Yuhanna 7 - Fulfulde Bible

Deerɗiraaɓe Yeesu nuɗɗinaay mo

¹ Ɓaawo man, Yeesu waanci lesdi Galiili, ngam o yiɗaano yahugo lesdi Yahudiya, ngam Yahuudu'en ɗonno ɗaɓɓa mbarugo mo.

² Wakkati man, juulde Yahuudu'en wi'eteende juulde bukkaaji ɓadake,

³ deerɗiraaɓe maako mbi'i mo: “Dillu diga nokkuure nde'e, yah haa lesdi Yahudiya, ngam haa pukara'en maaɗa boo ngi'a kuuɗe ɗe a huuwata.

⁴ Walaa mo suuɗataa hoore muuɗum to o yiɗi yimɓe ngi'a mo. Nde nii a ɗon huuwa kuuɗe ɗe'e, waŋgin hoore ma haa yimɓe.”

⁵ Koo deerɗiraaɓe maako maa, nuɗɗinaay mo.

⁶ Yeesu wi'i ɓe: “Wakkati am waɗaay tawon. Ammaa ngam mooɗon, wakkatiire koo ndeyeere fuu, nde fottunde.

⁷ Duniyaaru waawataa wanyugo on, ammaa ndu wanyatam min, ngam mi ɗon seedano ndu no kuuɗe maaru ɗe kalluɗe.

⁸ Njehe haa juulde onon kam, min mi siwaa yahugo, ngam wakkati am waɗaay tawon.”

⁹ Ɓaawo o wi'i ɓe ɗum, kaŋko o lutti haa lesdi Galiili.

Yeesu haa juulde bukkaaji

¹⁰ Nde deerɗiraaɓe Yeesu njehi haa juulde, kaŋko boo o yehi ton. O waŋganaay yimɓe, ammaa o yehi bee sirri.

¹¹ Yahuudu'en ɗonno tefa mo nder mooɓre juulde, ɓe ɗonno ƴama: “Toy mo?”

¹² Yimɓe nder mooɓre mbolwi dow maako ɗuuɗɗum bee sofndaago. Woɗɓe ɗonno mbi'a: “O goɗɗo giɗɗo mbooɗeeŋga.” Ammaa woɗɓe boo ɗonno mbi'a: “Naa non sam, o ɗon majjina yimɓe.”

¹³ Ammaa walaa mo wolwi dow maako bee baŋguɗum, ngam ɓe ɗon kula mawɓe Yahuudu'en.

¹⁴ Nde reeta nyalɗe juulde caali, Yeesu nasti haykaliiru, fuɗɗi ekkitingo yimɓe.

¹⁵ Yahuudu'en kayɗini, mbi'i: “Noy o heɓri anndal binndi, kaŋko mo jaŋngaay?”

¹⁶ Yeesu jaabi ɓe: “Ko mi ekkitinta iwaay haa am, ammaa ɗum iwi haa Allah nelɗo yam.

¹⁷ To goɗɗo yiɗi waɗugo muuyo Allah, o anndan to ekkitinol am iwi haa Allah malla to mi ɗon wolwa ngiɗa am.

¹⁸ Koo moy wolwi ngiɗa mum, ɗon ɗaɓɓana hoore mum tedduŋgal. Ammaa koo moy ɗaɓɓi teddingo nelɗo ɗum, o gooŋgaajo, walaa sooynde adilaaku nder maako.

¹⁹ Naa Muusa hokki on tawreeta na? Ammaa walaa koo gooto mooɗon ɗowtanto ka. Koni on ɗaɓɓata mbarugo yam?”

²⁰ Mooɓre jaabi mo: “A ginnaaɗo! Moy ɗaɓɓi mbarugo ma?”

²¹ Yeesu jaabi ɓe: “Mi huuwi kuugal gootal tan, on fuu on kayɗini.

²² Muusa umri on juulnol – ammaa umroore nde iwaay diga Muusa, nde iwi diga kaakiraaɓe – ngam maajum on ɗon njuulna ɓiŋngel gorgel nyalaade siwtorde.

²³ To on ɗon njuulna goɗɗo nyalaade siwtorde, ngam taa on luuta umroore Muusa, kadi ngam ɗume on tikkani yam ngam mi yamɗitini ɓanndu goɗɗo fuu nder nyalaade siwtorde?

²⁴ Taa kiite fodde ko gite ngi'ata, ammaa kiite kiita adiliiha.”

Yeesu woni Almasiihu na?

²⁵ Woɗɓe nder yimɓe Urusaliima mbi'i: “Naa kaŋko woni mo ɓe ɗaɓɓata ngam mbarugo?

²⁶ Ndaa o ɗon wolwa bee baŋguɗum, ammaa ɓe mbi'aay mo koo ɗume. Kadi ardiiɓe meeɗen annditi fakat kaŋko woni Almasiihu na?

²⁷ To Almasiihu wari, walaa anndanɗo haa o iwi, ammaa gorko oo kam, en anndi haa o iwi.”

²⁸ Nden Yeesu ɗon ekkitina yimɓe nder haykaliiru bee sawtu, o ɗonno wi'a: “On anndi yam, on anndi haa mi iwi. Mi waraay bee ngiɗa am, ammaa nelɗo yam o gooŋgaajo. Kaŋko, on anndaa mo.

²⁹ Min, mi anndi mo, ngam mi iwi haa maako, kaŋko neli yam.”

³⁰ Nden ɓe ɗaɓɓi naŋngugo mo, ammaa walaa mo meemi mo, ngam wakkati maako yottaaki tawon.

³¹ Ɗuuɗɓe nder mooɓre nuɗɗini mo, ɓe ɗonno mbi'a: “To Almasiihu wari, o waɗan kaayeefiiji ko ɓuri gorko oo na?”

Aynooɓe haykaliiru tefi naŋngugo Yeesu

³² Farisa'en nani ngurŋgurtol mooɓre dow Yeesu, nden ɓe narri bee mawɓe liman'en, ɓe neli aynooɓe haykaliiru ngam naŋngugo Yeesu.

³³ Yeesu wi'i: “Mi ɗon wondi bee mooɗon wakkati seɗɗa tawon, nden mi loro haa nelɗo yam.

³⁴ On tefatam, ammaa on tawataa yam, ngam on mbaawataa yahugo haa ngonanmi.”

³⁵ Yahuudu'en ƴamƴamtiri: Toy o tammi yahugo haa en mbaawataa tawugo mo? O tammi dillugo haa lesɗe ɗe Yahuudu'en saŋkitiiɓe caka Yunaniŋke'en ngoni ngam o ekkitina Yunaniŋke'en na?

³⁶ O wi'i: “On tefatam, ammaa on tawataa yam, ngam on mbaawataa yahugo haa ngonanmi.” Ɗume wolde nde'e yiɗi wi'go?

Maaje ndiyam ngeetam

³⁷ Nyalaade timminirde juulde, kayre ɓuri nyalɗe goɗɗe samɗineego. Nyannde man Yeesu ummi, dari. O wolwi bee sawtu, o wi'i: “Koo moy ɗomɗi, wara haa am, yara,

³⁸ koo moy nuɗɗini yam, bana ko Deftere wi'i, maaje ndiyam ngeetam ilan diga nder maako.”

³⁹ Yeesu waɗi balndol ngol dow Ruuhu mo nuɗɗinɓe mo tammi heɓugo. Saa'i man ɓe keɓaayno Ruuhu tawon, ngam Yeesu siwaa nastugo tedduŋgal.

Yimɓe luuri dow haala Yeesu

⁴⁰ Nde yimɓe nder mooɓre nani bolle ɗe'e, ɓe mbi'i: “Fakat, kaŋko o annabiijo mo en ndeenata.”

⁴¹ Woɗɓe mbi'i: “Kaŋko woni Almasiihu.” Woɗɓe feere fahin mbi'i: “Kadi, diga Galiili Almasiihu iwata na?

⁴² Naa Deftere wi'i Almasiihu iwan diga danygol Daawuda, nder berniwol Baytilaama, haa Daawuda wonno?”

⁴³ Nden luural waɗi hakkunde yimɓe daliila Yeesu.

⁴⁴ Woɗɓe caka maɓɓe ngiɗi naŋngugo mo, ammaa walaa mo meemi mo.

Mawɓe Yahuudu'en nuɗɗinaay Yeesu

⁴⁵ Aynooɓe haykaliiru go lori haa mawɓe liman'en e Farisa'en, kamɓe ɓe ɗonno mbi'a ɓe: “Koni on ngaddaay mo?”

⁴⁶ Aynooɓe njaabi: “Walaa mo meeɗi wolwugo bana gorko oo sam.”

⁴⁷ Farisa'en ƴami ɓe: “Onon boo on tokki esto maako na?

⁴⁸ Woodi koo gooto nder mawɓe meeɗen malla nder Farisa'en nuɗɗini mo na?

⁴⁹ Sey mooɓre nde anndaa tawreeta, nde naalaande!”

⁵⁰ Nikodemus, gooto nder Farisa'en wonɓe ton, mo meeɗino yahugo haa Yeesu, kaŋko o wi'i ɓe:

⁵¹ “Tawreeta meeɗen duŋani en hiitaago goɗɗo diga en nanaay mo, en anndaa ko o waɗi na?”

⁵² Ɓe njaabi mo: “An boo a goɗɗo Galiili na? Linyu booɗɗum nder Deftere, a tawan walaa annabiijo koo gooto iwata diga Galiili.”

Debbo jeenoowo

⁵³ Nden koo moy hooti saare muuɗum.