Uluaki tosi ki le kau Kolinto 10 - Tosi Tapu

Faifaitakiaga i le isitolia o Iselaele

¹ Ei fetaina, e leaise kau loto ke kotou fakapouli na nonofo fuli otatou tamana i le malumalu o le ao, ti na lotou fakalaka fuli i le tai,

² ti na lotou papitema fuli ia Moisese i le ao mo le tai,

³ ti na lotou kai fuli le nea kai fakalaumalie e tasi,

⁴ ti na lotou inu fuli le nea inu fakalaumalie e tasi, talie na lotou inu i se utu fakalaumalie leia na mulimuli ia latou, ti ko le utu a ia ko Kilisito.

⁵ Kae na leaise malie le toka api o latou ki le Atua, talie na lotou mamate loa i le toafa.

⁶ Kae kua soko a nea ana ko ni faifaitakiaga kia tatou, o tupu ke aua na tou maua ni oli veveli ofaipe la na lotou maua ia.

⁷ Aua na kotou tausi taulaatua, ofaipe ni iki o latou, o mulimuli ki le nea leia e tuu i le tosi : Na tonatona loa le kakai o kai mo inu, ti na lotou tutuu ake loa o fakafiafia.

⁸ Aua na tou fai feauaki, ofaipe le fai a ni iki o latou, o tupu ai le mate o le tino lua tupu tolu afe i se aso fai e tasi.

⁹ Aua na tou asiasii le Aliki, ofaipe le fai a ni iki o latou, ala na mamate loa i gata.

¹⁰ Aua na kotou lauga, ofaipe le fai a ni iki o latou, ala na tamate loa e le aselo o le malaia.

¹¹ Ti na soko a nea fuli ana kia latou ko ni faifaitakiaga kia tatou, ti kua tosi latou ko ni akonaki kia tatou anei, kua kaku mai ki le fakaoki o sekulo.

¹² Koia, ko leia e manatu e tuu a ia i aluga, ke tokaga a ia na vilo !

¹³ E leai se asiasii leia e vilo kia koutou e fakalaka i le makeke o le tagata, ti e leaise fakataga loa e le Atua, leia e agatonu, ke asiasii koutou o fakalaka i lokoutou makeke ; kae i le asiasii, e toe teuteui foki e ia le ala leia ke sao ai, o tupu ke kotou matatali a ia.

E leaise tatau le laupapa o le Aliki mo le tausi ki taulaatua

¹⁴ Koia, ei oku alofaaga, kotou sosola mei le tausi ki taulaatua.

¹⁵ E kau masau atu ki ni tagata poto ; kotou fakamaaui totonu le nea leia e kau masau atu ki ai.

¹⁶ Ko le ipu o le tapuakina leia e tou tapuakii, pe leaise ko le komunio a ia ki le toto o Kilisito ? Ti ko le pane leia e tou tofitofi, pe leaise ko le komunio a ia ki le tino o Kilisito ?

¹⁷ Ti e tupu e ia se fa pane e tasi, ko tatou ala e toka api, e tou fau ia se tino e tasi ; talie e tou kau fuli ki se fa pane e tasi.

¹⁸ Kotou tio ki le kau Iselaele i le kanofi : ko latou ala e kai ia vikitima pe leaise lotou komunio mo le aletale ?

¹⁹ Kolea loa le uiga o laku pati ? Pe ko se nea koia le inati leia e momoli ki taulaatua ? Pe ko se nea koia se taulaatua ? Leai ai.

²⁰ Kae e kau pati ko le nea leia e sakilifisioi, e momoli ki ni temonio, kae e leai ki le Atua ; ti e leaise kau loto ke kotou komunio mo le kau temonio.

²¹ E leaise mafai ke kotou inu le ipu o le Aliki, ti mo le ipu o le kau temonio ; e leaise mafai ke kotou kau ki le laupapa o le Aliki, ti mo le laupapa o le kau temonio.

²² Pe tou loto ke tou fakatupu ia le finenonofo o le Aliki ? Pe tou makeke ake iate ia ?

Ko le lao o le alofa e tonu ke taki ia nea fuli

²³ E taga nea fuli, kae e leaise aoga nea fuli ; e taga nea fuli, kae e leaise faufau nea fuli.

²⁴ Ke aua na afa e se tasi le nea leia e aoga kiate ia totonu, kae ke afa e ia le nea leia e aoga ki la ake.

²⁵ Kotou kai ki nea fuli ala e fakatau i le maketi, kae aua na kotou vesili o tupu ko le loto ;

²⁶ talie a le Aliki le malama nei mo nea fuli i ai.

²⁷ Kapau e fakaafe koutou e se tagata lee tui ti e kotou loto loa ke kotou ano ki ai, kotou kai ki nea fuli ala e soli atu loa kia koutou, kae aua na kotou vesili o tupu ko le loto.

²⁸ Kae kapau e pati atu loa se tasi kia koutou : Kua momoli le nea leinei ki se taulaatua ! Aua na kotou kai ki ai, o tupu ko leia na fakasa atu ia kia koutou, ti o tupu ko lona loto.

²⁹ E kau masau i leinei, o leai ki lokoutou loto, kae ki leia o leia ake. Talie kolea e fakamaaui ai loa loku lauatea e se loto o se tasi kese ?

³⁰ Talie kapau e kau kai mo se loto fakafetai, kolea e valoki ai loa au o tupu ko se nea leia e kau fakafetai ai ?

³¹ Koia ka kotou kai ai, pe kotou inu, pe kotou fai se nea fua, kotou fai a nea fuli ke fakakololia ai le Atua.

³² Aua na kotou liliu ko se fatu sigaaga ki le kau Keleka, pe ki le kau Sutea, pe ki le Ekelesia o le Atua,

³³ Io, ofaipe au foki, e kau faiga i nea fuli ke malie ki tagata fuli, o kau afa, o leai le nea leia e malie kiate au, kae le nea leia e malie ki le toka api, o tupu ke saofaki ai latou.