Uluaki tosi ki le kau Kolinto 1 - Tosi Tapu

Fakaalofa

¹ Ko au Paulo, leia na kalagai ke liliu ko le apositolo a Sesu-Kilisito i le finegalo o le Atua, mo le taina ko Sositene,

² ki le Ekelesia o le Atua i Kolinito, kia latou ala kua vaei kese ia Sesu-Kilisito, ti kua kalagai ke maokioki, ti mo latou fuli ala e too ia i potu kesekese le suafa o lotatou Aliki ko Sesu-Kilisito, ko lolatou Aliki ti ko loma Aliki foki.

³ Ke soli atu le kalasia mo le tokamalie kia koutou e le Atua ko lotatou Tamana ti mo le Aliki ko Sesu-Kilisito !

Fakafetai

⁴ E kau fakafetai tuumau ki le Atua o uiga mo koutou, o tupu ko le kalasia o le Atua leia kua tuku atu e ia kia koutou ia Sesu-Kilisito,

⁵ Talie iate ia kua kotou mou koloa i nea fuli o uiga mo le folafola ti mo le iloa,

⁶ ofaipe le fakamaoki o Sesu-Kilisito leia kua tuu makeke ia koutou :

⁷ Koia e leaise koi puli fua ia koutou se nea alofa, koutou ala e talitali ki le fakasa o lotatou Aliki ko Sesu-Kilisito.

⁸ Ko ia foki leia e fakatuu makeke ia loa koutou o kaku ki le fakaoki, o tupu ke kotou saosaoa i le aso o lotatou Aliki ko Sesu-Kilisito.

⁹ E agatonu le Atua, leia na kalagai ia koutou ki le komunio o lona Alo, ko Sesu-Kilisito lotatou Aliki.

Fakavaevaega i le Ekelesia o Kolinito

¹⁰ Koia, fetaina, e kau kole mamae atu kia koutou i le suafa o lotatou Aliki ko Sesu-Kilisito, ke kotou masau fuli ki se masau e tasi, ti ke aua na maua ni fakavaevaega ia koutou, kae ke kotou pipiki tasi i se loto e tasi, ti mo se fakakaukau e tasi.

¹¹ Talie, ei oku fetaina, kua kau logo o uiga mo koutou, mei ni iki o le fale o Koloe, e maua ni veliveli ia koutou.

¹² E kau fia masau i leinei, e kotou tasi pati feneeki : Ko au, o Paulo au ! - ti ko au, o Apolosio ! - ti ko au, o Sefasi ! - ti ko au, o Kilisito !

¹³ Pe na mavaevae koia Kilisito ? Pe na kulusifiko koia Paulo o tupu ko koutou, pe na papitema koia koutou i le igoa o Paulo ?

¹⁴ E kau fakafetai ki le Atua, na leaise kau papitema ia se tasi ia koutou, gato fai kia Kilisipusi mo Kaiusi ;

¹⁵ Talie ke aua na pati loa se tasi kua papitema koutou i loku igoa.

¹⁶ Ti na kau papitema foki le famili o Setefano, ti e leaise kau toe iloa pe na kau toe papitema se tasi kese ake.

Poto o le malama nei ; poto o le Atua

¹⁷ Talie na leaise kakau mai au e Kilisito ke fai papitema, kae ke fakasa ia le Evaselio, ti ko le nea lena sala mo le poto o le masau, o tupu ke aua na fakaliliu o noa le koluse o Kilisito.

¹⁸ Talie ko le akonaki o le koluse ko se valea a ia kia latou ala e malaia, kae kia tatou ala kua saofaki, ko se makeke a ia o le Atua.

¹⁹ Talie kua tosi : E kau maumaui loa le poto o le kau poto, Ti e kau fakaliliu loa o noa le atamai o le kau atamai.

²⁰ Kofea le poto ? Kofea le sekelipa ? Kofea le tagata fakavisi o le malama nei ? Pe na leaise fakamaoki le Atua ko se valea le poto o le malama nei ?

²¹ Talie i lona poto na leaise iloa e le malama nei le Atua, kae na malie ki le Atua i lona poto ke saofaki latou ala e tui ki le valea o le akonaki.

²² E kole e le kau Sutea ni milakulo, ti e afa e le kau Keleka le poto,

²³ Kae ko maua, e ma fakasa Kilisito na tutuki i le koluse, ko le tukiaaga ki le kau Sutea, ti ko le valea ki le kau pagani,

²⁴ kae ko se makeke o le Atua mo se poto o le Atua kia latou ala kua kalagai, i le kau Sutea mo le kau Keleka.

²⁵ Talie ko le valea o le Atua e poto ake i tagata, ti ko le gaegae o le Atua e makeke ake i tagata.

²⁶ Kotou fakatiotio mua, fetaina, kia koutou ala kua kalagai : E leaise api ni poto i le fakatino, ti e leaise api ni tagata makeke, ti e leaise api foki ni aliki.

²⁷ Kae kua filifili e le Atua a nea valelea o le malama nei ke fakalumai ai le kau poto ; ti kua filifili e le Atua a nea gagae o le malama nei ke fakalumai ai le kau makeke ;

²⁸ ti kua filifili e le Atua a nea veveli o le malama nei, mo nea vesiainai, mo nea noa, ke maumaui ai a nea ala e mauiga ki le malama nei,

²⁹ o tupu ke aua na fakakololia se tagata kiate ia totonu i mua o le Atua.

³⁰ Kae kua fakapipiki koutou kia Sesu-Kilisito, leia i le finegalo o le Atua, kua liliu kia tatou ko le poto, mo le faitotonu, mo le maokioki, ti mo le totogi,

³¹ ofaipe lona tuu i le tosi : Ko leia e fakakololia Ke fakakololia a ia i le Aliki.