Zekariya 10 - Fulfulde Bible

No Jawmiraawo hisnirta yimɓe muuɗum

¹ Tore Jawmiraawo, o hokka on iyeende saa'i nduŋngu. Kaŋko waɗata naargeeji, o toɓnanan on waabiliire. O fuɗnanan koo moy haakooji nder ngesa muuɗum.

² Labbi ɗon carwo on fewre, hiila'en boo ɗon mbaɗa annabaakuuji pewooji. Koyɗi ɗi ɓe anndinta boo ngalaa saman. De'itinki maɓɓe ɗum huunde meere. Ngam maajum yimɓe ɗon ngiilo bana baali, ɓe ɓillake ngam ɓe ngalaa gaynaako.

³ Tikkere am saatanan waynaaɓe, mi ummanto jawɗi. Min Jawmiraawo honooɓe asama mi suklanto tokkere am, waato yimɓe Yahuuda. Mi laatinan ɓe bana puccu konu jaalotooŋgu.

⁴ Diga Yahuuda laamiiɓe feere feere ngurtoto. Ɓe semmbiɗɓe bana hayre talkumoore, tabitɓe bana leggal tiggirgal laymaaru e semmbiɗɓe bana lagaawal konu.

⁵ Yimɓe Yahuuda nanndan bee honooɓe semmbiɗɓe, ɓe ndamman konne'en maɓɓe bana loope dow laawol. Non ɓe kaɓrata, ngam min Jawmiraawo mi ɗon wondi bee maɓɓe. Konne'en maɓɓe wa'iiɓe pucci, keewan semteende.

⁶ Mi semmbiɗinan yimɓe Yahuuda, mi rimɗinan yimɓe Yusufu. Mi hooran ɓe, ngam mi woodi enɗam ngam maɓɓe. Ɓe laatoto bana mi meeɗaayno wudingo ɓe sam. Min woni Jawmiraawo Allah maɓɓe, mi jaaban tornde maɓɓe.

⁷ Worɓe Efrayim laatoto honooɓe semmbiɗɓe. Ɓerɗe maɓɓe ceyoto bana to ɓe njari inaboojam. To ɓiɓɓe maɓɓe ngi'i ɗum, ɓe ceyoto, ɓerɗe maɓɓe keewan seyo daliila Jawmiraawo.

⁸ Mi ewnoto yimɓe ummaatoore am, ngam mooɓtugo ɓe. Mi rimɗinan ɓe. Ɓe ɗuuɗan fahin bana ɓe ɗuuɗiri naane.

⁹ Mi saŋkiti ɓe caka ummaatooje bana ɓe caakirta aawdi, ammaa nder lesɗe daayiiɗe ɓe ciftortam. Ɓe njooɗodotto bee ɓikkoy maɓɓe, nden ɓe ngartan.

¹⁰ Mi wartiran ɓe diga lesdi Misra e lesdi Assuura. Mi mooɓtan ɓe, mi yahran ɓe nder lesdi Gile'at e dow kooseeje Libanon. Ammaa haa ton boo, pellel famɗanan ɓe.

¹¹ Ɓe eeroto Maayo Masiibo, min Jawmiraawo mi fiyan ƴuuge maago, koo nokkuuje lugguɗe ɗe Niil boo njooran. Nden mawnitaare Assuura leestan, baawɗe Misra nattan.

¹² Mi semmbiɗinan ummaatoore am Isra'iila, Isra'iila tokkoto muuyo am. Min Jawmiraawo wi'i ɗum.