Zekariya 13 - Fulfulde Bible

¹ “Nyalaade maajum saare Daawuda e jooɗiiɓe nder Urusaliima keɓan seeɓoore maɓɓitiinde ngam lootugo hakke e coɓɗum fuu.”

² Jawmiraawo honooɓe asama wi'i: “Saa'i man nattinanmi inɗe labbi nder lesdi, ngam taa goɗɗo siftora ɗe. Mi nattinan boo fewooɓe wi'anɓe ɓe annabi'en e ruuhu coɓki nder lesdi.

³ To goɗɗo tokkake waɗugo annabaaku, baaba maako e daada maako mbi'an ɗu'um: Sey a maaya, ngam a ɗon fewa bee innde Jawmiraawo! Baaba maako e daada maako njuwan mo yaake o waɗata annabaaku.

⁴ Saa'i man annabi'en cemtan ngam koyɗi muuɗum'en ɗi ɓe koyɗi saa'i ɓe ɗon mbaɗa annabaakuuji maɓɓe. Ɓe meetataa ɓornugo alkibbaare annabi'en huuwraande bee gaasa ngam zammbaago yimɓe.

⁵ Koo moy maɓɓe wi'an: Naa mi annabiijo, min kam mi demoowo, ngam goɗɗo marni yam ka saa'i mi derke.

⁶ To goɗɗo ƴami mo: E ɗume ɓattajje ɗe'e dow wiɓɓere maaɗa? Nden kam o jaaboto: Mi naawnaama haa suudu waaye'en am.”

Gooto haa tato luttan

⁷ Jawmiraawo honooɓe asama wi'i: “An kaafahi, ummana gaynaako am, mo mi waɗi ɗum kuuwdiɗɗiraawo am! Mbar gaynaako, nden baali caŋkititto koo toy fuu. Mi waylitan juŋngo am, mi fiya pamari.”

⁸ Jawmiraawo wi'i: “Nden, nder lesdi fuu geɓe yimɓe ɗiɗi maayan, sey yeɓre woore tan yeeɗata.

⁹ Mi nastinan luttanɓe bee yoŋki ɓe'e nder yiite ngam laɓɓingo ɓe bana goɗɗo laɓɓinirta cardi. Mi foondan ɓe bana goɗɗo laɓɓinirta kaŋŋeeri. Nden kadi ɓe toroto yam, min boo mi jaɓan tornde maɓɓe. Mi wi'an: Onon, on yimɓe ummaatoore am. Kamɓe boo ɓe mbi'an: Jawmiraawo woni Allah amin.”