teu o le fafine i le Ekelesia

² E kau fakavikiviki kia koutou, i lakotou manatui au i nea fuli, ti mo lakotou tausi aku akonaki ofaipe laku kua tuku atu latou kia koutou.

³ Kae e kau loto ke kotou iloa ko Kilisito ko le pule a ia o tagata fuli ; ti ko le tagata ko le pule a ia o le fafine ; ti ko le Atua ko le pule a ia o Kilisito.

⁴ Ko le tagata fuli e faikole pe kikite, kae puloui lona ulu, e fakalumai e ia lona pule.

⁵ Ti ko le fafine fuli e faikole pe kikite, kae leaise puloui lona ulu, e fakalumai e ia lona pule : E tatau le fafine lena mo leia kua tele lona ulu.

⁶ Talie kapau e leaise pulou se fafine, ke koti foki lona lauulu. Kae, kapau e fakalumaluma ki se fafine ke koti lona lauulu pe tele lona ulu, ke pulou a ia.

⁷ E leaise tonu ke puloui e le tagata lona ulu, talie ko le paaki a ia o le kololia o le Atua, kae ko le fafine ko le kololia a ia o le tagata.

⁸ Talie na leaise too le tagata mei le fafine, kae ko le fafine leia na too mei le tagata ;

⁹ ti na leaise fakatupu le tagata o tupu ko le fafine, kae na fakatupu le fafine o tupu ko le tagata.

¹⁰ Koia e tonu ai ke teki e le fafine ki lona ulu se fakamailoga o le pule leia e fakalogo a ia ki ai, o tupu ko le kau aselo.

¹¹ Kae ko leinei, i le Aliki, e leai le fafine sala mo le tagata, ti e leai le tagata sala mo le fafine.

¹² Talie, ofaipe le fafine na too mei le tagata, e tupu foki le tagata mei le fafine, ti e au nea fuli mei le Atua.

¹³ Kotou sivisivi mua e kotou totonu : Pe malie ke faikole se fafine ki le Atua sala pulou ?

¹⁴ Pe leaise ako mai e le natula totonu kia tatou ko se luma ke lauulu le tagata,

¹⁵ kae ko se kololia ke lauulu le fafine, talie kua soli le lauulu kiate ia ofaipe se pulou ?

¹⁶ Kapau e fia fakavisi ki ai se tasi, ke iloa e ia : e leaise ko se agamasani a ia ia matou, ti e toe tatau i Ekelesia fuli o le Atua.

Fai o le kai a le Aliki

¹⁷ I le tuku atu o le valoki leinei, e leaise kau viki koutou, talie ka kotou fakatasi, e leaise tupu ke kotou liliu o asilisili malilie, kae ke kotou liliu o asilisili veveli oki.

¹⁸ Ti ko le uluaki nea, e kau logo, ka kotou fakatasi fakaekelesia, e i ai ni fakavaevaega ia koutou, ti e kau teitei tui ki ai,

¹⁹ talie e tonu ke i ai foki ni magai lotu ia koutou, o tupu ke iloa ai latou ala kua fakamaoki ia koutou.

²⁰ Koia ka kotou fakatasi ai, e leaise ko le kai a le Aliki leia e kotou too ;

²¹ talie, ka soko le kai, e tasi kamata kai e le tagata lana nea kai, ti e fia kai le tasi, kae e kona le tasi.

²² Pe leai ni okoutou fale ke kotou kai ai mo inu ai ? Pe kotou nukinuki ki le Ekelesia o le Atua, ti mo kotou fakalumai latou ala e leaise maua ia se nea ? Kolea ke kau pati loa kia koutou ? Pe kau vikiviki loa kia koutou ? I le nea lena e leaise kau vikiviki ai kia koutou.

²³ Talie kua kau tali mei le Aliki le nea leia na kau ako atu kia koutou ; ko le Aliki Sesu, i le po leia na fakatau ai a ia, na too ia loa le pane,

²⁴ ti i le oki o lana fakafetai, na tofitofi loa e ia a ia, o pati : ko loku tino leinei, leia kua tofitofi o tupu ko koutou ; kotou fai le nea leinei o fakamanatu kiate au.

²⁵ Ti na fenaaki foki, i le oki o le kai, na too loa e ia le ipu, o pati : Ko le ipu leinei o le sai foou i loku toto ; kotou fai le nea leinei ko se fakamanatu kiate au, i temi fuli ala e kotou inu ai loa a ia.

²⁶ Talie i faiaga fuli ala e kotou kai ai le pane leinei mo inu ai le ipu leinei, e kotou fakasa ia le mate o le Aliki, o kaku ki lana toe saele mai.

²⁷ Koia ko leia e kai ia loa le pane mo inu ia loa le ipu o le Aliki, mo se lee fakaapaapa, e sala loa a ia ki le tino mo le toto o le Aliki.

²⁸ Koia e malie ai ke tasi asiasii e le tagata a ia totonu, ti ke kai loa e ia le pane mo inu loa e ia le ipu ;

²⁹ talie ko leia e kai mo inu kae e leaise fakaapaapa a ia ki le tino o le Aliki, e kai mo inu e ia se malaia kiate ia totonu.

³⁰ Koia leia e gagae ai mo masasaki ai se toka api ia koutou, ti kua mamate ai foki se toka api.

³¹ Kapau e tou asiasii tatou totonu, e leaise tautea loa tatou.

³² Kae e fakamaaui tatou, ti e tautea tatou e le Aliki, o tupu ke aua na tou malaia fakatasi mo le malama nei.

³³ Koia, ei oku fetaina, ka kotou fakatasi ki le kai, kotou fetataliaki ia koutou.

³⁴ Kapau e fia kai se tasi, ke kai a ia i lona kaiga ; talie ke aua na kotou fakatasi ki le malaia. Koi kau fakatonutonu loa a la ake a nea mo ka kau kaku atu loa.