Zekariya 3 - Fulfulde Bible

Haala Yosuwa, hooreejo liman'en

¹ Nden Jawmiraawo yi'ni yam Yosuwa, hooreejo liman'en. O ɗon dari yeeso malaa'ikaajo Jawmiraawo. Sayɗaanu boo ɗon dari haa nyaamo maako ngam wullaago mo.

² Malaa'ikaajo Jawmiraawo wi'i mo: “Jawmiraawo telɓane, an Sayɗaanu! Jawmiraawo cuɓɗo Urusaliima telɓane! Goɗɗo oo nanndaay bee doccal gurtinaaŋgal diga yiite na?”

³ Yosuwa ɗonno ɓorni limce tunwuɗe, saa'i o ɗonno dari yeeso malaa'ikaajo.

⁴ Malaa'ikaajo umri suka'en wonduɓe bee muuɗum: “Ɓorte mo limce tunwuɗe ɗe'e.” Nden o wi'i Yosuwa: “Ndaa, mi ittani ma aybe maaɗa, mi ɓornante limce jaage.”

⁵ O wi'i: “Meete mo meetaleewol laaɓŋgol!” Ɓe meeti ngol dow hoore maako. Nden ɓe ɓorni mo limce laaɓɗe. Malaa'ikaajo Jawmiraawo ɗon dari.

⁶ Ɓaawo man malaa'ikaajo Jawmiraawo umri Yosuwa:

⁷ “Ndaa ko Jawmiraawo honooɓe asama wi'i: To a tokkake laabi am, to a ɗowtanake umrooje am, nden mi laatinte kaliifaajo haykaliiru am e dalde maaru. Mi duŋante ngam ndaroɗa kal-kal bee huuwooɓe am dariiɓe ɗo.

⁸ Nan, an Yosuwa hooreejo liman'en, nane onon hawtiɗiraaɓe maako boo. On laati alaama mbooɗka ka'a: Mi waddan suka am bi'eteeɗo Fuɗŋgo.

⁹ Ndaa hayre nde mi wallinta yeeso Yosuwa. Dow hayre nde'e, woodi gite joweeɗiɗi. Min bee hoore am, mi winndan binndol dow maare. Mi ittan aybeeji lesdi ndi'i nder nyalaade woore. Non Jawmiraawo honooɓe asama wi'i.

¹⁰ Nyalaade man on ewnotirto ngam jooɗaago jam les inabooje mooɗon e les ibbe mooɗon. Non Jawmiraawo honooɓe asama wi'i.”